Yohane 7

Yesu na wʋnabie

1Ŋina wʋrʋgbɩɛ na, Yesu dɔŋ wʋ a logo Galaliya tibi wʋ aa ja sɛ wʋ a jʋʋ Yudiya tibi dʋɔ ɔ. Akala takɩɛ Yudatina baa ba wɩɛ dɩmʋŋ na, aja ɩ baa kʋ. 2Ama gʋ Yudatina akoneŋ1 asadi adiya di tirina na. 3Yesu wʋnabie tawɩ ɩ sɛ, <<Dɩ daga na nya lɩɩ jɩna ju Yudiya, na n kpalɛnara a na adaŋgana ŋii nya yɩɛ. 4Wʋrʋ taŋ sɛ wʋ a ja wʋ a lɩɛ yɩrɩ sɛ wʋ a yɩɛ wʋ dɩtʋm asɩrɩ naŋ ŋ. Gʋ nyaa yɩɛ ŋina na, lɩsɛ n wʋsɛ kalaa dulunya na baa na.>> 5Kɩɛ wʋ tɩŋtɩŋ wʋnabie n lɩɛ ɩ di i.

6Dɩmʋŋ dʋɔ Yesu tawɩ ba sɛ, <<Ma saŋa gaa ga wɩɛ dieli na n kɔŋ ta a, amɩɛ bɩrɛ saŋa kʋma wɩɛ dieli fa amɩɛ. 7Dulunya baa dɩlɛ kɔla amɩɛ ɛ, ama ga kɔla maŋ, akala takɩɛ ma di seriya takɩɛ ga ayɩɛsa yɩɛ dɩsʋbʋ bɛ. 8Amɩɛ bɩrɛ n ju asadi adiya di ŋii tie. Maŋ bɩrɛ ma n ju ta dɩmʋŋ asadi adiya di ŋii tie e, akala takɩɛ saŋa gaa ga wɩɛ dieli na n kɔŋ ta fa maŋ ŋ.>> 9Gʋ wʋ tawɩ ŋina taŋ na, sɛ wʋ cha Galaliya.

10Ama gʋ wʋnabie baa laŋ asadi adiya di ŋii tie na, sɛ wʋŋ gba wʋ ju, ama wʋ wɩsɛ wʋ wʋsɛ, wʋ n lɩsɛ wʋ wʋsɛ ifuli i. 11Asadi adiya di ŋii tie na, Yudatina baa a tasɛ baa ja ɩ sɛ, <<Le sɛ baalɛ wina wɩɛ bɛ?>>

12Jama baa afʋlʋ baa fa dɔŋa lɩɩ wʋ dʋɔ. Barɛ sɛ, <<Wʋ yɩɛ wʋkpa bam.>> Sɛ barɛ dʋɔ sɛ, <<Aye, wʋ a pɩna bakpa bɛ.>>

13Ama wʋrʋ baa dɩlɛ tawɩ ŋɛ bakpa naŋ ŋ, akala takɩɛ baa se Yudatina baa.

Yesu kalaa asadi adiya di tie

14Gʋ ba di asadi adiya di ŋii gaa tala tɩtɩba na, Yesu ju Yudatina tʋm danɛ naŋ sɛ wʋ faara wʋ a kalaa. 15Sɛ dɩ yɩɛ Yudatina baa doba, sɛ ba tasɛ sɛ, <<Sɩnɛ sɛ baalɛ wina dɩlɛ jiŋ abʋrɩ fɔɩ yela wʋ n kpalɩɛna?>>

16Sɛ Yesu lɩsɛ nʋɔ sɛ, <<Ma kalaa ŋii n lɩɩ ma tɩŋtɩŋ ŋ, ama ŋɩ lɩɩ wʋŋ wʋ kpiri maŋ na jaŋ bɛ. 17Sɛ wʋŋ wʋ a ja sɛ wʋ a yɩɛ Ɩsʋɔ jawʋ na, wʋ a jiŋ gʋ ma kalaa ŋii lɩɩ Ɩsʋɔ jaŋ yaa maŋ tɩŋtɩŋ aaŋ tawɩ. 18Wʋŋ wʋ wɩɛ lɩɩ wʋ tɩŋtɩŋ wʋ jaŋ na, wʋ a yɩɛ dɩmʋŋ bɛ na wʋ a mʋ ja jilima fa wʋ wʋsɛ. Ama wʋŋ wʋ a ja wʋŋ wʋ kpiri ɩ jilima na, yɩɛ wʋkpa gasiŋteŋtɛ bɛ, sɛ akarɩɛ wɩɛ ŋarɛ taŋ wʋ tɩba a. 19Naa Mosesi n fa amɩɛ mbara ŋii? Ama amɩɛ tɩba wʋrʋ baa di ŋii dʋɔ ɔ. Be n yɩɛ sɛ ɩ ja maŋ ɩ kʋ?>>

20Sɛ jama baa tawɩ ɩ sɛ, <<Feliŋ sʋbʋ wɩɛ n tɩba. Mmʋɔ aaŋ ja nyaŋ wʋ a kʋ?>>

21Sɛ Yesu tawɩ ba sɛ, <<Ma yɩɛ adaŋgana gadʋŋdʋlʋŋ sɛ dɩ yɩɛ amɩɛ kpiniŋ doba. 22Mosesi fa amɩɛ mbara sɛ n karɩɛ amɩɛ baŋlɛ [ŋɩ yɩɛ gasiŋteŋ takɩɛ mbara ŋii n lɩɩ Mosesi jaŋ ŋ, ama ŋɩ yɩɛ amɩɛ duluŋ ayɩɛsa bɛ], ɩ kara wʋchaa baŋlɛ Fɩɛsɛ wɩɩ. 23Dɩtɩɛna sɛ ɩ dɩlɛ kara wʋchaa baŋlɛ Fɩɛsɛ wɩɩ yela ɩŋ warɩɛ Mosesi mbara ŋii na, be n yɩɛ sɛ ɩ kara biŋbira dʋ maŋ gʋ ma chɔ baalɛ sɛ wʋ wʋsɛ kpiniŋ yɩɛ kʋrʋkʋrʋ Fɩɛsɛ wɩɩ? 24N yela dɩpʋɛ fuu lɩɩna ŋii ɩ kɩɛ na dʋɔ, ama n di wɩɛ ŋɩ gbɩɛ dʋɔ.>>

Yesu n nyina Kirisito wʋŋ?

25Sɛ Yerusalem bakpa baa barɛ faara baa tasɛ sɛ, <<Naa dɩmʋŋ baalɛ wina sɛ baa ja ɩ baa kʋ? 26N kɩɛ wʋŋ n sɩmana bakpa naŋ wʋ a tawɩ yela baa tawɩ ɩ bʋrʋ ʋ. Bɩnɩɛ baa lɩɛ dʋ gasiŋteŋ gʋ wʋŋ n nyina Kirisito wʋŋ naa? 27Ama dɩ jiŋ diele gaa baalɛ wina lɩɩ, sɛ Kirisito wʋŋ kɔnɛ na, wʋrʋ baa jiŋ diele gaa wʋ lɩɩ ɩ.>>

28Gʋ Yesu saŋ wʋ a kalaa Ɩsʋɔ tʋm danɛ gaa naŋ na, wʋ kuusi tawɩ sɛ, <<Gasiŋteŋ ɩ jiŋ maŋ sɛ ɩ jiŋ diele gaa ma lɩɩ. Ma taŋ jɩna ma tɩŋtɩŋ dʋɔ ɔ, ama wʋŋ wʋ kpiri maŋ na yɩɛ gasiŋteŋ-tɛ bɛ. Ɩ ba jiŋ ɩ ɩ, 29ama ma jiŋ ɩ, akala takɩɛ ma lɩɩ wʋ jaŋ bɛ sɛ wʋŋ n kpiri maŋ.>>

30Dɩmʋŋ dʋɔ ba ja baa chaŋ ɩ, ama wʋrʋ n mʋ wʋ pam tapʋ ɩ ɩ, akala takɩɛ wʋ saŋa n talɛ ta a. 31Ama bakpa fɔɩ baa ba wɩɛ jama baa tɩba lɩɛ ɩ di. Sɛ ba tawɩ sɛ, <<Sɛ Kirisito wʋŋ kɔnɛ na, wʋ a yɩɛ adaŋgana daasɛ fɔɩ kii dɩmʋŋ baalɛ wina?>>

Ba kpiri kɩɛra baa sɛ ba n ga chaŋ Yesu

32Gʋ Farasitina baa nyii sɛ jama baa afʋlʋ ŋina lɩɩ Yesu dʋɔ na, sɛ sei bɩnɩɛ na Farasitina baa kpiri Ɩsʋɔ tʋm danɛ kɩɛra sɛ ba n ga chaŋ ɩ.

33Sɛ Yesu tawɩ sɛ, <<Ma wɩɛ amɩɛ jaŋ saŋa chonii bɛ, na maa bɔrɛ ju wʋŋ wʋ kpiri maŋ na jaŋ. 34Ɩ kɩɛ ja maŋ, ama ɩɩ na maŋ ŋ, sɛ diele gaa ma wɩɛ na, ɩɩ dɩlɛ kɔŋ dɩmaŋ ŋ.>>

35Sɛ Yudatina bɩnɩɛ baa tasɛ dɔŋa sɛ, <<Le sɛ dɩmʋŋ baalɛ wina aja wʋ a ju sɛ dɩ ɩɩ na ɩ? Wʋ a ju diele gaa daa bakpa baa ba cha puseŋ ga cha Girikitina tɩba yela baa kalaa ba naa? 36Sɩnɛ sɛ wʋ a kalaa gʋ wʋ a tawɩ sɛ ɩ kɩɛ ja maŋ, ama ɩɩ na maŋ ŋ, na diele gaa ma wɩɛ na ɩɩ dɩlɛ kɔŋ dɩmaŋ ŋ.>>

Lɩŋ ŋii ŋii fa nkpa

37Wɩɩ gaa ga yɩɛ dɩtamtɩŋ sɛ ga yɩɛ ga kpari asadi adiya di ŋii naŋ na, Yesu kʋlʋ sɩŋ sɛ wʋ kuusi na doŋ sɛ, <<Sɛ wʋŋ nyʋɔlɛ a kʋ ɩ na, n yela na wʋ a kɔŋ ma jaŋ gaa nyʋɔ lɩŋ. 38Sɛ wʋkʋma wʋŋ wʋ lɩɛ maŋ di na, lɩŋ ŋii ŋii fa nkpa na aja lɩɩ wʋ tɩba a lam takɩɛ buosɛ ganaŋkʋ Ɩsʋɔ Sabɩɛwɩɛ tawɩ na.>> 39Nafʋɔ Ɩsʋɔ Feliŋ ŋii baa ba lɩɛ ɩ di aja yu na dʋɔ wɩɛ sɛ Yesu a tawɩ. Ga tala dɩmʋŋ saŋa gana na, Ɩsʋɔ Feliŋ ŋii n kɔŋ ta a. Akala takɩɛ Yesu n jʋʋ ta jilima naŋ ŋ.

Bakpa baa kpara tɩba

40Gʋ jama baa nyii wɩɛ ŋii Yesu cha tawɩ na, ba tɩba barɛ tawɩ sɛ, <<Gasiŋteŋ, baalɛ wina yɩɛ Ɩsʋɔ Ɔja wʋŋ bɛ.>>

41Sɛ barɛ tawɩ sɛ, <<Wʋŋ n nyina Kirisito wʋŋ.>>

Sɛ barɛ dʋɔ tasɛ sɛ sɩnɛ sɛ Kirisito wʋŋ a dɩlɛ lɩɩ Galaliya?

42Naa Ɩsʋɔ Sabɩɛwɩɛ ŋii n tawɩ sɛ Kirisito wʋŋ aja lɩɩ Dawidi lʋŋtina2 naŋ, na wʋ a lɩɩ Betilehem dɩɛ naŋ, dɩɛ gaa Juo Dawidi chaɩ naa? 43Yesu dʋɔ, bakpa baa kpara tɩba. 44Bakpa barɛ aja baa chaŋ ɩ, ama wʋrʋ n mʋ wʋ pam tapʋ ɩ ɩ.

Yudatina bɩnɩɛ baa tana lɩɛdi i

45Dɩtamtɩŋ na, Ɩsʋɔ tʋm danɛ kɩɛra baa bɔrɛ ju Ɩsʋɔ sei bɩnɩɛ na Farasitina baa jaŋ. Sɛ ba tasɛ ba sɛ, <<Be n yɩɛ sɛ ɩŋ mʋ ɩ kɔŋ?>>

46Sɛ kɩɛra baa lɩsɛ nʋɔ sɛ, <<Wʋrʋ gba n tawɩ ta takɩɛ baalɛ wina a.>>

47Sɛ Farasitina baa tasɛ ba sɛ, <<Amɩɛ gba, ɩ tawɩ sɛ wʋ pɩna amɩɛ?>> 48<<Ɩ na gʋ dɩɛ naŋ bɩnɛ yaa Farasitina baa barɛ lɩɛ ɩ di? 49Aye! Ama jama baa ba ba jiŋ Mosesi mbara ŋii na, Ɩsʋɔ tawɩ ba nʋɔsɛ.>>

50Sɛ Nikodemosi wʋŋ wʋ fɩla ju Yesu jaŋ sɛ wʋ yɩɛ bɩnɩɛ baa tɩba wʋrʋ na, tasɛ sɛ, 51<<Daa mbara fa gbɩɛ sɛ dɩ n fu wʋrʋ dɩpʋɛ yela dɩ n chɩŋkpɩɛ nyii wʋ nʋɔnaŋ wɩɛ na dɩɩ jiŋ bʋrʋ gaa wʋ yɩɛ?>>

52Sɛ ba lɩsɛ ɩ nʋɔ sɛ, <<Nyaŋ gba nya lɩɩ Galaliya bɛ? Kɩɛ Ɩsʋɔ Sabɩɛwɩɛ ŋii naŋ na dieli na nyaa jiŋ gʋ Ɩsʋɔ Ɔja n lɩɩ Galaliya a.>>

53Sɛ ba wʋkʋma ju wʋ waa dʋɔ.3