Skip to content
BibleKenya

Chala New Testiment

Yohane 21

Yesu lɩsɛ wʋ wʋsɛ kalaa kpalɛnarɛ lɩkarɛ

Ŋina wʋrʋgbɩɛ na, Yesu ti bɔrɛ lɩsɛ wʋ wʋsɛ kalaa wʋ kpalɛnara baa Tiberiya ɔpʋ nʋɔ. N na sɛ ŋɩ tibi. Simoŋ Petero, Tomasi [wʋŋ baa yagɛ ɩ sɛ Dedimosi1] na Nataneli wʋŋ wʋ lɩɩ kana gaa ga wɩɛ Galaliya, na Sebedi bie bala baa, na kpalɛnara ba baŋbaŋ bala barɛ cha sila. Sɛ Simoŋ Petero tawɩ ba sɛ, <<Maa ju maa ga lɔ disawu chaŋ aji mɩnaŋ.>> Sɛ ba tawɩ ɩ sɛ, <<Daa na nyaŋ dɩɩ ju.>> Dɩmʋŋ dʋɔ ba lɩɩ ga jʋʋ buori gaa naŋ, ama dɩmʋŋ yuluma gana ba n chaŋ bʋrʋ ʋ.

Tɩɛna nafo na, Yesu sɩmɩɛɩ buo gaa nʋɔ, ama kpalɛnara baa n jiŋ sɛ wʋŋ bɛ ɛ.

Sɛ wʋ yagɛ ba tasɛ sɛ, <<Dɩɛtina, ɩŋ chaŋ aji?>>

Sɛ ba lɩsɛ ɩ nʋɔ sɛ, <<Aye.>>

Sɛ wʋ tawɩ ba sɛ, <<N lɔ amɩɛ disawu dʋ buori gaa jɩsaŋ dʋɔ ɩɩ yu aji barɛ.>> Gʋ ba yɩɛ dɩmʋŋ na, ba chaŋ aji fɔɩ, hali ba n dɩlɛ na baa fɔŋɩ disawu gaa dʋ buori gaa naŋ ŋ, aji fɔɩ baa ba cham na dʋɔ.

Sɛ kpalɛnarɛ wʋŋ Yesu a ja wʋ wɩɛ na, tawɩ Petero sɛ, <<Ŋɩ yɩɛ Kpaŋjuo Yesu bɛ.>> Gʋ Simoŋ Petero nyii gʋ wʋ tawɩ sɛ, <<Ŋɩ yɩɛ Kpaŋjuo Yesu na,>> Wʋ mʋ wʋ adugbe gagba pɔgʋ wʋ tɩŋa naŋ [akala takɩɛ wʋ fulu ga] sɛ wʋ puli jʋʋ lɩŋ ŋii naŋ. Sɛ kpalɛnara ba baŋbaŋ baa gba kpaŋ lɩɩ buori gaa naŋ baa fɔŋɩ disawu gaa aji su ga na, akala takɩɛ ba taŋ taŋasɛ na lɩŋ nʋɔ ɔ. Aja yɩɛ pam jalɩŋ gafie. Gʋ ba tala lɩŋ nʋɔ na, ba na nyɩŋkalasɛ a chaŋ bʋala dɩmaŋ yela diji wɩɛ ŋɩ dʋɔ na bodobodo ŋarɛ.

Sɛ Yesu tawɩ ba sɛ, <<N mʋ aji baa ɩ taŋ cham na barɛ kɔŋ.>>

Sɛ Simoŋ Petero jʋʋ buori gaa naŋ sɛ wʋ fɔŋɩ disawu gaa kɔŋ lɩŋ ŋii nʋɔ. Aji ba janɛ gafie na ŋɩlanasala na ba toro (153) n cha su ga. Hali gʋ aji baa bɔlɩɛɩ na, ama disawu gaa n chati i. Sɛ Yesu tawɩ ba sɛ, <<N kɔŋ gaa di nafo adiya.>> Sɛ kpalɛnara baa wʋrʋ n dɩlɛ tasɛ ɩ sɛ, <<Mmʋɔ n nyina nyaŋ ŋ?>> Ba jiŋ gʋ Kpaŋjuo wʋŋ bɛ. Sɛ Yesu kɔŋ gaa mʋ bodobodo gaa fa ba, dɩmʋŋ sɛ wʋ yɩɛ aji baa gba. Dɩtɩɛna ŋina n nyina butoro-tɛ gʋ Yesu lɩsɛ wʋ wʋsɛ kalaa wʋ kpalɛnara gʋ wʋ feŋ lɩɩ sɩŋ naŋ wʋrʋgbɩɛ na.

Yesu na Petero

Gʋ ba di taŋ na, Yesu tasɛ Simoŋ Petero sɛ, <<Yohane bu Simoŋ, nyaa ja ma wɩɛ gasiŋteŋ kii bana?>>

Sɛ Simoŋ lɩsɛ ɩ nʋɔ sɛ, <<Ɛɛŋ, Kpaŋjuo, n jiŋ gʋ maa ja n wɩɛ.>>

Sɛ Yesu tawɩ ɩ sɛ, <<Fa ma feŋ bie adiya.>>

Sɛ Yesu ti bɔrɛ tasɛ ɩ sɛ, <<Yohane bu Simoŋ, nyaa ja ma wɩɛ gasiŋteŋ?>>

Sɛ wʋ lɩsɛ ɩ nʋɔ sɛ, <<Ɛɛŋ, Kpaŋjuo, n jiŋ gʋ maa ja n wɩɛ.>>

Sɛ Yesu tawɩ sɛ, <<Kɩɛ ma feŋ dʋɔ.>>

Sɛ Yesu ti tasɛ ɩ butoro-tɛ sɛ, <<Yohane bu Simoŋ, nyaa ja ma wɩɛ?>>

Sɛ Petero bɔtaa akala takɩɛ Yesu tasɛ ɩ gbɩɛta butoro sɛ, <<Nyaa ja ma wɩɛ?>> Sɛ Petero tawɩ sɛ, <<Kpaŋjuo, n jiŋ bʋrʋkʋma, n tɩŋtɩŋ n jiŋ gʋ maa ja n wɩɛ.>>

Sɛ Yesu tawɩ ɩ sɛ, <<Fa ma feŋ adiya.>>

Maa tawɩ sɛ nyii na dieli sɛ, gʋ nya yɩɛ yeleŋbu na, n tɩŋtɩŋ aaŋ fu nya abʋrɩ, na nyaa ju diele gaa nyaa jawʋ, ama gʋ nya ŋmɛ na, nyaa tɩɛŋɩ n pamɩɛ, na wʋrʋ a fu nyaŋ na wʋ a pala nya asanaŋ ju diele gaa nyaa ja sɛ nyaa ju u. Yesu tawɩ ŋina bɛ na wʋ a mʋ kalaa sɩŋ duluuŋ gaa Petero aja wʋ a sɩŋ na gaa mʋ jilima kɔna Ɩsʋɔ. Sɛ wʋ tawɩ ɩ sɛ, <<Kpaŋ maŋ!>>

Petero biliŋi na gʋ kpalɛnara wʋŋ Yesu a ja wʋ wɩɛ na kpamɩna ba. [Wina n nyina wʋŋ wʋ chaɩ wʋ telai Yesu saŋa gaa baa di yuluma adiya na, sɛ wʋ tawɩ sɛ, <<Kpaŋjuo, Mmʋɔ aaŋ ja wʋ a lɩsɛ nyaŋ fa?>>] Gʋ Petero na ɩ na, wʋ tasɛ Yesu sɛ, <<Kpaŋjuo, sɛ wʋŋ de?>>

Sɛ Yesu lɩsɛ ɩ nʋɔ sɛ, <<Sɛ maa ja sɛ wʋ n cha nkpa naŋ ga tala saŋa gaa maa bɔrɛ kɔŋ na, ŋɩ tiri nyaŋ sɛ be? Nyaŋ bɩrɛ kpaŋ maŋ.>> Ŋina dʋɔ, wɩɛ ŋii puseŋ jʋʋ lɩɛdɩra baa tɩba takɩɛ kpalɛnarɛ wina baa sɩŋ ŋ. Ama Yesu n tawɩ sɛ wʋ a sɩŋ ŋ, wʋ tawɩ bɛ sɛ, <<Sɛ maa ja wʋ a cha nkpa naŋ ga tala saŋa gaa maa bɔrɛ kɔŋ na, ŋɩ tiri nyaŋ sɛ be?>>

Kpalɛnarɛ wina n di wɩɛ ŋina dʋɔ seriya, sɛ wʋ sabɩɛ ŋɛ si. Sɛ dɩ jiŋ gʋ wʋ seriya yɩɛ gasiŋteŋ.

Yesu yɩɛ abʋrɩ fɔɩ ŋarɛ kpi. Nafʋɔ ba sabɩɛ ŋɩ ga kʋma si na, maa fa nfɩɛrɛ sɛ dulunya kpiniŋ baa yu danɛ fa tanɩɛ ŋii baa sabɩɛ na a.

Source notes (1)
  1. Footnote Giriki dɩtawɩ naŋ na Dedimosi yɩɛ Ata

Chala New Testiment. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.