Biblica® Open Ang Pulong sa Dios
Mga Salmo 99
Naghari ang Ginoo ug naglingkod siya sa iyang trono
taliwala sa mga kerubin.
Busa nangurog ang mga tawo
ug natay-og ang kalibotan.
Gamhanan ang Ginoo sa Zion1;
naggahom siya sa tanang katawhan.
Modayeg ang mga tawo kaniya tungod kay gamhanan
ug katingalahan siya.
Balaan siya!
Gamhanan siya nga Hari, ug nahigugma siya sa katarong.
Wala siyay pinalabi sa iyang paghukom,
ug gihimo niya ang matarong ug husto sa Israel2.
Dayega ang Ginoo nga atong Dios.
Simbaha siya sa iyang trono3.
Balaan siya!
Si Moises ug si Aaron ang duha sa iyang mga pari,
ug si Samuel ang usa sa mga nag-ampo ngadto kaniya.
Mitawag sila kaniya ug gitubag niya sila.
Nakigsulti siya kanila gikan sa panganod nga daw haligi;
gituman nila ang mga pagtulon-an
ug mga tulomanon nga gihatag niya kanila.
Ginoo nga among Dios, gitubag mo ang mga pag-ampo sa imong katawhan4.
Gipakita mo kanila nga mapinasayloon ka nga Dios
bisan gisilotan mo sila tungod sa ilang mga sala.
Dayega ang Ginoo nga atong Dios.
Simbaha siya sa iyang balaang bungtod,
kay balaan ang Ginoo nga atong Dios.
Source notes (4)
- Footnote Zion : mao usab ang Jerusalem.
- Footnote Israel : sa Hebreo, Jacob.
- Footnote trono : sa literal, tungtonganan sa iyang tiil.
- Footnote sa imong katawhan : sa Hebreo, nila. Mahimong mao sila si Moises, Aaron, ug Samuel sa bersikulo 6.
Biblica® Open Ang Pulong sa Dios. Copyright © 2009,2010,2014,2024 Biblica, Inc. Licensed under CC BY-SA 4.0. Trademark Statement “Biblica” narehistro kini nga tatak sa United States Patent ug Trademark Office sa Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.