Biblica® Open Ang Pulong sa Dios
Mga Salmo 82
Ang awit ni Asaf.
Gipangulohan sa Dios ang panagtigom sa mga pangulo;1
ug gihukman niya sila.
Miingon siya,
“Hangtod kanus-a kamo mohukom nga dili matarong?
Hangtod kanus-a kamo modapig sa mga daotan?
Hatagi ninyo ug hustisya ang mga timawa ug mga ilo.
Labani ninyo ang katungod sa mga kabos
ug mga dinaog-daog.
Luwasa ang mga kabos ug timawa
gikan sa gahom sa mga tawong daotan.
“Wala silay nahibaloan.
Dili sila makasabot.
Daw nagkinabuhi sila sa kangitngit,
ug walay kalig-onan ang ilang kinabuhi.2
“Nakaingon na ako kaninyo, ‘Mga dios kamo;
tanan kamo mga anak sa Labing Halangdong Dios.
Apan mamatay gihapon kamo isip nga tawo.
Matapos ang inyong kinabuhi
sama sa tanang mga pangulo.’ ”
Sige na, O Dios,
hukmi ang tanang mga katawhan sa kalibotan,
kay imo sila.
Source notes (2)
- Footnote mga pangulo : mahimong mga pangulo nga makagagahom, o mga dios sa mga nasod, o langitnong mga binuhat.
- Footnote walay kalig-onan ang ilang kinabuhi : sa literal, nagtay-og ang tanang pundasyon sa kalibotan.
Biblica® Open Ang Pulong sa Dios. Copyright © 2009,2010,2014,2024 Biblica, Inc. Licensed under CC BY-SA 4.0. Trademark Statement “Biblica” narehistro kini nga tatak sa United States Patent ug Trademark Office sa Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.