Biblica® Open Ang Pulong sa Dios
Mga Salmo 137
Nanglingkod kami sa daplin sa mga suba sa Babilonia
ug nanghilak sa dihang nahinumdom kami sa Zion1.
Gipangsang-at namo ang among mga harpa sa mga sanga sa mga kahoy didto.
Kay gipaawit kami sa mga mibihag kanamo.
Gisugo nila kami sa paglingaw kanila.
Miingon sila, “Awiti ninyo kami ug awit mahitungod sa Zion!”
Unsaon namo pag-awit ug mga awit nga alang sa Ginoo
sa yuta sa mga mibihag kanamo?
Hinaut pa nga dili na makalihok
ang akong tuong kamot kon kalimtan ka nako, Jerusalem!
Hinaut pa nga dili na ako makaawit pag-usab2
kon dili ko hinumdoman
ug isipon nga akong dakong kalipay ang Jerusalem.
Hinumdomi, Ginoo, ang gihimo sa mga Edomihanon
sa dihang giilog sa Babilonia ang Jerusalem.
Miingon sila, “Gub-a ninyo kana sa hingpit.”
Kamong mga lumulupyo sa Babilonia,
laglagon kamo!
Bulahan ang mga tawo nga molaglag kaninyo
sama sa inyong gihimong paglaglag kanamo.
Bulahan silang mokuha sa inyong mga gagmayng kabataan
ug molambos kanila sa bato.
Source notes (2)
- Footnote Zion : mao usab ang Jerusalem.
- Footnote makaawit pag-usab : sa literal, mopilit ang akong dila sa akong alingagngag.
Biblica® Open Ang Pulong sa Dios. Copyright © 2009,2010,2014,2024 Biblica, Inc. Licensed under CC BY-SA 4.0. Trademark Statement “Biblica” narehistro kini nga tatak sa United States Patent ug Trademark Office sa Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.