Biblica® Open Ang Pulong sa Dios
Mga Salmo 113
Dayega ang Ginoo!
Kamong mga katawhan sa Ginoo nga iyang mga alagad, dayega ninyo siya!
Hinaut nga dayegon siya karon ug hangtod sa kahangtoran.
Gikan sa sidlakan hangtod sa kasadpan1
ang tanang mga tawo angayng modayeg sa Ginoo.
Naghari ang Ginoo sa tanang nasod,
ang iyang pagkagamhanan dili matupngan.
Wala gayoy sama sa Ginoo nga atong Dios
nga naglingkod sa iyang trono didto sa kahitas-an.
Moduko siya sa pagtan-aw2
sa kalangitan ug sa kalibotan.
Gihaw-as niya ang mga kabos ug timawa sa ilang kalisod.
Gipasidunggan niya sila uban sa dungganong mga tawo sa iyang katawhan.
Gilipay niya ang panimalay sa baog nga babaye
pinaagi sa paghatag kaniya ug mga anak.
Dayega ang Ginoo!
Source notes (2)
- Footnote Gikan sa sidlakan hangtod sa kasadpan : o Gikan sa pagsubang sa adlaw hangtod sa pagsalop niini.
- Footnote Tingali mas taas pa ang iyang nahimutangan kay sa kalangitan, ug kay nabalaka siya sa iyang mga binuhat.
Biblica® Open Ang Pulong sa Dios. Copyright © 2009,2010,2014,2024 Biblica, Inc. Licensed under CC BY-SA 4.0. Trademark Statement “Biblica” narehistro kini nga tatak sa United States Patent ug Trademark Office sa Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.