Isaias 50

Ang Sala sa Israel ug ang Pagsunod sa Alagad

1Miingon ang Ginoo,

“Gisalikway ko ba ang Jerusalem1

sama sa usa ka bana nga mibulag sa iyang asawa?

Pamatud-i ninyo!2

Gibaligya ko ba kamo ingon nga ulipon

ngadto sa akong giutangan isip bayad?

Gibihag kamo tungod sa inyong mga sala.

Gisalikway ang Jerusalem

tungod sa inyong mga kalapasan.

2Nganong wala man kamo sa akong pag-abot?

Nganong wala may mitubag sa akong pagpanawag?

Dili ba ako makahimo pagluwas kaninyo?

Mahimo ko ganing pamad-an ang dagat sa usa lang ka pagmando

ug himuon nga disyerto ang mga suba,

nga mahimong hinungdan sa pagkamatay sa mga isda!

3Mahimo ko usab nga pangitngiton ang kalangitan

sama kaitom sa bisting isul-ob sa pagbangotan.”

Ang Matinumanon nga Alagad sa Dios

4Gitudloan ako sa Ginoong Dios kon unsa ang akong isulti

aron madasig ko ang gipangkapoy.

Pukawon niya ako matag buntag

sa pagpamati sa iyang itudlo kanako.

5Nagsulti ang Ginoong Dios kanako ug namati ako.

Wala ako mosupak ni magpahilayo kaniya.

6Gitahan ko ang akong likod ngadto sa mga nagbunal kanako,

ug ang akong nawong ngadto sa nangibot sa akong bangas.

Wala ako molikay sa ilang pagpakaulaw kanako

ug pagluwa sa akong nawong.

7Apan wala ako mobati ug kaulaw kay gitabangan ako sa Ginoong Dios.

Busa nagmalig-on ako sama sa bato nga bantilis

kay nasayod ako nga dili ako maulawan.

8Ania duol kanako ang Dios nga nagpadayag nga inosente ako.

Kinsay nag-akusar kanako? Mag-atubang kami!

9Pamati! Ang Ginoong Dios mao ang nagtabang kanako.

Kinsa ang makapamatuod nga nakasala ako?

Magabok sila sama sa panapton.

Kutkoton sila sa mga gagmayng mananap.

10Kinsa kaninyo ang nagtahod sa Ginoo

ug nagtuman sa gitudlo sa iyang alagad?

Angay siyang mosalig sa Ginoo nga iyang Dios

bisan naglakaw siya sa kangitngit ug wala gayoy kahayag.

11Apan pagbantay kamong nagplano sa paglaglag sa uban;

maunay kamo sa inyong kaugalingong plano!

Ang Ginoo mismo mao ang mosilot kaninyo;

mangamatay kamo sa hilabihan nga pagsilot.