Amos 1

1Mao kini ang mensahe ni Amos, nga usa ka magbalantay sa mga karnero nga taga-Tekoa, mahitungod sa Israel. Gipadayag kini kaniya sa Dios duha ka tuig sa wala pa mahitabo ang linog, ug sa panahon nga si Uzias mao ang hari sa Juda ug si Jeroboam nga anak ni Joas mao ang hari sa Israel.

2Miingon siya,

“Nagdahunog ang tingog sa Ginoo gikan sa Zion;1

naglanog kini gikan sa Jerusalem.

Ug tungod niini nangalaya ang mga sagbot sa sibsiban

sa mga magbalantay sa mga karnero

apil ang mga tanom sa ibabaw sa Bukid sa Carmel.”

Ang Silot alang sa Nasod sa Siria

3Mao kini ang gisulti sa Ginoo bahin sa Siria:

“Tungod sa padayon nga pagpakasala

sa mga taga-Damasco,2 silotan ko gayod sila.

Gipasipad-an nila pag-ayo3 ang mga taga-Gilead,

4busa sunogon ko ang palasyo ni Haring Hazael

ug ang lig-ong mga bahin niini nga gipahimo sa iyang anak nga si Ben Hadad.

5Gub-on ko ang pultahan sa Damasco

ug laglagon ko ang hari sa Walog sa Aven

ug ang hari sa Bet Eden.4

Bihagon ngadto sa Kir ang mga katawhan sa Siria.5

Ako, ang Ginoo, ang nag-ingon niini.”

Ang Silot alang sa Nasod sa Filistia

6Mao kini ang gisulti sa Ginoo bahin sa Filistia:

“Tungod sa padayon nga pagpakasala sa mga taga-Gaza,6 silotan ko gayod sila.

Gibihag nila ang tanang mga tawo sa mga lungsod

ug gibaligya isip mga ulipon sa Edom,

7busa sunogon ko ang mga paril7 sa Gaza

apil ang lig-ong mga bahin niini.

8Laglagon ko ang hari sa Ashdod ug ang hari sa Ashkelon,

ug silotan ko ang mga taga-Ekron.8

Ang mga Filistihanon nga mabilin mangamatay usab.

Ako, ang Ginoong Dios, ang nag-ingon niini.”

Ang Silot alang sa Nasod sa Tiro

9Mao kini ang gisulti sa Ginoo bahin sa Tiro:

“Tungod sa padayon nga pagpakasala sa mga taga-Tiro,

silotan ko gayod sila.

Gibaligya nila isip mga ulipon sa Edom

ang tanang mga tawo sa mga lungsod,

ug wala nila tumana ang ilang kasabotan

uban niining mga tawhana ingon nga managhigala.

10Busa sunogon ko ang mga paril sa Tiro

apil ang lig-ong mga bahin niini.”

Ang Silot alang sa Nasod sa Edom

11Mao kini ang gisulti sa Ginoo bahin sa Edom:

“Tungod sa padayon nga pagpakasala

sa mga taga-Edom, silotan ko gayod sila.

Gipanggukod nila ang ilang mga kadugo nga Israelinhon

ug gipangpatay, ug wala nila kini kaloy-i.

Dili gayod mawala ang ilang kasuko sa mga Israelinhon.

12Busa sunogon ko ang Teman

apil ang lig-ong mga bahin sa Bozra.9”

Ang Silot alang sa Nasod sa Ammon

13Mao kini ang gisulti sa Ginoo bahin sa Amon:

“Tungod sa padayon nga pagpakasala

sa mga taga-Amon, silotan ko gayod sila.

Gipanglaplapan nila ang tiyan sa mga babayeng mabdos

sa Gilead aron lang maangkon kining yutaa.

14Busa sunogon ko ang mga paril sa Raba10

apil ang lig-ong mga bahin niini.

Madungog ang pagsinggit sa ilang mga kaaway

nga nagsulong kanila nga daw naghaguros nga bagyo.

15Bihagon ang hari sa Ammon

apil ang iyang mga opisyal.

Ako, ang Ginoo, ang nag-ingon niini.”