1 Thimothi 3

Charch pha dumuiithek

1Hì ne izai yao ro: hò-aphuii ne charch pha dumuii rek yang arone ai ne wie blia shii chid ro 21 Charch pha dumuii ne ichiig oi pha um chid; ai ne yiy jia um bie chid,2 ai ne ichiig pha, zud ne; ikhiing re-è rek ne ai ne awai hò shii awaithek bran shii wieho chid; ai ne yua mua chid; 3ai ne phuii aniing pha chiih-è buii bran asi pha, jishii jum nane liijiing um chid; ai ne bang shii de amiie chid; 4ai ne awai haliing shii de wie gayiig mua chid chiih-è awai aniphiing shii de zab pha lumuii shii awai shii nuii yi chid. 5Hò-aphuii yi awai haliing shii isiie rek pha athieg arone, nyie khi-è-rek ne Hamangkhung-aphuii ro charch shii gayiig mua magey phlei? 6Ai ne migi shii de weg um chid, ji è ai ne nyigodog shii aphieng pha chiih-è Sakhathong duiine athe rabo. 7Ai ne charch è fuangpha bran è de ilab rek pha hò-aphuii um chid, ji è ai ne ìu arey pha chiih-è Sakhathong ibong shii aphang ruii phro.

Charch pha nongphothek

8Charch pha nongphothek ne ziig chiih-è isiie ne wie um chid; ithek ne phuii de aniing chiih-è bang de asgow chid; 9ithek ne isang lubu munow rog shii migi re-è zai dong pha ji shii chuh re-è kho chid. 10Ithek shii ne igobi chai chid, chiih-è chiihphado, chai pha ji re-è hiìa ge arone, ithek ne blia rek chid. 11Ithek ro yiythek3 de wie ziig nane amshiiy-alawoi pha um chid; ithek ne zab shii athiigpha nane isiie um chid. 12Charch pha nongphothek ne yiy jia um bie chid,4 chiih-è awai aniphiing nane awai haliing shii wie re-è gayiig rek mua chid. 13Nongphothek hanyie è awaithek blia shii wie rek ne awaithek shii wie ithua mua ge, chiih-è awaithek ro migi Masi Isu shii um pha chiang shii lububo è yao mua ro.

Bajobo ug pha ji

14Gu è na shii hì pha jigi zey pha duiine, gu ne khthiie wuii ne riig pha luthong ro. 15Jishii gu chiadun arone, isieng Hamangkhung-aphuii pha charch, ji ne izai pha sarong nongpho ro Hamangkhung-aphuii ro hò shii ne nyie khi-è-rek ne gethek chung ziig rek rai pha ji hì pha jigi è ìd ruii. 16Khama Bajobo pha ug nane gethek ro giang shii ne hanyie jia de asnai mua phro:

ai ne tharohthamang rey ne dong khlei,

Ragung re-è rangsua rone doh yie,5

chiih-è khliiethek è aishii doh.

Ai chiang shii ne soh duchoi shii yua,

Zab pha sohjambling è aishii migi rek,

chiih-è aishii ne hamangkhung hà noh dun.