জৗঙৗ জাইয়া বৗলৗগ্রা, গৗহৗ গৈয়িফৗরনি দায়খৌ সহায় হৗনাগৌ আরৗ জৗঙৗ গাওছৗরখৌ খুশি খৗলামনৗ অৗঙা। জৗং সাফ্রৗমনিবৗ উচিৎ জৗংনি পাড়াফুরসিখৌ মৗজাংনি থাখৈ খুশি খৗলামনৗ আরৗ বিছৗরখৌ লুখাংনৗ। মানৗনা খ্রীষ্টআবৗ গাওখৌ খুশি খৗলামাখৈ, নাথায় জেরৈহায় লিৎনায় দং, “জাইফ্রা নৗংখৌ অপমান খৗলামৗ বিছৗরনি অপমাননা আংনি ছায়াও গৗগ্লাইবায়1।” মানৗনা মৗনফ্রৗমবৗ জেয়া সিগাঙাও লিৎনায় জাদৗংমৗন, শাস্ত্রয়া জৗংখৌ সহায়নৗ ফৗরৗঙৗ আরৗ বেফৗরৗ জৗংখৌ উৎসাহ হৗয়ৗ, বেনি গেজেরজৗং আশা খৗলামনৗ হায়ৗ।
ঈশ্বৗরা, জাইয়া সহায়নায় আরৗ উৎসাহ হৗয়ৗ, নৗংছৗরনি গেজেরাও একই সান্নৗ গৗহৗ হৗথৗং জেয়া যীশু খ্রীষ্টনিয়াও দংমৗন। জাহাথে নৗংছৗরৗ মৗনছে গৗসৗ আরৗ মৗনছে গারাংজৗং জৗংনি ফৗরবু যীশু খ্রীষ্টনি ঈশ্বৗর আরৗ বিফাখৌ মহিমাম্বিত খৗলামনৗ হায়ৗ।
ঈশ্বৗরখৌ বাখ্নাইনৗ থাখৈ খ্রীষ্টআ জেরৈ নৗংছৗরখৌ নাজাওবায়, বেবাদিনৗ সাছেয়া সাছেজৗং নাজাওজ্লায়। মানৗনা আঙৗ নৗংছৗরখৌ বুঙৗ যে, খ্রীষ্টআ ঈশ্বৗরনি নংথারগৌ জানানৈ যিহূদীফৗরনি দাস জাদৗং আরৗ দিন্ঠিনায়নি জুনৈ যে ফোলেরনি গুদি মানসিফৗরনিয়াও সিমান লানায়ফ্রা নংথারগৌ। আরৗ বেনি অনগায়ৈবৗ যে গুবুনহারিফ্রা বিনি দয়ানি থাখৈ ঈশ্বৗরখৌ মহিমান্বিত খৗলামনৗ হায়ৗ। জেরৈবাদি লিৎনায় দং:
“বিনিখাইনৗ আঙৗ, গুবুনহারিফৗরনি গেজেরাও নৗংখৌ বাখ্নাইনায়। আঙৗ নৗংনি নামৈ বাখ্নাইনায়নি মেথায় খননায়2”। আরবাও বেয়ৗ বুঙৗ, “এই গুবুনহারিফৗর, রংজা, বিনি মানসিফৗরজৗং রংজাফা3।” আরৗ আরবাও, “গাছেন গুবুনহারিফৗর, ফৗরবুখৌ বাখ্নায়, আরৗ গাছেন মানসিফৗর বিখৌ 4বাখ্নায়।” আরৗ আরবাও, যিশাইয় নবিআ বুংবায়, “যিশয়েনি বংশয়া জিখাংনায়, জাইয়া জাতিফৗরনি ছায়াও শাসন খৗলামনৗ থাখৈ জিখাংনায়; গুবুনহারিফ্রা বিনি ছায়াও আশা খৗলামনায়5।” আশানি ঈশ্বৗররা নৗংছৗরনি ফৗথাইনায়জৗং গাছেনবৗ রংজানায় আরৗ শান্তিয়াও ফুরা খৗলামথৗং, জাহাথে নৗংছৗরনৗ গৗথার জিউনি বৗলৗজৗং আশায়াও লৗমসাওনানৈ বৗহৈলাংথৗং।
পৌলআ গুবুনহারিফৗরনি মন্ত্রি
আংনি ফংবায় আরৗ বিনানাওফৗর, আঙৗ গাওনৗ ফৗথায়নানৈ, যে নৗংছৗরৗ গাওছৗরনৗ ফুরায়ৈ মৗজাং, জ্ঞানাও পরিপূর্ণ আরৗ গাওজৗং গাও ফৗরৗংনৗ উপযুক্ত জা। অব্লাবৗ আঙৗ নৗংখৌ ইছে বিষয়ৈ সাহসজৗং লৗগৗছে লিৎবায়, জাহাথে বেফৗরৗ নৗংখৌ আরবাওনৗ গৗসৗখাংহৗনৗ হায়ৗ, মানৗনা ঈশ্বৗরা আংনৗ অনুগ্রহখৌ হৗবায়, গুবুনহারিফৗরনি থাখৈ যীশু খ্রীষ্টনি সাছে সেবাকারি জানৗ। বিয়ৗ আংখৌ ঈশ্বৗরনি মৗজাং খবরখৌ প্রচার খৗলামনৗ যাজকনি বিবানখৌ হৗবায়, জাহাথে গুবুনহারিফ্রা গৗথার জিউনি গেজেরজৗং গৗথার জানানৈ ঈশ্বৗরনি গেজেরজৗং নাজাওথাও থাও জানৗ হায়ৗ। বিনিখাইনৗ আঙৗ ঈশ্বৗরনি সেবায়াও যীশু খ্রীষ্টখৌ মহিমা খৗলামৗ। খ্রীষ্টআ গুবুনহারিফৗরখৌ ঈশ্বৗর মানিগ্রা খৗলামনৗ আংনি গেজেরজৗং যে ফুরা খৗলামবায় বেখৌ নাগারনান আঙৗ জেবৗ বুংনৗ সাহস খৗলামনায় অৗঙা, জাইনি গেজেরজৗং আং বুংবায় আরৗ মাওবায়। চিহ্ন আরৗ বৗথিয়াগৗনাং বৗলৗনি গেজেরজৗং, ঈশ্বৗরনি গৗথার জিউনি বৗলৗনি গেজেরজৗং। বিনিখাইনৗ যিরূশালেমনি ফ্রায় ইল্লুরিকা সিম আঙৗ ফুরায়ৈ খ্রীষ্টনি মৗজাং খবর প্রচার খৗলামবায়। আংনি জেব্লাইবৗনি ইচ্ছায়া বেনৗ, যে জায়গাও খ্রীষ্টখৌ মিথিজায়াখৈ বেহা মৗজাং খবরখৌ প্রচার খৗলামনৗ, জাহাথে আঙৗ গুবুন ছৗরনিবা ভিঠানি ছায়াও লুখাংজায়া বাদি। বরং, জেরৈ লিৎনায় দং, “জাইফৗরখৌ বিনি বিষয়ৈ বুঙা জায়াখৈমৗন বিছৗরৗ নুনৗ মৗননায় আরৗ জাইফ্রা খৗনায়াখৈমৗন বিছৗরৗ বুজিনায়6।” বিনিখাইনৗ নৗংছৗরনিয়াও ফৈনৗ আংখৌ হেংঠা হৗনায় জাদৗং7।
পৌলনি রোময়াও থাংনায়নি পরিকল্পনা
নাথায় দা বে হাদৎনাও আংহা খামানি মাওনৗ যেহেতু মৗংবৗ জায়গা গৈলে, বিনিখাইনৗ আঙৗ গৗবাং বৗছৗরনিফ্রায় নৗংছৗরখৌ নায়নৗ বিরাঠ গৗসৗ জাদৗং। আং স্পেনাও থাংনায় সমাও বেখৌ মাওনৗ সানদৗং। আঙৗ ইছে সমনি থাখৈ নৗংনি লৗগৗফৗরজৗং রংজাফানায়নি উনাও, বিজৗং থাংনায় সমাও নৗংজৗং নায়নৗ আরৗ বিহা আংনি যাত্রাও নৗঙৗ আংখৌ হেফাজাব হৗনৗ আশা খৗলামৗ। দা, জেখিয়া জায়ামানৗ, আঙৗ যিরূশালেমাও থাংদৗংছৈ বিহানি ফৗরবুনি মানসিফৗরনি সেবাও। মানৗনা যিরূশালেমনি গৈজায়ি ফৗরবুনি মানসিফৗরনৗ থাখৈ ম্যাসিডোনিয়া আরৗ আখায়ানি বিশ্বাসিফ্রা দান খাংনৗ খুশি জাদৗং। বিছৗরৗ বিহা বেখৌ মাওনৗ খুশি মৗন, আরৗ থারৈনৗ বিছৗরৗ বিছৗরনিয়াও ঋণী। মানৗনা ঈশ্বৗরা যে আত্মিক মৗজাং জিনিসফৗরখৌ যিহূদীফৗরনৗ হৗয়ামৗন বেফৗরজৗং গুবুনহারিফ্রা ভাগিদার জাফাদৗং, অব্লা বিছৗরৗ যিহূদীফৗরনিয়াও ঋণী, যে ঈশ্বৗরা বিছৗরনৗ হৗনায় মৗদৗমনি মৗজাং জিনিসফৗরখৌ ভাগা রান্নানৈ লানৗ8। বেনিখাইনৗ আঙৗ বে খামানিখৌ ফুরা খৗলামনায়নি উনাও আরৗ নংথারগৌ যে বিছৗরৗ বে দান খাংনায়ফৗরখৌ নাজাওদৗং, আঙৗ স্পেনাও থাংনায় আরৗ লামায়াও নৗংজৗং লৗগৗ লানায়। আঙৗ মিথিগৌ যে আঙৗ জেব্লা নৗংনিয়াও ফৈনায়, অব্লা আঙৗ খ্রীষ্টনি আশীর্বাদনি ফুরা হিসাবমৈ ফৈনায়।
ফংবায় আরৗ বিনানাওফৗর, জৗংনি ফৗরবু যীশু খ্রীষ্টনি গেজেরজৗং আরৗ জিউনি অননায়নি গেজেরজৗং আঙৗ নৗংছৗরখৌ খাওলাইয়ৗ, আংনি থাখৈ ঈশ্বৗরনিয়াও প্রার্থনা খৗলামনানৈ আংনি সংগ্রামাও আংজৗং যোগ জাফাদৗ। প্রার্থনা খৗলাম জেন আঙৗ যিহূদিয়াও অবিশ্বাসীফৗরনিফ্রায় বাছাইনান থায়ৗ আরৗ বি দান খাংনায়ফৗরখৌ মৗননৗ আরৗ যিরূশালেমাও ফৗরবুনি মানসিফৗরা নাজাওজায়ৗ, জাহাথে ঈশ্বৗরনি ইচ্ছায়াও আঙৗ রংজানায়জৗং নৗংছৗরনিয়াও ফৈনৗ হানায় আরৗ নৗংছৗরজৗং লৗগৗয়াও টাটকা জানৗ হায়ৗ। শান্তিনি ঈশ্বৗরা নৗংছৗর বয়জৗংবৗ লৗগৗছে থাথৗং। আমেন।
Source notes (8)
- Cross-reference গীতফৗর 69:9
- Cross-reference 2 সামুয়েল 22:50; গীতফৗর 18:49
- Cross-reference হূদা বিজাব 32:43
- Cross-reference গীতফৗর 117:1
- Cross-reference যিশাইয় 11:10
- Cross-reference যিশাইয় 52:15
- Cross-reference রোমীয় 1:13
- Cross-reference 2 করিন্থীয় 9:1–13
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.