ইব্রীয় 7

মল্কীষেদক যাজক

1মল্কীষেদকআ, জাইয়া শালেমনি রাজা মৗন আরৗ জৌসিন ঈশ্বৗরনি যাজক মৗন। রাজাফৗরখৌ ফেজেন্নানৈ ফৈফিননায়নি সমাও বিয়ৗ অব্রাহামখৌ লৗগৗলাদৗং আরৗ বিখৌ বৗর হৗদৗং1। 2আরৗ অব্রাহামা গাছৈ মৗঙাফৗরনি দশমাংশ2 বিনৗ হৗদৗং। সিগাঙাও মল্কীষেদকনি অৗংথিয়া জাবায় “ধৗরৗমনি রাজা”; বিনি উনাও, “শালেমনি রাজা” অৗংথিয়া “শান্তিনি রাজা।” 3বিমা-বিফা গৈয়ামাৎনিন, জাতি বংশ গৈয়ামাৎনিন, দিননি জাগায়জেননায় গৈয়ামাৎনিন কিন্বা গৗঠাংনি জৗবনায়, ঈশ্বৗরনি বিসাজ্লা বাদি, বিয়ৗ জেব্লাইবৗনি থাখৈ যাজক থাবায়3।

4সান্নানৈ নাই বিয়ৗ বেছে গেদেৎ মৗন, এমন কি বিফা গুডৈনি অব্রাহামা লুঠিনায়নিফ্রায় দশমাংশখৌ বিনৗ হৗদৗংমৗন। 5দা আইননাও লেবীনি জৗলৈফৗরনিফ্রায় জাইফ্রা যাজক জাবায় বিছৗরৗ ইস্রায়েলফৗরনি বিলৗগৗ মানসিফৗরনিফ্রায়বৗ দশমাংশ সংগ্রহ খৗলামৗ, যদিও বিছৗরবৗ অব্রাহামনি জৗলৈফৗর4। 6বে মল্কীষেদকআ, লেবী বংশনি মানসি অৗঙা, নাথায় বিয়ৗ অব্রাহামনিফ্রায়বৗ দশমাংশ ভাগখৌ লাদৗং, আরৗ জাইখৌ ঈশ্বৗরা জবান হৗবায়, বিয়ৗ বৗর হৗদৗং। 7আরৗ গৗনৗ গৗথৗ খৗলামামাৎনিন গৗল্লৈসিননা দেৎসিনজৗং বৗর হৗজায়ৗ। 8মৗনছে মামলা, জাইফ্রা মানসিফৗরনিফ্রায় দশমাংশ বুথুমামৗন বিছৗরৗ সানছে থৈনায়, নাথায় মল্কীষেদকনি গুবুন মামলা, সাস্ত্রয়াও সাক্ষী হৗয়ৗ যে বিয়ৗ ঠাংনান দং। 9ছৗরবায়া হয়তো বুংনৗ হাগৌ যে লেবী, জাইয়া দশমাংশ বুথুমৗ, বিয়ৗ অব্রাহামনি গেজেরজৗং দশমাংশখৌ মল্কীষেদকনৗ হৗয়ামৗন। 10মানৗনা জেব্লা মল্কীষেদকআ অব্রাহামখৌ লৗগৗলাদৗং, অব্লা লেবীয়া বিনি আজৌ আজৈফৗরনি মৗদৗমাও দংমৗন5।

11লেবী বংশনি যাজক জানায় সমাওনৗ ইস্রায়েলফৗরনৗ আইনখৌ হৗনায় জাদৗং। যদি বেয়ৗ, লেবী বংশনি যাজকজৗং মানসিফৗরখৌ নিখুঁত খৗলামজায়ৗ, মানৗ দাবৗনৗ গুবুন যাজক ফৈবাওনৗ গৗনাং দংমৗন? সাছে মল্কীষেদক নিয়ম বাদি, হারোণনি নিয়ম বাদি অৗঙা, লেবী বংশ। 12মানৗনা জেব্লা যাজকখৌ সৗলাইয়ৗ, অব্লা আইনখৌবৗ সৗলাইনৗ গৗনাং জায়ৗ। 13জাইনি খৗথা বুংদৗং, বেয়ৗ গুবুন জাতিনি, আরৗ বিনি জাতিনিফ্রায় সাছেবৗ মাব্লাবাবৗ বিন্দৗয়াও বলি হৗয়াখৈ। 14মানৗনা বে রৗখাথার যে জৗংনি ফৗরবুআ যিহূদা বংশনিফ্রায় ফৈদৗং, আরৗ বে বংশনিফ্রায় যাজক অৗংখাৎনায় বেখৌ মোশিআ মাব্লাবাবৗ বুঙাখৈ।

মল্কীষেদক বাদি গুবুন সাছে যাজক

15আরৗ জৗঙৗ যে খৗথা বুংদৗংমৗন বে এমন কি বাংসিন রৗখা রৗখা যদি মল্কীষেদক বাদি গুবুন সাছে যাজক নুজায়ৗ, 16জাইয়া যাজক জাবায় বিনি উপজাতি বংশনি আইন ঠিকখৗলামনায় ভিত্তিয়াও অৗঙা নাথায় ফৗজৗবনৗ হায়ি জিউনি বৗলৗজৗংছৗ ফছংনায় জাদৗং। 17মানৗনা শাস্ত্রনি সাক্ষী,

“নৗঙৗ জেব্লাইবৗনি থাখৈ মল্কীষেদকনি

নিয়ম বাদি যাজক জাবায়6।”

18সিগাংনি আদেশ ঠিকখৗলামনায়খৌ দানগারবায়, মানৗনা বে বৗলৗ গৈয়া, খামানিয়াও ফৈয়ি। 19মানৗনা আইননা জেবৗ নিখুঁত জাফুংহৗনৗ হায়া, বিনি বদলৈ দা মৗজাংসিন আশাখৌ হৗবায়, জেজৗং জৗঙৗ ঈশ্বৗরনি খাঠিয়াও থাংনৗ হায়ৗ।

20আরৗ বেয়ৗ সমায় লায়ামাৎনিন জায়াখৈ, গুবুনফ্রা সমায় লায়ামাৎনিন যাজকফৗর জাবায়। 21নাথায় বিয়ৗ সমায় লানায় জৗং যাজক জাবায়, ঈশ্বৗরা বিখৌ হৗন্দৗং,

“ফৗরবুআ সমায় লাবায়,

আরৗ সৗলাইথারনায় অৗঙা:

‘নৗঙৗ জেব্লাইবৗনি থাখৈ যাজক 7জাবায়।’”

22মানৗনা বে সমায় লানায়জৗং, যীশুআ সাবসিন চুক্তিনি জামিনদার জাবায়।

23দা লেবীয়নি নিয়মবাদি বিহা গৗবাং যাজকফৗরবৗ দংমৗন, মানৗনা থৈনাইয়া বিছৗরনি সেবাখৌ বাথেদৗং। 24নাথায় যীশুআ জেব্লাইবৗনি থাখৈ গৗঠাঙৈ দং, বিনি যাজক জানায়া অরাইবৗনি থাখৈ। 25বিনিখাইনৗ জাইফ্রা বিনি গেজেরজৗং ঈশ্বৗরনিয়াও ফৈয়ৗ, বিছৗরখৌ বিয়ৗ অরাইবৗ বাছাইনৗ হায়ৗ, মানৗনা বিছৗরনি জুনৈ ঈশ্বৗরনিয়াও খাওলাইনৗ বিয়ৗ জেব্লাইবৗ গৗঠাঙৈ দং।

26বেবাদিনৗ গৗজৌসিন যাজকআ জৗংনি নাংগৌয়াও হেফাজাব হৗয়ৗ, জাই সাছেআ গৗথার, বিহা দায় গৈয়া কিন্বা বিনাও পাপ গৈয়া, পাপীফৗরনিফ্রায় বিয়ৗ আলাদা খৗলামৗ, নখ্রাংফৗরনি জৌসিনাও বাখ্নায়জাবায়।

27বিহা গুবুন গৗজৌসিন যাজকফৗর বাদি অৗঙা, সানফ্রৗমবৗ সিগাং গাওনি থাখৈ, বিনি উনাও মানসিফৗরনি থাখৈ বলি হৗনাংগৌ গৈয়া। মানৗনা বয়নিবৗ পাপনি থাখৈ বিয়ৗ গাওনি জিউখৌ ক্রুশাও খেবছেয়াওনৗ হৗবায়8। 28মানৗনা আইনা বৗলৗ গৈয়ি মানসিনিফ্রায়ছৗ গৗজৌসিন যাজকখৌ ফছঙৗ, নাথায় আইন ফৈনায়নি উনাও ঈশ্বৗরা সমায় লানায়জৗং গাওনি বিসাজ্লাখৌনৗ যাজক ফছংবায়, বিয়ৗ জেব্লাইবৗনি থাখৈ নিখুঁত।