Mech
ইব্রীয় 11
ফৗথাইনায়
দা ফুরা ফৗথাইনায়া জাবায় ভরসা, জেখৌ জৗঙৗ আশা খৗলামৗ আরৗ নংথারগৌ জেজৗং জেখৌ নুয়া বেয়ৗ নংগুবৈগৌ। বে নংথারগৌ গৗডৗ গৗডা মানসিফৗরনি থাখৈ ঈশ্বৗরা বিছৗরজৗং খুশি জাদৗংমৗন।
ফৗথাইনায়জৗং জৗঙৗ মিথিনৗ হায়ৗ যে, ঈশ্বৗরনি আদেশজৗং বে সংসারা সৗরজিজাদৗং, জৗং নুনৗ মৗন্নায় মৗঙাফ্রা, জেখৌ নুনৗ মৗনৗ বেনিফ্রায় সৗরজিজায়াখৈ মৗন। ফৗথাইনায়জৗং হেবেলা ঈশ্বৗরনৗ কয়িননি খুরৈ সাবসিন দান হৗদৗং। বিনি ফৗথাইনায়নি জুনৈনৗ ঈশ্বৗরা বিনি দান হৗনায়খৌ নাজাওদৗং বিখৌ ধৗরৗমিয়া হৗন্নানৈ মৗজাং হৗনজাদৗং। হেবেলা থৈনানৈ থাংবায়ব্লাবৗ, আরৗ বিনি ফৗথাইনায়া দাবৗ সাক্ষী জানানৈ জৗংখৌ বুঙৗ।
ফৗথাইনায়জৗং হনোকআ গৗঠাঙৈ স্বৗর্গৗয়াও লাংজাদৗং, বিনিখাইনৗ বিয়ৗ থৈনায়খৌ মিথিয়াখৈমৗন, বিখৌ নাগিৎনান মৗননাখৈ মৗন, মানৗনা ঈশ্বৗরা বিখৌ লাংদৗংমৗন। ঈশ্বৗরা বিখৌ স্বৗর্গৗয়াও লাংনায়নি সিগাং বিয়ৗ সাক্ষ্য হৗদৗংমৗন যে বিয়ৗ বিখৌ খুশি খৗলামদৗং।1 আরৗ ফৗথাইয়ামাৎনিন ঈশ্বৗরখৌ রাওবৗ খুশি খৗলামনৗ অসম্ভব, মানৗনা ঈশ্বৗরনিয়াও ফৈনায়ফ্রা ঈশ্বৗর দং হৗন্নানৈ ফৗথাইথার নাংনায়, আরৗ জাইফ্রা বিখৌ গৗসৗ সিংনিফ্রায় নাইগিৎনৗ, বিছৗরনৗ বিয়ৗ বান্থাফৗরখৌ হৗয়ৗ। ফৗথাইনায়জৗংনৗ নুহুআ নুয়ালাবমা উনাও জাফুংনায়নি খৗথা ঈশ্বৗরনি সাবৗদান হৗনায়খৌ খৗনাছংদৗং, আরৗ ঈশ্বৗরনি থৗননায়খৌ মানিনানৈ গাওনি ন্ব'খরখৌ বাছাইনৗ গংছে নাও বানায়দৗং। বেজৗংনৗ নুহুআ ফৗথায়িফৗরখৌ সংসারাও দায় গৗনাং নুজাহৗদৗং, আরৗ বে ফৗথাইনায়জৗংনৗ নুহুআ ঈশ্বৗরজৗং ধৗরৗমিয়া সানজাদৗং2। ফৗথাইনায়জৗং অব্রাহামা, জেব্লা লিংহৎজাদৗং, মৗনছে জায়গাও থাংনৗ যে ঈশ্বৗরা বুংদৗং যে বিনি জানায়, বিয়ৗ ঈশ্বৗরনি থৗন্নায়খৌ মানিদৗং, ববেয়াও থাংনাংগৌ বেখৌ মিথিয়ামাৎনিন বিয়ৗ গাওনি হাদৎখৌ নাগারনানৈ অৗংখাৎলাংদৗং3। ফৗথাইনায়জৗং ঈশ্বৗরা বিনৗ হৗনৗ সিমান লানায় হাদৎনাও বিয়ৗ গুবুনারি মানসি বাদি থাম্বুয়াও থাহৈয়ামৗন, বিয়ৗ বি একই জবান হৗনায় উত্তরাধিকারি ইসাহাক আরৗ যাকোবজৗং লৗগৗছে বি থাম্বুয়াও থাহৈদৗংমৗন। মানৗনা বিয়ৗ বি নৗগৗরনি গৗগৗম ভিঠানি লামা নাইদৗং মৗন। জাইনি বাইদিসিনানি মহর হৗগ্রা আরৗ লুগ্রায়া জাবায় ঈশ্বৗর। আরৗ ফৗথাইনায়জৗং সারাআ গথ' থানায়নি বয়সা বাদবাইব্লাবৗ, গথ' থানৗ হানায় খৗলামবায়, মানৗনা ঈশ্বৗরা গাওনি বৗলৗজৗং জবান বাদি মাওফুংনায় হৗন্নানৈ বিয়ৗ ফৗথাইদৗং মৗন4। আরৗ বেবাদিনৗ বে সাছে মানসিনিফ্রায়, যদিও বিয়ৗ বিরাঠ বৗরায়বায় মৗন, নখ্রাংনি হার্থখিফৗর আরৗ সাগৗর বালা বাদি সানথ্রহায়ি জৗলৈফৗর এরবায়5।
বিছৗরৗ বে সমসিম ঈশ্বৗরখৌ ফৗথাইনান থৈদৗং, ঈশ্বৗরনি জবাননি জাফুংনায়খৌ বিছৗর গাওছৗর মৗনাখৈছৈব্লাবৗ ফৗথাইনায়জৗং গৗজাননিফ্রায় নাজাওজানায় নুহুৎদৗং, আরৗ গাওছৗরখৌ বে সংসারাও গুবুনারি মানসি আরৗ থাফৈথনায় মানিনানৈ লাদৗং। বেবাদি বুংগ্রা মানসিফ্রা গাওছৗরনি মৗনাংগৌ হাদৎখৌ লামা নাইগ্রাফৗর হৗন্নানৈ রৗখায়ৈ দিন্ঠিয়ৗ। বিছৗরৗ যে হাদৎখৌ নাগারদৗং বিনি খৗথা সাননানৈ বিছৗরৗ ফিনফিনদৗং মৗনব্লা, বিছৗরৗ থাংফিনৗ সুযোগ মৗন্নৗ মৗন। বিনি বদলৈ, বিছৗরৗ সাবসিন হাদৎনি, স্বৗর্গৗনি বিষয়ৈ লুবৈদৗংমৗন। বিনিখাইনৗ ঈশ্বৗরা বিছৗরনি ঈশ্বৗর হৗন্নান বুংনানৈ লানৗ লাজিয়াখৈ, মানৗনা বিছৗরনি থাখৈনৗ ঈশ্বৗরা নৗগৗরখৌ ঠাম ঠিম খৗলামখাদৗং। ফৗথাইনায়জৗং অব্রাহামা জেব্লা আনজাদ লাজায়ৗ, অব্লা বিয়ৗ ইসাহাকখৌ বলি বাওনৗ দান হৗদৗং, অৗও বিয়ৗ জবান হৗনান মৗননায়খৌ গাওনি সাছে বান বিসাজ্লাখৌ বলি বাওনৗ ইছ্ছা জাদৗংমৗন,6 যদিও ঈশ্বৗরা বিখৌ হৗন্দৗং যে, “ইসাহাকনি গেজেরজৗং নৗংনি জৗলৈয়া সানজানায়7।” অব্রাহামনি ফৗথাইনায়া বেনৗমৗন, ঈশ্বৗরা ইসাহাকখৌ থৈনায়নিফ্রায়বৗ ফৗঠাংফিন্নৗ হাগৌ, আরৗ বুংনৗ থাংব্লা, বিয়ৗ ইসাহাকখৌ থৈনায়নিফ্রায় মৗনফিন্দৗং।
ফৗথাইনায়জৗং ইসাহাকআ বিছৗরনি ফৈগৌ সমনি বিষয়ৈ যাকোব আরৗ এষৌনৗ বৗর হৗদৗং। 8
ফৗথাইনায়জৗং যাকোবআ, বিয়ৗ থৈনায়ছৈ সমাও যোষেফনি বিসাজ্লা সানৈখৌ বৗর হৗদৗং, বিয়ৗ গাওনি লাগ্রা লাওঠিনি বিজৌয়াও সিনাথনানৈ খর গংলায়নান সিবিদৗং9। ফৗথাইনায়জৗং যোষেফআ, থৈনায়ছৈ সমাও মিশরনিফ্রায় ইস্রায়েলফৗরখৌ অৗংখাৎলাংনায়নি খৗথা বুংদৗং, আরৗ গাওনি ফবজানায় বেগেংখৌ বিছৗরখৌ লাংফানৗ ফৗরৗংদৗং।10
ফৗথাইনায়জৗং মোশিআ সারিজানায়নি উনাও বিমা-বিফায়া তিনমাস দৗনখমাদৗং, বিছৗরৗ গথ'খৌ মহর গৗছা নুনায়খায় রাজানি হুকুমখৌ ছিফাইনৗবৗ গিয়াখৈ মৗন11। ফৗথাইনায়জৗং মোশিআ জেব্লা দেৎলাংবায়, অব্লা ফরৌণনি বিসাজৗনি বিসাজ্লা হৗন্নানৈ মুংখজানৗ গনায়নানৈ লায়াখৈছৈ12। বিয়ৗ পাপনি দান্দৈছে রংজানায়খৌ নাজাওয়ালামা ঈশ্বৗরনি মানসিফৗরজৗং গাজ্রিয়ৈ বাহায়জাফানৗ সাইখনানৈ লাবায়। বিয়ৗ মিশর হাদৎনি ধৗন সম্পত্তিফৗরনি খুরৈ খ্রীষ্টনি থাখৈ ঈশ্বৗরনি মানসিফৗরজৗং দুর্নামজাফানাইখৌছৗ সাবসিন দাম হৗনবায়, মানৗনা বিয়ৗ সিগাংনি মৗন্নৗ গৗনাং বান্থাখৌ নাইদৗং মৗন। ফৗথাইনায়জৗং রাজানি রাগ জৗংনায়খৌ গিয়ালামা মোশিআ মিশরনিফ্রায় অৗংখাৎলাংহৗদৗং, মানৗনা নুয়ি ঈশ্বৗরখৌ নুখাবায় বাদি বিয়ৗ সহায়দৗং।
ফৗথাইনায়জৗং বিয়ৗ ফাসকা ফরবনি আরৗ দুয়ারাও থৈ সাৎনায়খৌ মানিদৗং, জাহাথে গিবি সারিনায়খৌ সংহার খৗলামগ্রায়া ইস্রায়েলফৗরনি বিসাজ্লা গিবি সারিনায়ফৗরখৌ দৈনৗ হায়ি বাদি13।
ফৗথাইনায়জৗং ইস্রায়েলফ্রা গৗরান হ্বায়াও থাবায়লাংনায় বাদিনৗ গৗজা লৈথৗ গেজের গেজের বাৎলাংবায়, জেব্লা মিশরয়ারিফ্রা বিছৗরবাদি বাৎলাংনৗ হাস্থাইদৗং, নাথায় বিছৗরৗ লৈথৗয়াও গৗডৗলাংদৗং। ফৗথাইনায়জৗং যিরীহো নৗগৗরনি সৗরগিদিং সাত দিন দাওগানান গিদিংনায়াওনৗ নৗগৗরনি দেওয়ালা বায়ফ্রুবায়। ফৗথাইনায়জৗং বেশ্যা হিন্জাও রাহাব, মানৗনা বিয়ৗ ইস্রায়েলফৗরনি সুলুক লাগ্রাফৗরখৌ গাওনি মানসিফৗরখৌ শান্তিয়ৈ নাজাওদৗং মৗন, জাইফ্রা মানিয়ামৗন বিছৗরজৗং সিথাৎজায়াখৗছৈ। আরৗ বিনি বাংসিন আং মা বুংবাওনাংগৌ? গিদিয়োন, বারক, শিমশোন, যিপ্তহ, দায়ূদ, শমূয়েল আরৗ নবিফৗরনি খৗথা বুংনৗ সময় গৈয়া। ফৗথাইনায়জৗং বিছৗরৗ দাওহা নাংদৗং, আরৗ রাইজৗফৗরখৌ দেহাদৗং, আরৗ গাওনি ধার্মিক মানসিফৗরখৌ মৗজাঙৈ শাসন খৗলামদৗং, আরৗ ঈশ্বৗরনি জবান হৗখানায়খৌবৗ মৗন্দৗং। ফৗথাইনায়জৗংনৗ সিংহফৗরনি খৌগায়া মুথুথেজাদৗং। জৗংনায় অৎনাবৗ খামাখৈ, থুংগ্রীজৗং দানথাৎ জানায়নিফ্রায়বৗ খাৎগৌদৗং। বিছৗরহা বৗলৗ গৈয়া মৗনব্লাবৗ বৗলৗগ্রা জাদৗং, আরৗ গুবুনহারিফৗরনি দাওহা নাংগ্রাফৗরখৌ ফৈজেন্দৗং। হিন্জাওসাফ্রা গাওছৗরনি থৈনায়ফৗরখৌ মৗনফিন্দৗং মৗন, আরবাও জিউখৌ মৗনফিনদৗং। গুবুনফ্রা নাছয়জাদৗং, বিছৗরৗ মুক্তি মৗন্নৗ থাখৈ অস্বীকার খৗলামদৗং মৗন, জেন সাবসিন জীবননাও ঠাংখাংফিনৗ। খাইছেফ্রা জংখায়জাদৗং, বুজাদৗং, আরৗ জিনজ্রিজৗং খানানৈ জৗবথেসালিয়াও জৗবজাদৗং। বিছৗরৗনি ছায়াও অন্ঠাই খুবৈনানৈ সিথাৎদৗং, বিছৗরৗ আরাজৗং খাওনৈ হাখাওজাদৗং, আরৗ থুংগ্রীজৗং দানথাৎজাদৗং। বিছৗরৗ গাজ্রিয়ৈ বাহায়জাদৗং, নাছয়জাদৗং আরৗ হাওরিয়া জানানৈ মেন্ডা এবা বৗরমা বিগুরফৗর গান্নানৈ থাবাইগ্দিংবায়নাংদৗং। বে সংসারা বিছৗরনি থাখৈ যোগ্য অৗঙা মৗন, ন্ব-বাং গৈজায়িফৗর বাদি বিছৗরৗ মারু গৗরান ফৗথার বারি আরৗ হাজৗয়াও থাবাইদ্লাবাইদৗং মৗন, দন্দরফৗরাও আরৗ গুডুংফৗরাও গিদিংবাইদৗং মৗন।
ঈশ্বৗরা সাক্ষ্য হৗদৗংমৗন যে বিয়ৗ বিছৗরনি ফৗথাইনায়নি জুনৈ মৗজাং বুংদৗং, বিছৗরজৗং খুশি জাদৗংমৗন, অব্লাবৗ ঈশ্বৗরনি জবান হৗনায়খৌ বিছৗরনি সাছেবৗ মৗনাখৈ মৗন, মানৗনা জৗংনি থাখৈ সাবসিনখৌছৗ হৗনৗ ঈশ্বৗরা ঠাম ঠিম খৗলামদৗং, জাহাথে জৗংখৌ ছাড়া বিছৗরৗ নিখুঁত জানৗ হায়া।
Source notes (13)
- Cross-reference জাগাইজেন্নায় 5:24
- Cross-reference জাগাইজেন্নায় 6:13–22
- Cross-reference জাগাইজেন্নায় 12:1–5
- Cross-reference জাগাইজেন্নায় 18:11–14
- Cross-reference জাগাইজেন্নায় 15:5; 22:17; 32:12
- Cross-reference জাগাইজেন্নায় 22:1–14
- Cross-reference জাগাইজেন্নায় 21:12
- Cross-reference জাগাইজেন্নায় 27:27–29,39–40
- Cross-reference জাগাইজেন্নায় 48:1–20
- Cross-reference জাগাইজেন্নায় 50:24–25
- Cross-reference অৗংখাৎলাংনায় 2:2
- Cross-reference অৗংখাৎলাংনায় 2:10–12
- Cross-reference অৗংখাৎলাংনায় 12:21–30
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.