Kitaaba Faaru'uu 45

Faaruu Fuudha Mootichaa

Wolaloo ilmaan Qoraahii, sooressa faarfattootaatiif, faaruu ta akka yoyyoma faaruu, «Daraaraa» jedhantee beekkantutti faarfatante.

1Dubbiin dansaan gadhaa kiyya guuttee dhangalaati;

wolaloo tiyya mootichaaf hin dhageessisa;

arrabi kiyya akka feenii nama woy barreessiisaan beekkamee ti.

2Ati ilmaan namaa mara caalaa miidhaga'a;

dubbiin teeti arnya qaddi;

tanaaf Waaqi haga bara baraa si eebbiseera.

3Ee mooticha janna,

ka ulfinnaa fi arnya qaddu,

shallaagaa keeti hidhadhu.

4Marroo dhuga'aa, marroo gadhi-laafumma'aa fi

balchumma'aatiif,

arnya keetiin injifatiisaaf ka'i;

harki keeti middichi

injifachaa gugurdoo dhaggisiisuu ti.

5Daayi keetii ka qarame,

gadhaa diina keetii hin woraana;

gosi biyya adda addaa miila keeti jalatti hin jigan.

6Ee Waaqa barcumaan mootumma'aa keeti,

ka bara baraa ti;

uleen bokku'uu teetille ulee bokku'uu ta haqaa ti.

7Ati balchummaa jaalattee,

hammeenna jibbite;

tanaaf Waaqi, Waaqi keeti zayitii gammadaa si muudee,

hari'aa teeti akka caaltu si godhe.

8Woyaan fiqiree qumbii, hargiisaa fi

dakkara irraa hujanteen fiqqitti.

Mana mootumma'aa ka ilka arbaatiin seefame keessaa

qoonqoon kiraara guddichaatii fi

maseenqo'oo si gammachiitti.

9Dubartoota mana mootumma'aa keessa jiranu odduu,

ijoolleen durraa ta moototaa jiran;

giittittiin worqii biyya Ofiirii naqattelle

gara harka keeti middaatiin dhaabbatti.

10Ee intala dhage'i!

Waan ani jedhu caqasi;

kolbaa teetii fi mana abbaa keetii dedhi.

11Mootichi miidhaginna keetiif si halcha;

inni goottaa keeti waan te'eef, isa ulfeessi.

12Kolbaan Xiiroosii kennansa sii fidan;

worri dureeyyiin si'itti dhikaatiisaaf barbaadan.

13Intalti mootichi fuudhaaru

woyaa worqi'iin kuulante uffattee,

kolloo ifii keessa jirti.

14Woyaa kuula hedduu qaddu san uffattee,

gara mootichaa geeffanti;

durri bookarsitooti isi'ii

isii gula gara mootichaa hin dhaqan.

15Isaan ililleetti'ii fi gammadaan

isii gula mana mootichaa hin seenan.

16Ilmaan teeti addee abbootii teetii hin bu'an;

ati lafa duudii akka bulchanu hin goota.

17Ani dhaloota mara keessatti

gurra keeti hin mudhisa;

tanaaf gosi biyya adda addaa

bara baraa haga bara baraa si leellitti.