Kitaaba Faaru'uu 111

Leellisa Hujii Maade'ee Mootii Waan Maraatiif Dhikaate

1Mootii Waan Maraa Leellisa'a!

Kora worra qajeela'aatii fi wolde'a keessatti,

gadhaa tokkochaan

ani Mootii Waan Maraa hin saadadha!

2Wonni Mootiin Waan Maraa huje guddo'o;

worri hujii guddoo saniin gammadu marti

isii hubatiisa barbaada.

3Wonni inni huje marti

ulfinnaa fi arnyaan guutanteerti;

balchummaan isaalle

haga bara baraa jabaattee dhaabbatti.

4Mootiin Waan Maraa

hujii ifii akka qaabatantu godhe;

inni arja'a; mararaalle'e.

5Inni worra isa sodaatuuf sagalee hin kenna;

haga bara baraa gondooroo ifii hin qaabata.

6Inni lafa gosa adda addaa isaanii kenniisaan,

hunna ifii kolbaa ifiititti mudhiseera.

7Hujiin harka isaa marti dhuga'aa fi haqa;

seerri isaa marti addatama'a.

8Seerri isaa haga bara baraa jabaatee dhaabbatee,

addatamumma'aa fi balchumma'aan hujameera.

9Inni kolbaa ifiitiif wodoo erge;

gondooroo ifiille haga bara baraa ajaje;

maqaan isaa woyyicha; ka sodaatamelle'e.

10Qarummaan jalqabaa

Mootii Waan Maraa sodaatiisa;

worri ajaja isaa hordofu hubantii dansaa qaban;

kolbaan haga bara baraa

Mootii Waan Maraa saadatu'uu malte.