Ugubuo

Ugubuo wa

Yohana

Uwongoezi

Kitabu cha Ugubuo nee cha kisiikizi mwe Agane dihya, viyaviya nee kiandikwa kisiikizi bada ya kuvyaigwa Yesu, myaka ya makumi kenda na shano na mwagiiwa Yohana, 1:1. Yohana viyaviya nee kaandika kitabu cha Mbui Yedi chekuandikwacho na yee Yohana na bauwa ntatu, bauwa ya bosi ya Yohana na bauwa ya kaidi ya Yohana na bauwa ya ntatu ya Yohana. Yohana nee kamanyika inga, “Ekukundiswae muno na Yesu.” Yohana 13:23. Nee kaandika kitabu cha Ugubuo akawa mwe kisiwa cha Patimo uko kegalwa mwe kifungo kulawana na masa yakwe ya kubiikia Mbui Yedi ya Yesu Klistu.

Mbui yekumtendayo Yohana kuandika kitabu cha Ugubuo ni kuwagea moyo wantu wendaowasome ili waendee kuwa wazumiiwa kwa Yesu Klistu na kuwekha kauwiyo, kwaviya kisingi cha kuuya kwakwe Yesu kihehi 1:3, 22:7. Nee kawaandikia waklistu wose akini wada mazumwezumwe mfungate ya wantu wamzumiiyao klistu mwe chando cha 2-3. Yohana amanyisa kuwa kiya ekukiandikacho ni uwoni 1:3 na atumia misimo ya vintu vingi mwe kutamwiiza mbui ekuzionazo. Kitabu iki chaigana na hantu he vifungu vyekuwamo mwe Diagane da kae, asa kitabu cha Zakalia 6:1-8. Magunda mfungate na mawiga mfungate, viyaviya yaigana na matoa ambayo Muungu nee kayagiiya kuwatoa wantu wa Misili, Kulawa 7-9. Ugubuo watamwiiza kisingi cha kisiikizi kuwa Yesu endaawe mvoti na wose wamzumiiyao wendawekae hamwe nae misi yose kwesiho kisiikizi. Ndima ya kitabu iki ni kukuhaza na kukwekha kauwiyo da kwei kwaviya kuuya kwa Yesu kuhehi.

Yeumondani

Yohana avoka kuandika kitabu iki kwa kugombeka yee ni ndai na ni viivihi ekuonyweshavyo vintu na Muungu 1:1 - 1:20

Alavya mbui kulawa kwa Yesu kwa mazumwezumwe mfungate ya wantu wamzumiiyao Klistu 1:1 - 3:22

Naho atamwiizia mana ya alama mfungate na magunda mfungate 8:6 - 11:19.

Yekwembokayo ayo, Yohana atamwiiza mbui ya mvyee ekuwaye aguuswa na zoka, khondo gati ya mwana kigosi na zoka mwenye mitwi mfungate 12:1 - 14-20

Vituhu aandika kuusu mawiga mfungate ya maya ya Muungu 15:1 - 16:18

Viyaviya Yohana agombeka viya Muungu awavotavyo wamasa wakwe uwanga kwa Muungu 17:1 - 20:15

Abindiiza kwa kutamwiiza uwanga mhya kwa Muungu na inusi mhya ambayo yendayeze kisikizi 21:1 - 22:21.