Yakobo

Bauwa kwa

Yakobo

Uwongoezi

Kitabu iki kiandikwa na mntu etangwae Yokobo. Uyu yadahika nekawa Yakobo nduguye da Yesu ambae nekawa mgookezi wa zumwezumwe da bosi da wantu wamzumiiyao Klistu, nekawa yumwe wa wagookezi wa mkonga wa bosi wekugosokao Yelusalemu mwe Ntendwa ya waagiiwa mwe chando cha 15:13. Viyaviya muagiiwa Paolo kamwetanga “nguzo” ya zumwezumwe da wantu wamzumiiyao Klistu mwe kitabu cha Wagalatia mwe chando cha 2:9. Wamanyi wazumiiya kuwa kitabu cha Yakobo kiandikwa kabla ya myaka makumi mashano bada ya kuvyaigwa Klistu. Kwaviya Yakobo nekawa mgookezi wa zumwezumwe da wantu wamzumiiyao Klistu da uko Yelusalemu, yadahika kaandika kitabu ekuaho akekaa uko.

Yakobo aagiiya kitabu chakwe kwa mbai kumi dimwe na mbii yekumwaganikayo mwe si zose mwe chando cha 1:1. Mahinyo yekuwayo mwe kitabu cha Yakobo yanafaa kwa wazumizi wose, akini Yakobo ekugombekaho “Mbai kumi na mbii” yatenda idahike kuwa Yakobo nekawa kaandika kitabu iki kwa Wayahudi wekumzumiiyao Klistu. Kwaajii kitabu iki kikauwiwa kudibwiiya zumwezumwe kuu da wasomaji, kikatamwiiza mbui nyingi. Yakobo aonyesha viya uzumiizi na ntendwa vigosoavyo ndima hamwe. Uzumiizi wa kwei wendauwonyeshwe kwa ntendwa zakwe mwe chando cha 2:17. Viyaviya awahaza wantu mwe mbui ya kuonyesha upendeeo kwa wantu wenye vintu vingi 2:1-4 na atigombeka tekauwe mwe mbui ya yada tiyagombekayo 3:1-12

Yeumondani

Yakobo awaugusa wasomaji mwe chando cha 1:1.

Naho awagea moyo wazumiizi wazizimize wasuumikaho mwe chando cha 1:2-27.

Agombeka viya ikundigwavyo kwa uzumiizi kuonyeshwa kwa ntendwa mwe chando cha 2:1-26.

Atamwiiza viya ntamwiizi yekuwavyo na udaho mwe chando cha 3:1-12.

Naho Yakobo aonyesha viya umanyi wa Muungu wekuwavyo mkuu kusima umanyi wa kiuntu mwe chando cha 3:13 - 4:10.

Awahaza wasomaji wakwe wasekuwa wantu wa kwetogoa mwe chando cha 4:11 - 5:6.

Yakobo abindiiza kitabu chakwe kwakulavya miagiiyo ya hamwe mwe chando cha 5:7-20.