1 Petulo

Bauwa ya bosi ya

Petulo

Uwongoeezi

Bauwa ya bosi ya Petulo nee iandikwa na Mwaagiiwa Petulo. Petulo avoka bauwa inu kwa kwetamwiiza kuwa yee ni ndai na wada awaandikiao ni wakina ndai. Aandika bauwa iyo kwa waklistu wose ambao ni inga wageni mwe inusi inu, 1:1, maa nyingi kawetanga ivyo wantu ekuwaandikiao, kwaajii hantu habauwa inu yaigana na ida bauwa ya Paolo ekuwaandikiayo Waefeso, wantu wangi wazumiiya kuwa bauwa ya bosi ya Petulo nee iandikwa bada ya ida bauwa ya Paolo kwa Waefeso inga mwaka wa makumi mtandatu na shano bada ya kuvyaigwa kwa Klistu, Petulo nee kaandika bauwa iyo akawa uko Lumi ambae yee mwenye kakwetanga Babiloni 5:13.

Petulo atamwiiza kuwa nee kaandika bauwa inu kwaajii ya kuwagea moyo na kutenda wantu waone kuwa inu ni mboto ya kwei ya Muungu 5:12. Kuna mbui nyingi za kuigana gatigati ya bauwa ya bosi ya Petulo 2:11 - 3:7 na Efeso 5:18 - 6:9 na yada yekuandikwayo kwa Wakolosai 3:18 - 4:6. Hantua zose izo ntatu zatamwiiza ni viivihi kaya zakundigwa kwekaisa na kuwategeeza wenye udaho. Viavia awagea moyo wantu wamzumiao Klistu kuzizimiza wasuumizwaho kwaajii mizi za kisikizi zihehi 4:1.

Yeumondani

Petulo emanyisa yee mwenye na kuwamanyisa wasomaji wakwe 1:1-2.

Vituhu amtogoa Muungu kwaajii ya uohozi ambao wawa hamwe na niviivihi wekuavyo na mana mwe wekaisi wao 1:3 - 2:10.

Naho Petulo awaagiia wazumizi wekaise vitana mwe inusi na viavia alavya miagio mbaimbai ya myevano gatigati ya mgosi na mvyee yakwe na gatigati mtumwa na zumbe yakwe 2:11 - 4:11.

Bada ya ayo Petulo awagea moyo wazumizi kuzizimiza wasuumizwaho 4:12 - 5:11.

Naho Petulo abindiiza bauwa yakwe 5:12-14.