Bodo Parja Bible
ଏଜ୍ରା 1
ଜିଉଦିମଃନ୍ ବାଉଡ଼ିଜଃଉଁକ୍ କରସାର୍ ଆଦେସ୍
ଜିରିମିୟର୍ ଟଣ୍ଡେ ହୁଣି ବାରୟ୍ଲାର୍ ଇରି ଇସ୍ୱରାର୍ କଃତା ହୁରୁଣ୍ ଅଃଉଁକେ ପାରସ୍ୟର୍ ରଃଜା କରସ୍ ଦେସ୍ ଚାଲାଉତା ବଃଳ୍ ହଃର୍ତୁ ବଃର୍ସ୍ ଇସ୍ୱର୍ ପାରସ୍ୟର୍ ରଃଜା କରସାର୍ ମଃନେ ଦିଲା,ସେ ନିଜାର୍ ରାୟିଜାର୍ ସଃବୁବାଟ୍ ପର୍ଚାର୍ କଃରାୟ୍ ଆର୍ ଲେକାୟ୍ ଇ କଃତା କଃଉଁକେ ଆଦେସ୍ ଦିଲା।
ପାରସ୍ୟର୍ ରଃଜା ଇରି କଃଉଁଲା, ଇସ୍ୱର୍ ସଃର୍ଗାର୍ ଜୁଗ୍ଜୁଗାର୍ ଇସ୍ୱର୍, ହୁର୍ତିବିର୍ ସଃବୁ ରାୟିଜ୍ ଅଃମିକେ ଦଃୟିଆଚେ; ଆର୍ ସେ ଜିଉଦା ଦେସାର୍ ଜିରୁସାଲେମ୍ ତଃୟ୍ ଅଃମିକେ ତାର୍ ଗିନେ ଗଟେକ୍ ପାର୍ତନାଗଃର୍ ବାନ୍ଦୁକେ ଅଃମିକେ କୟ୍ଆଚେ।
ତୁମିମଃନାର୍ ସବୁ ଲକ୍ମଃନାର୍ ବିତ୍ରେ ଜେହେଁ ଅଃଉଅତ୍ ଇସ୍ୱର୍ ସେମଃନାର୍ ଉହ୍କାର୍ କଃର, ଆର୍ ତୁୟ୍ ଜିଉଦା ଦେସାର୍ ଜିରୁସାଲମେ ଜାୟ୍କଃରି ଇସ୍ରାଏଲାର୍ ଇସ୍ୱରାର୍ ଜିରୁସାଲମେ ଗଃର୍ ହାଜ୍, ସେ ଅଃଉଁଲା ଇସ୍ୱର୍।
ଆର୍ ଜେଏ ହେଁ ଜୁୟ୍ତି ରଃୟ୍ ବାସ୍ କଃରୁଲାୟ୍, ତାର୍ ସେତି ରେତା ଲଃକ୍ମଃନ୍ ଇସ୍ୱରାର୍ ଗଃରାର୍ ଗିନେ ମଃନେହାଚି ଦିଲା ଦାନ୍କେ ଚାଡି ରୁହା ଆର୍ ସନା, ବିନ୍ବିନ୍ ଜିନିସ୍ ଆର୍ ହସୁ ଦଃୟି ତାର୍ ଉହ୍କାର୍ କଃରତ୍। ସଃଡେବଃଳ୍ ଜିଉଦାର୍ ଆର୍ ବିନ୍ୟାମିନାର୍ ଦାଦିବାବୁମଃନାର୍ ମୁଳିକାମଃନ୍ ଆର୍ ଜାଜକ୍ମଃନ୍ ଆର୍ ଲେବିଅମଃନ୍, ବଃଲେକ୍ ଇସ୍ୱରାର୍ ପାର୍ତନାଗଃର୍ ହାଜୁ ଜଃଉଁକେ ଇସ୍ୱର୍ ଜୁୟ୍ଜୁୟ୍ ଲକାର୍ ମଃନ୍କେ ଚେତାୟ୍ ଦିଲା ସେମଃନ୍ ଉଟ୍ଲାୟ୍।
ଆର୍ ମଃନେହାଚି ଦିଲା ଦାନ୍କେ ଚାଡି ସେମଃନାର୍ ଚାରିଦିଗାର୍ ଲଃକ୍ମଃନ୍ ରୁହାର୍ କପା, ସନା, ବିନ୍ବିନ୍ ଜିନିସ୍ ଆର୍ ହସୁ ଆର୍ ବେସିମଲାର୍ ଜିନିସ୍ମଃନ୍ ମଃନ୍ଦିର୍ ହାଁୟ୍ ଦାନ୍ ଦିଲାୟ୍।
ଆର୍ ନବକୁଦ୍ନିଚର୍ ଇସ୍ୱରାର୍ ଗଃରାର୍ ସଃବୁ ଆସ୍ତିବାଡି ଜିରୁସାଲମେ ହୁଣି ଆଣି ନିଜାର୍ ଦେବ୍ତା ରିଲା ମଃନ୍ଦିରେ ସଃଙ୍ଗାୟ୍ରିଲା, କରସ୍ ରଃଜା ସେରି ସଃବୁ ବାର୍କଃରି ଆଣ୍ଲା।
ପାରସ୍ୟର୍ ରଃଜା କରସାର୍ ଟଃକା ସନାର୍ ମୁସ୍କାଦାରି ମିତ୍ରଦତର୍ ଆତେ ସେରି ଆଣାୟ୍ଲା ଜିଉଦାର୍ ଗନର୍ ସେସବସରକେ ସେସବୁକେ ଗଃଣିକଃରି ଦିଲା।
ସେ ଜିନିସାର୍ ଇସାବ୍ ଇରି; ତିରିସ୍ ଗଟ୍ ସନା ତାଳି,ଏକ୍ ଅଃଜାର୍ ରୁହା ତାଳି,ଏକ୍ ଉଣା ତିରିସ୍ ଚୁରି; ତିରିସ୍ ଗଟ୍ ସନାର୍ କପାଗିନା ଚାରିସଅ ଦଃସ୍ ରୁହାର୍ ମଃଜିବଃତ୍ରିଆରି ମତା ଗିଲାସ୍ ଆର୍ ଅଃଜାର୍ ଗଟ୍ ବିନ୍ ଆଣ୍ଡିକଣ୍ଡି। ସଃବୁ ମିସି ହାଞ୍ଚ୍ଅଃଜାର୍ ଚାରିସ ସନା ଆର୍ ରୁହାର୍ ଡକାଆଣ୍ଡି ରିଲି; କଃୟ୍ଦିମଃନ୍ ବାବିଲ୍ ତଃୟ୍ ହୁଣି ଜିରୁସାଲମେ ଆଣ୍ତାବଃଳ୍ ସେସବସର୍ ଇରିମଃନ୍ ଆଣ୍ଲା।
Bodo Parja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.