Bodo Parja Bible
୧ ପିତର୍ 2
ଜିବନ୍ ଟେଳା ଆର୍ ପବିତ୍ର ଗସ୍ଟି
ତଃବେ ମାପୁର୍ ଜେ ଉହ୍କାର୍ କାରି ଇରି ଜଦି ଚାକି ଆଚାସ୍ ତଃବେ ସଃବୁ ରଃକମାର୍ ଦୁସ୍ଟ୍ କାମ୍ ମିଚ୍ ଆର୍ ହେଟ୍କୁଟ୍, ଅଃକାର୍ ଆର୍ ଗାଣେଞ୍ଜ୍ ଚାଡା । ସଃବୁ ରଃକମ୍ ଦୁସ୍ଟ୍, ଚଃଲାକି, କୁଟ୍ ଚାଡି କଃଉଁଣା ହିଲା ହର୍ ନିର୍ମୁଳ୍ ଅଃଉଆ । ସଃବୁବଃଳ୍ ଆତ୍ମିକ୍ ଦୁଦ୍ କାଉଁକେ ମଃନ୍କଃରା । ତଃବେ ତୁମିମଃନ୍ ମୁକ୍ତି ହାଉତା ଜିବନେ ବାଡୁ ହାରାସ୍ । ଜଃନ୍କଃରି ସାସ୍ତରେ ଲେକାଆଚେ-
“ଇସ୍ୱର୍ କଃଡେକ୍ ନିକ ଦଃୟା କାରି ଅୟିଆଚେ,
ତୁମିମଃନ୍ ଚାକିଆଚାସ୍ ।”
ଜିବନ୍ ଟେଳା ହର୍ ଜେ ସେ ମାପୁର୍, ଜଃଗତାର୍ ଲକ୍ମଃନ୍ ତାକ୍ ନଃମାନ୍ଲାୟ୍ ସଃତ୍, ମଃତର୍ ଇସ୍ୱର୍ ତଃୟ୍ ବାଚ୍ଲାର୍ ଆର୍ ବଃଡେ ମଲାର୍, ତାର୍ ହାକ୍ ଆସା ତାର୍ ତଃୟ୍ ଆସି ତୁମିମଃନ ହେଁ ଜିସୁ କ୍ରିସ୍ଟାର୍ ଦଃୟି ଇସ୍ୱରାର୍ ତଃୟ୍ ମଃନ୍କେ ଗଃଲାହର୍ ଆତ୍ମିକ୍ ହୁଜା ଦେଉଁକେ ପବିତ୍ର ଜାଜକ୍ ଅଃଉଁକେ ଜିବନ୍ ଟେଳାହର୍ ଗଟେକ୍ ଆତ୍ମିକ୍ ଗଃର୍ ହର୍ ତିଆର୍ ଅଃଉଆ । କାୟିତାକ୍ବଃଲେକ୍ ସାସ୍ତରେ ଲେକା ଆଚେ,
“ଦଃକା, ମୁଁୟ୍ ସିଅନେ ଗଟେକ୍ ବାଚ୍ଲାର୍
ଆର୍ ବଃଡେ ମଲାର୍ କନାର୍ ମୁଳ୍ଟେଳା ଗାଡୁଲେ
ଆର୍ ଜେ ତାର୍ତଃୟ୍ ବିସ୍ୱାସ୍ କଃରେଦ୍ ସେ ଲାଜ୍ ନଃହାୟ୍ ।”
ତଃବେ ବିସ୍ୱାସ୍ କଃରୁଲାସ୍ ଜେ ତୁମିମଃନ୍, ତୁମିମଃନ୍ ସେ ବଃଡେମଲାର୍ ବାଗ୍ ହାଉତା ଲକ୍, ମଃତର୍ ଜୁୟ୍ମଃନ୍ ଅବିସ୍ୱାସି,
“ଗଃର୍ ବାନ୍ଦୁମଃନ୍ ଜୁୟି ଟେଳାକେ ନଃଚ୍ଲାୟ୍,
ସେରି ସେମଃନାର୍ ହାୟ୍ଁ କନାର୍ ମୁଳ୍ ଟେଳା ଅୟ୍ଲି ।”
ଆରେକ୍ ପବିତ୍ର ସାସ୍ତରେ ଲେକା ଆଚେ,
“ଇ ଟେଳାୟ୍ ଗାଦେକ୍ ଲକ୍ ଜଟ୍ୟାୟ୍ ଅଃଉତି
ଆର୍ ଇ ଟେଳା ସେମଃନ୍କେ ନାସ୍ କଃରେଦ୍ ।”
ସେମଃନ୍ ଇସ୍ୱରାର୍ ବଃଚନ୍କେ ନଃମାନି ଜଟ୍ୟାୟ୍ ଅୟ୍ଲାୟ୍, ଇରି ରିଲି ଇସ୍ୱରାର୍ ଜଃଜ୍ନା । 1
ମଃତର୍ ଜେ, ତୁମିମଃନ୍କେ ଅଃନ୍ଦାରେ ହୁଣି ନିଜାର୍ କାବାଅଃଉତା ଉଜାଳ୍ ଲଃଗେ କୁଦି ଆଚେ, ତୁମିମଃନ୍ ଜଃନ୍କଃରି ତାର୍ ଗୁଣ୍ କିର୍ତନ୍ କଃରାସ୍, ଇତାର୍ ଗିନେ ତୁମିମଃନ୍ ଗଟ୍ ବାଚ୍ଲାର୍ ବଃଉଁସ୍ ରଃଜାର୍ ଜାଜକ୍ମଃନ୍ ପବିତ୍ର ଜାତି ଆର୍ ଇସ୍ୱରାର୍ ନିଜାର୍ ଲକ୍ ଅୟି ଆଚାସ୍ । ହୁର୍ବେ ତୁମିମଃନ୍ ଇସ୍ୱରାର୍ ଲକ୍ ଅୟି ନଃରିଲାସ୍, ମଃତର୍ ଅଃବେ ଇସ୍ୱରାର୍ ଲକ୍ ଅୟି ଆଚାସ୍, ହୁର୍ବେ ତୁମିମଃନ୍ ଇସ୍ୱରାର୍ ଦଃୟା ହାୟ୍ଁ ନଃରିଲାସ୍, ମଃତର୍ ଅଃବେ ଦଃୟା ହାୟ୍ଁ ଆଚାସ୍ ।
ଇସ୍ୱରାର୍ ଗତିଦଃଙ୍ଗ୍ଳା
ଏ ଲାଡାର୍ ବାୟ୍ବେଣିମଃନ୍ ତୁମିମଃନ୍ ବିଦେସି ଆର୍ ହଃର୍ବାସି ବଃଲି ମୁଁୟ୍ ତୁମିମଃନ୍କେ ଗଃଉଆରି କଃରୁଲେ, ଗଃଗାଳାର୍ କଃରାପ୍ ଇଚା ଚାଡା, ସେରିମଃନ୍ ଆତ୍ମାର୍ ବିରୁଦେ ଜୁଜ୍ କଃରେଦ୍ । ତୁମିମଃନ୍ ଅଜିଉଦିମଃନାର୍ ତଃୟ୍ ବଲ୍ ଜିବନ୍ କାଟା, ଜଃନ୍କଃରି ସେମଃନ୍ ଜୁୟ୍ତାର୍ ଗିନେ ତୁମିମଃନ୍କେ ଦୁସ୍ଟ୍କାମ୍ କଃରୁମଃନ୍ ବଃଲି ଲିନ୍ଦା କଃର୍ତି, ତୁମିମଃନାର୍ ନିକ କାମ୍ ଦଃକି ସେ ବିସୟେ କ୍ରିସ୍ଟ ଆସ୍ତା ଦିନ୍ ଇସ୍ୱରାର୍ ଗୁଣ୍ ଗାଉତି ।
ମାପୁରାର୍ ଗିନେ ଗଃଉଆରି କଃରୁଲେ ସଃବୁଲକ୍ ରଃଜାମଃନାର୍ କଃତା ମାନା । ସଃବ୍କେ ବଃଡ୍ ରଃଜା ଅଃଉଅ କି ଦୁସ୍ଟ୍ କାମ୍ କଃରୁ ମଃନ୍କେ ଟିକ୍ ଡଃଣ୍ଡ୍ ଦେଉଁକେ ଆର୍ ସଃତ୍ କାମ୍ କଃରୁମଃନ୍କେ ଦନ୍ୟବାଦ୍ ଦେତା ଗିନେ ସେମଃନାର୍ ତଃୟ୍ ହୁଣି ଆୟ୍ଲାର୍ ଚାଲାଉତା ଲକ୍ ଅଃଉଅତ୍, ସେମଃନାର୍ ତଃଳେ ଚାଲା । ବଃଲେକ୍ ତୁମିମଃନ୍ ଜେ ସଃତ୍ କାମ୍ କଃରି ନିର୍ବୁଦିଆମଃନାର୍ ଗିଆନ୍ ନୟ୍ଲା କଃତା ବଃନ୍ଦ୍ କଃରା, ଇରି ଇସ୍ୱରାର୍ ଇଚା । ତୁମିମଃନାର୍ ତଃଳେ ନଃରିଲେକ୍ ହେଁ ତୁମିମଃନାର୍ ମୁକୁଳ୍ଲାର୍ ଦୁସ୍ଟ୍ କାମାର୍ ଡାହ୍ଣା ହର୍ ବେବାର୍ ନଃକେରି ଇସ୍ୱରାର୍ ଗତିଦଃଙ୍ଗ୍ଳା ଅୟି ନିକ କାମ୍ କଃରା । ସଃବ୍କେ ଲାଡ୍ କଃରା, ବିସ୍ୱାସି ବାୟ୍ବେଣିମଃନ୍କେ ମାୟ୍ନ୍ ଦଃକାଉଆ । ଇସ୍ୱର୍କେ ଡିରା, ରଃଜାକେ ମାୟ୍ନ୍ କଃରା ।
ଜିସୁ ଦୁକ୍ ବୟ୍ଗ୍ କଃଲା କଃତା
ଏ ଦଃଙ୍ଗ୍ଳାମଃନ୍ ତୁମିମଃନ୍ ଡିରିକଃରି ନିଜାର୍ ନିଜାର୍ ସାଉକାର୍ମଃନାର୍ କଃତା ମାନା, ଆର୍ ନିକ ଆର୍ ଦଃର୍ମି ସାଉକାରାର୍ ହଃକା ନାୟ୍, ମଃତର୍ ଦଃୟା ନଃକେର୍ତା ଲକ୍ମଃନ୍କେ ହେଁ ମାନା । ବଃଲେକ୍ କେଏ ଜଃବେ ଇସ୍ୱର୍କେ ନିଜେ ମାନି ଅଃନ୍ୟାୟେ ଦୁକ୍ ବୟ୍ଗ୍ କଃରି କଃସ୍ଟ ସଃମ୍ବାଳେଦ୍, ତଃବେ ଇସ୍ୱର୍ ଦଃୟା କଃରେଦ୍ । ତଃବେ ତୁମିମଃନ୍ ଦଃସ୍ କଃରି ନିଜାର୍ ନିଜାର୍ ଦଃସାର୍ ଗିନେ ଦୁକ୍ ସଃମ୍ବାଳାସ୍, ତଃବେ ସେତାର୍ ଗିନେ କାୟି ଲାବ୍ ? ମଃତର୍ ଜଦି ନିକ କାମ୍ କଃରି ଦୁକ୍ ସଃମ୍ବାଳାସ୍, ତଃବେ ସେରି ଇସ୍ୱରାର୍ ତଃୟ୍ ସଃର୍ଦାର୍ କଃତା । ଇତାର୍ ଗିନେ ହଃକା ତୁମିମଃନ୍ ଆସି ଆଚାସ୍, କାୟିତାକ୍ ବଃଲେକ୍ ତୁମିମଃନ୍ ଜଃନ୍କଃରି କ୍ରିସ୍ଟର୍ ହାଦ୍ ଚିନ୍କେ ଅୟି ଜଃହାସ୍, ସେତାର୍ ଗିନେ ସେ ହେଁ ତୁମାର୍ ଗିନେ ଦୁକ୍ ବୟ୍ଗ୍ କଃରି ତୁମିମଃନ୍କେ ସେହର୍ କଃରୁକେ ଦଃକାୟ୍ ଜାୟ୍ ଆଚେ; ସେ କାୟି ହାହ୍ ହେଁ ନଃକେଲା, କି ତାର୍ ମୁଏଁ କାୟି ମିଚ୍ କଃତା ନଃରିଲି । ତାକେ ଲିନ୍ଦା କଃଲା ବଃଳ୍ ସେ ଲେଉଟି ଲିନ୍ଦା ନଃକେଲା; ଦୁକ୍ ବୟ୍ଗ୍ କଃଲା ବଃଳ୍ ସେମଃନ୍କେ ବିରଦ୍ କଃରୁକେ ନଃଡିରାୟ୍ଲା, ମଃତର୍ ନ୍ୟାୟ୍ ବିଚାର୍ କାରିର୍ ଆତେ ସଃବୁ ସଃହ୍ରି ଦିଲା । ଅଃମିମଃନ୍ ଜଃନ୍କଃରି ହାହାର୍ ଗିନେ ମଃରିକଃରି ଦଃର୍ମି ଅଃଉଁକେ ଜିବନ୍ କାଟୁନ୍ଦ୍, ଇତାର୍ ଗିନେ ସେ ଅଃହ୍ଣାକ୍ କ୍ରୁସ୍ ଉହ୍ରେ ନିଜାର୍ ଗଃଗାଳେ ଅଃମିମଃନାର୍ ସଃବୁ ହାହ୍ ବୟ୍ଲା; ତାକେ ମାଡ୍ ହଃଳ୍ଲାକେ ତୁମିମଃନ୍ ଉଜ୍ ଅୟି ଆଚାସ୍ । ବଃଲେକ୍ ତୁମିମଃନ୍ ମେଣ୍ଡାହର୍ ବିନ୍ ବାଟ୍ ଜାୟ୍ରିଲାସ୍, ମଃତର୍ ଅଃବେ ତୁମିମଃନାର୍ ଆତ୍ମାର୍ ଗଃଉଳିଆ ଆର୍ ମୁଳିକା ହାକ୍ ବାଉଳି ଆସି ଆଚାସ୍ ।
Source notes (1)
- Cross-reference ତିତ ୨:୧୪.
Bodo Parja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.