ସଃର୍ଗାର୍ ବାଟ୍ ନଃଉଁଆ ନିଅମ୍
ମାର୍କ 10
ଜିସୁ ଚାଡ୍ ହଃତାର୍ କଃତା ସିକ୍ୟା ଦିଲା
(ମାତି ୧୯:୧-୧୨; ଲୁକ ୧୬:୧୮)
ଜିସୁ ସେ ଟାଣ୍ ଚାଡି ଜିଉଦା ସଃନ୍ଦାୟ୍ ଆର୍ ଜର୍ଦନ୍ ଗାଡ୍ ସେହାଟି ଆୟ୍ଲା, ଆର୍ ଅଲେକାର୍ ଲକ୍ ତାର୍ ଚଃମେ ରୁଣ୍ଡ୍ଲାୟ୍, ସଃବୁ ବଃଳାର୍ ହର୍ ଜିସୁ ସିକ୍ୟା ଦେଉଁକେ ଦଃର୍ଲା ।
ଇବିତ୍ରେ କଃତିଗଟ୍ ପାରୁସିମଃନ୍ ଜିସୁକେ ହଃଚାରି ହାନ୍ଦାୟ୍ ହଃକାଉଁକ୍ ଆସି କୟ୍ଲାୟ୍, “ତୁୟ୍ କଃଉ, ଗଟ୍ ଅଃଣ୍ଡ୍ରା ତାର୍ ଡକୁର୍ସିକେ ଚାଡ୍ତାର୍ କାୟ୍ ବିଦି ଆଚେ ?”
ଜିସୁ ଲକ୍ମଃନ୍କେ ହଃଚାର୍ଲା, “ମସା କାୟ୍ ଆଦେସ୍ ଦଃୟ୍ ଆଚେ ?” 1
ସେମଃନ୍ କୟ୍ଲାୟ୍, “ଚାଡ୍ହଃତାର୍ ଲେକି ଦଃୟ୍ ମାୟ୍ଜି ଚାଡୁକ୍ ମସା ବିଦି ଦିଲାଆଚେ ।”
ଜିସୁ ସେମଃନ୍କେ କୟ୍ଲା, “ତୁମିମଃନାର୍ ଅଃଟୁଆ ମଃନ୍ ଦଃକି ମସା ତୁମାର୍ ଗିନେ ଇ ସଃବୁ ଆଦେସ୍ ଲେକି ଆଚେ । ମଃତର୍ ହୁର୍ତିବିର୍ ଉବ୍ଜାଣାର୍ ତଃୟ୍ହୁଣି ଇସ୍ୱର୍ ସେମଃନ୍କେ ଅଃଣ୍ଡ୍ରା ଆର୍ ଟକିକଃରି ହାଜ୍ଲା ଆଚେ । ଇତାର୍ ଗିନେ ଗଟ୍ ମାନାୟ୍ ଆୟ୍ସି ଉବାସିକ୍ ଚାଡି ଦୁୟ୍ଲକ୍ ଗଟେକ୍ ଗଃଗାଳ୍ ଅଃଉତି । ଇତାକ୍ ସେମଃନ୍ ଆର୍ ଜଳେକ୍ ଗଃଗାଳ୍ ନୟ୍, ମଃତର୍ ଗଟେକ୍ ଗଃଗାଳ୍ ଅଃଉତି । ଇସ୍ୱର୍ ଜାୟ୍ରି ମିସାୟ୍ ଆଚେ, ମାନାୟ୍ ସେରି ବିନ୍ବିନ୍ ନଃକେର ।”
ଗଃରେ ଗଃଲା ହଃଚେ ଚେଲାମଃନ୍ ଆରେକ୍ ଗଟ୍ତର୍ ଆର୍ ବାବ୍ ହଃଚାର୍ଲାୟ୍ । 2ଜିସୁ ସେମଃନ୍କେ କୟ୍ଲା, “ଜୁୟ୍ମାନାୟ୍ ତାର୍ ନିଜାର୍ ଡକୁର୍ସିକେ ଚାଡି ଗଟ୍ ବିନ୍ ମାୟ୍ଜିକେ ସଃଙ୍ଗାୟ୍ଦ୍, ତଃବେ ତାର୍ ଡକୁର୍ସିର୍ ବିରଦେ ଦାରି କାମ୍ କଃରେଦ୍ । ଆର୍ ଜଦି ଗଟ୍ ଲକାର୍ ଡକୁର୍ସି, ନିଜାର୍ ଅଃଣ୍ଡ୍ରାକେ ଚାଡି ବିନ୍ ଅଃଣ୍ଡ୍ରାକେ ଗଃର୍ କଃରେଦ୍ ତଃବେ ସେ ଦାରିକାମ୍ କଃରେଦ୍ ।”
ଜିସୁ ସାନ୍ ହିଲାମଃନ୍କେ ଲାଡ୍କଃଲା
(ମାତି ୧୯:୧୩-୧୫; ଲୁକ ୧୮:୧୫-୧୭)
ଜିସୁ ଜଃନ୍କଃରି ସାନ୍ସାନ୍ ହିଲାମଃନ୍କେ ଚୁୟ୍ଦ୍, ଇତାର୍ ଗିନେ ଲକ୍ମଃନ୍ ସେମଃନ୍କେ ଜିସୁର୍ ତଃୟ୍ ଆଣୁକେ ଦଃର୍ଲାୟ୍, ମଃତର୍ ଜିସୁର୍ ଚେଲାମଃନ୍ ଲକ୍ମଃନ୍କେ ଦଃକାଦେତି ରିଲାୟ୍ । ଜିସୁ ସେରି ଦଃକି ରିସା ଅୟ୍, ଚେଲାମଃନ୍କେ କୟ୍ଲା, “ସାନ୍ ହିଲାମଃନ୍କେ ମର୍ ଲଃଗେ ଆସୁକ୍ ଆଗଟା ନାୟ୍, କାୟ୍ତାକ୍ବଃଲେକ୍ ଇସ୍ୱରାର୍ ରାଇଜ୍ ଇବାନ୍ୟା ଲକ୍ମଃନାର୍ । 3ମୁଁୟ୍ ତୁମିମଃନ୍କେ ସଃତ୍ କଃଉଁଲେ, ଜୁୟ୍ ଲକ୍ ଇସ୍ୱର୍ ରାଇଜ୍କେ ଇ ସାନ୍ ହିଲା ହର୍ ନଃଦେର୍ଲେକ୍, ସେ କଃନ୍କଃରି ହେଁ ଇସ୍ୱରାର୍ ରାଇଜେ ହୁରୁ ନାହାରେ ।” ତାର୍ହଃଚେ ଜିସୁ ସାନ୍ ସାନ୍ ହିଲାମଃନ୍କେ କଳେଦଃରି ସେମଃନାର୍ ଉହ୍ରେ ଆତ୍ ସଃଙ୍ଗାୟ୍ ଆସିର୍ବାଦ୍ କଃଲା ।
ମାଜନ୍ ଦଃଙ୍ଗ୍ଳା
(ମାତି ୧୯:୧୬-୩୦; ଲୁକ ୧୮:୧୮-୩୦)
ଜିସୁ ବାରାୟ୍ ଜଃଉଁକେ ବାଟ୍ ଦର୍ଲାବଃଳ୍, ଗଟ୍ ମାନାୟ୍ ଦଃବ୍ଳି ଦଃବ୍ଳି ଆସି ତାର୍ ମୁଏଁ ମାଣ୍ଡିକୁଟା ଟେସି ହଃଚାର୍ଲା, “ଏ ସଃତ୍ ଗୁରୁ, ଅଃମ୍ବର୍ ଜିବନ୍ ହାଉଁକ୍ ମୁଁୟ୍ କାୟ୍ରି କଃରିନ୍ଦ୍ ?”
ଜିସୁ ଉତୁର୍ ଦିଲା, “ତୁୟ୍ ମକ୍ କାୟ୍ତାକ୍ ସଃତ୍ ବଃଲି କଃଉଁଲିସ୍ ? ଇସ୍ୱର୍କେ ଚାଡିକଃରି କେହେଁ ସଃତ୍ ନାୟ୍ । ତୁୟ୍ ମାପ୍ରୁର୍ ବିଦି ଜାଣି ଆଚ୍ସି, ‘ନଃର୍ ଅଃତ୍ୟା କଃରାନାୟ୍, ଦାରିକାମ୍ କଃରାନାୟ୍, ଚର୍ କାମ୍ କଃରାନାୟ୍, ମିଚ୍ସାକି ଦିଆସ୍ ନାୟ୍, ଟକା ନାୟ୍, ନିଜାର୍ ଆୟା ଉବାକ୍ ମାନ୍ତି କଃରା ।’”
ଜିସୁକେ ସେମାନାୟ୍ କୟ୍ଲା, “ଏ ଗୁରୁ, ମୁଁୟ୍ ତ ହିଲାବଃଳ୍ହୁଣି ଇସଃବୁ ଆଦେସ୍ ମାନି ଆସୁଲେ ।”
ଜିସୁ ତାକ୍ ମୁଏଁ ଦଃକି ଲାଡ୍ କଃଲା ଆର୍ କୟ୍ଲା, “ତର୍ ଅଃବେ ହେଁ ଗଟ୍ ବିସୟ୍ ଉଣାଆଚେ, ତୁୟ୍ ଜାଆ, ତର୍ ନିଜାର୍ ଜାୟ୍ରି ଆଚେ, ସେରିମଃନ୍ ବିକିକଃରି ଗଃରିବ୍ମଃନ୍କେ ବାଟାକଃରି ଦେସ୍, ଆର୍ ତୁୟ୍ ସଃର୍ଗେ ଦଃନ୍ ହାଉସି; ଆର୍ ମର୍ ହଃଚେ ଆଉ ।” ଜଃଡେବଃଳ୍ ସେମାନାୟ୍ ଇରି ସୁଣ୍ଲା, ତାର୍ ମୁଉଁ ସୁକିଗଃଲି ଆର୍ ସେ ମଃନ୍ଦୁକ୍ ଅୟ୍ ବାରାୟ୍ଗଃଲା, କାୟ୍ତାକ୍ବଃଲେକ୍ ସେମାନାୟ୍ର୍ ଅଲେକାର୍ ଦଃନ୍ରିଲି ।
ସେତାକ୍ ଜିସୁ ଚାରିହାକ୍ ଦଃକି ଚେଲାମଃନ୍କେ କୟ୍ଲା, “ଜୁୟ୍ଲକାର୍ ଦଃନ୍ ଆଚେ, ସେମଃନ୍ ଇସ୍ୱରାର୍ ରାଇଜେ ଜଃଉଁକେ ବଃଡେ ହାବଳ୍ ଆଚେ ।”
ଜିସୁର୍ କଃତାସୁଣି ଚେଲାମଃନ୍ ବଃଡେ କାବା ଅୟ୍ଲାୟ୍ । ମଃତର୍ ଜିସୁ ଆରେକ୍ ଗଟ୍ତର୍ କୟ୍ଲା, “ହିଲାମଃନ୍ ସୁଣା, ଇସ୍ୱରାର୍ ରାଇଜେ ଜଃଉଁକେ ବଃଡେ ହାବଳ୍ । ଇସ୍ୱରାର୍ ରାଇଜେ ଗଟ୍ ମାଜନ୍ ଲକ୍ ଜାତା ବାଟା, ସୁତ୍ଲିର୍ କାଣାବାଟ୍ ଅୟ୍ ଉଟ୍ ଚିଙ୍ଗୁଳ୍ତାର୍ ଉହାସ୍ ।”
ଚେଲାମଃନ୍ ଆରେକ୍ ବଃଡେ କାବା ଅୟ୍ଲାୟ୍, ଆର୍ ସେମଃନାର୍ ବିତ୍ରେ କଃଉଆକଇ ଅୟ୍ଲାୟ୍, “ଇବାନ୍ୟା ଅଲେ କୁୟ୍ ମାନାୟ୍ ମୁକ୍ତି ହାଉଁ ହାରେ ?”
ଜିସୁ ଚେଲାମଃନ୍କେ ଦଃକି କୟ୍ଲା, “ଇରି ମାନାୟ୍ର୍ ଗିନେ ହାବଳ୍, ମଃତର୍ ଇସ୍ୱରାର୍ ଗିନେ ନୟ୍ । ବଃଲେକ୍ ଇସ୍ୱର୍ ତଃୟ୍ ସଃବୁ ଉସାସ୍ ।”
ପିତର୍ ଜିସୁକେ କୟ୍ଲା, “ଦଃକ୍ ତର୍ ଚେଲା ଅଃଉଁକେ ଅଃମିମଃନ୍ ସଃବୁ ଚାଡି ତର୍ ହଃଚେ ଆୟ୍ଲୁ ଆଚୁ ।”
ଜିସୁ ସେମଃନ୍କେ କୟ୍ଲା “ମୁଁୟ୍ ସଃତ୍ କଃଉଁଲେ, କୁୟ୍ ମାନାୟ୍ ମର୍ ଗିନେ ଆର୍ ନିକ କବୁର୍ ପର୍ଚାର୍ କଃର୍ତା ଗିନେ ଗଃର୍, ବାୟ୍, ବେଣି କି ଆୟା ଉବା, ହିଲାମଃନ୍ କି ବୁୟ୍ଁ ଚାଡି ଆଚେ, ଆର୍ ଇ ହୁରେ ତାଡ୍ନା ସଃଙ୍ଗ୍ ସଏ ଗୁଣ୍ ଗଃର୍, ବାୟ୍, ବେଣି, ଆୟା, ହିଲାମଃନ୍ ଆର୍ ବୁୟ୍ଁବାଳା, ଆରେକ୍ ସେ ଜୁଗେ ଅଃମ୍ବର୍ ଜିବନ୍ ନାହାୟ୍, ଅଃନ୍କା ଲକ୍ କେ ନାୟ୍ । 4ମଃତର୍ ହଃର୍ତୁ ରିଲା ଗାଦେକ୍ ଲକ୍ ହଃଚେ ଅଃଉତି, ଆର୍ ହଃଚେ ରିଲା ଗାଦେକ୍ ଲକ୍ ହଃର୍ତୁ ଅଃଉତି ।”
ଜିସୁ ଇ ସଃଙ୍ଗ୍ ତିନ୍ତର୍ ତାର୍ ମଃର୍ତା କଃତା କୟ୍ଲା
(ମାତି ୨୦:୧୭-୧୯; ଲୁକ ୧୮:୩୧-୩୪)
ଚେଲାମଃନ୍ ଜିରୁସାଲମେ ଜାତିରିଲାବଃଳ୍, ବାଟେ ରିଲାୟ୍ ଆର୍ ଜିସୁ ସେମଃନାର୍ ଆଗେ ଆଗେ ଜାତିରିଲା, ସେମଃନ୍ କାବା ଅଃଉତି ରିଲାୟ୍, ଆର୍ ହଃଚେ ଜାତା ଲକ୍ମଃନ୍ ହେଁ ଡିରି ଜାୟ୍ ରିଲାୟ୍ । ଇତାକ୍ ସେ ଆରେକ୍ ବାରଗଟ୍ ଚେଲାମଃନ୍କେ ଅଃଲ୍ଗା କଃରି, ତାକ୍ ଜାୟ୍ ଜାୟ୍ରି ଗଃଟୁକ୍ ଜଃଉଁଲି, ସେରି ସଃବୁ ସେମଃନ୍କେ ଜାଣାୟ୍ଲା । ଜିସୁ ସେମଃନ୍କେ କୟ୍ଲା, “ସୁଣା, ଅଃମିମଃନ୍ ଜିରୁସାଲମେ ଜଃଉଁଲୁ, ନଃରାର୍ ହୟ୍ସି, ବଃଡ୍ ଜାଜକ୍ ଆର୍ ଦଃର୍ମ୍ ଗୁରୁମଃନାର୍ ଆତେ ସଃହ୍ରି ଅୟ୍ଦ୍ । ଆର୍ ସେମଃନ୍ ତାକ୍ ଦସିକଃରି ମଃର୍ନ୍ ଡଃଣ୍ଡ୍ ଆଦେସ୍ ଦଃୟ୍, ଅଜିଉଦି ଲକାର୍ ଆତେ ସଃହ୍ରି ଦେତି । ସେମଃନ୍ ତାକ୍ ବିଚାର୍ କଃର୍ତି ଆର୍ ମଃର୍ନ୍ ଡଃଣ୍ଡ୍ ଦେତି । ଆରେକ୍ ସେ ଲକ୍ମଃନ୍ ତାକ୍ ଟାହ୍ରା କଃର୍ତି, ତାର୍ ଉହ୍ରେ ଲାଳ୍ ତୁକ୍ତି, କର୍ଡା ସଃଙ୍ଗ୍ ମାର୍ତି ଆର୍ ମଃର୍ନେ ମାର୍ତି, ଆର୍ ସେ ତିନିଦିନାର୍ ହଃଚେ ଉଟେଦ୍ ।”
ଜାକୁବକ୍ ଆର୍ ଜହନାର୍ ଗଉଆରି
(ମାତି ୨୦:୨୦-୨୮)
ଜେବଦିର୍ ହୟ୍ସି ଜାକୁବକ୍ ଆର୍ ଜହନ୍ ଜିସୁ ହାକ୍ ଆସି କୟ୍ଲାୟ୍, “ଏ ଗୁରୁ, ଅଃମିମଃନ୍ ତକେ ଜାୟ୍ରି ମାଗୁନ୍ଦ୍, ସେରି ଅଃମାର୍ ଗିନେ କଃର୍ ବଃଲି ଅଃମାର୍ ଇଚା ।”
ସେତାର୍ଗିନେ ଜିସୁ ସେମଃନ୍କେ ହଃଚାର୍ଲା, “ମୁଁୟ୍ ତୁମାର୍ ଗିନେ କାୟ୍ରି କଃରିନ୍ଦ୍ ବଃଲି ମଃନ୍ କଃରୁଲାସ୍ ?”
ସେମଃନ୍ ଜିସୁକେ ଉତୁର୍ ଦିଲାୟ୍, “ଜଃଡେବଃଳ୍ ତୁୟ୍ ତର୍ ଜଃଜ୍ମାନ୍ ଗାଦି ଉହ୍ରେ ବଃସ୍ଲେକ୍, ଅଃମିକ୍ ଏକ୍ଲାକେ କାତାବାଟ୍ୟା, ଆରେକ୍ ଗଟ୍ଲକ୍କେ ଡେବ୍ରିବାଟ୍ୟା ବଃସୁକେ ଇ ବର୍ ଦେଏ ।” 5
ଜିସୁ ସେମଃନ୍କେ କୟ୍ଲା, “ତୁମିମଃନ୍ କାୟ୍ରି ମାଗୁଲାସ୍, ସେରି ନଃଜାଣୁଲାସ୍ । ମୁଁୟ୍ ଜୁୟ୍ ଦୁକ୍ ବଗାର୍ କପାୟ୍ ଡୁକୁଲେ, ତୁମି କାୟ୍ ସେ କପାୟ୍ ଡୁକୁକ୍ ହାରାସ୍ ? ମୁଁୟ୍ ଜୁୟ୍ ମଃର୍ନାର୍ ବାପ୍ତିସମ୍ ନେଉଁଲେ ସେ ବାପ୍ତିସମ୍ ତୁମି କାୟ୍ ନେଉଁ ହାରାସ୍ ?”
ସେମଃନ୍ କୟ୍ଲାୟ୍, “ହାରୁ ।”
ଜିସୁ ସେମଃନ୍କେ କୟ୍ଲା, “ମୁଁୟ୍ ଜୁୟ୍ କପାୟ୍ ଡୁକୁଲେ, ତୁମିମଃନ୍ ସେ କପାୟ୍ ଡୁକୁକ୍ ହାରାସ୍ ଆର୍ ମୁଁୟ୍ ଜୁୟ୍ ବାପ୍ତିସମ୍ ହାଉଁଲେ, ତୁମିମଃନ୍ ସେତି ବାପ୍ତିସମ୍ ଅଃଉଆସ୍ । ମଃତର୍ ମର୍ କାତାବାଟ୍ୟା କି ଡେବ୍ରିବାଟ୍ୟା ବଃସୁକେ ଦେତାର୍ ମର୍ ଅଃଦିକାର୍ ନାୟ୍, ମଃତର୍ ମର୍ ଉବା ଜୁୟ୍ ଲକ୍ମଃନାର୍ ଗିନେ ସେ ଟାଣ୍ ବାଚ୍ଲା ଆଚେ, ସେମଃନ୍ ସେତି ବଃସ୍ତି ।”
ଜଃଡେବଃଳ୍ ତାର୍ ଦଃସ୍ଗଟ୍ ଚେଲାମଃନ୍ ଇରି ସୁଣ୍ଲାୟ୍, ସେମଃନ୍ ଜାକୁବ ଆର୍ ଜହନ୍ ଉହ୍ରେ ରିସା ଅୟ୍ଲାୟ୍ । 6ସେତାକ୍ ଜିସୁ ଚେଲାମଃନ୍କେ ତାର୍ ଚଃମେ କୁଦି କୟ୍ଲା, “ଜୁୟ୍ ଲକ୍ମଃନ୍ ଅଜିଉଦି ଲକ୍ମଃନାର୍ ଉହ୍ରେ ରାଜ୍ କଃର୍ତା ଲକ୍ ଅଃଉତି, ସେମଃନ୍ ଅଜିଉଦିର୍ ଲକ୍ମଃନାର୍ ଉହ୍ରେ ଅଃଦିକାର୍ ଦଃକାଉତି, ଆର୍ ସେମଃନାର୍ ବଃଡ୍ ଲକ୍ମଃନ୍ ଅଜିଉଦିର୍ ଲକ୍ମଃନ୍କେ ଆର୍ ତାକାର୍ ଉହ୍ରେ ରାଜ୍ କଃର୍ତା ଲକ୍ମଃନାର୍ ଉହ୍ରେ ଅଃଦିକାର୍ ଦଃକାଉତି, ଇରି ତୁମିମଃନ୍ ଜାଣାସ୍ । 7ମଃତର୍ ତୁମାର୍ ବିତ୍ରେ ସେନ୍କାର୍ ନାୟ୍, ମଃତର୍ ତୁମାର୍ ବିତ୍ରେ କେ ବଃଡ୍ ଅଃଉଁକେ ମଃନ୍ କଃରେଦ୍, ସେ ତୁମିମଃନାର୍ ସେବାକାରି ଅଃଉଅ । ଆର୍ ତୁମାର୍ ବିତ୍ରେ ଜେ ସଃବ୍କେ ବଃଡ୍ ଅଃଉଁକେ ମଃନ୍ କଃରେଦ୍, ତଃବେ ସେ ଗତିଦଃଙ୍ଗ୍ଳା ହର୍ ସଃବ୍କାର୍ ସେବା କଃର । କାୟ୍ତାକ୍ବଃଲେକ୍ ନଃରାର୍ ହୟ୍ସି ହେଁ ସେବା ହାଉଁକ୍ ନାସେ, ମଃତର୍ ସେବା କଃରୁକେ ଆର୍ ଗାଦେକ୍ ଲକାର୍ ଗିନେ ମୁକ୍ଳାଉତା ମଲ୍ ହର୍ ଅଃହ୍ଣାର୍ ଜିବନ୍ ଦେଉଁକେ ଆସି ଆଚେ ।”
ଜିସୁ ବାର୍ଟିମୟ କାଣାକେ ଉଜ୍ କଃଲା
(ମାତି ୨୦:୨୯-୩୪; ଲୁକ ୧୮:୩୫-୪୩)
ତାର୍ହଃଚେ ସେମଃନ୍ ଜିରିହ ହଚ୍ଲାୟ୍ ଆର୍ ସେ ଅଃହ୍ଣାର୍ ଚେଲାମଃନ୍କେ ଆର୍ ଅଲେକାର୍ ଲକ୍ ମିସି ଜିରିହହୁଣି ବାଉଳ୍ତାବଃଳ୍ ଟିମାୟର୍ ହୟ୍ସି ବାର୍ଟିମୟ ନାଉଁଆର୍ କାଣା ବିକାରି ବାଟ ହାଳାୟ୍ ବଃସିରିଲା । ସେ ଜଃଡେବଃଳ୍ ନାଜରିତ୍ ବଃସ୍ତିର୍ ଜିସୁ ବଃଲି ଇରି ସୁଣି ଆଉଲି ଅୟ୍ କୟ୍ଲା, “ଏ ଦାଉଦାର୍ ହୟ୍ସି, ମକ୍ ଦଃୟା କଃର୍ ।”
କଃତେକ୍ ଲକ୍ମଃନ୍ ତାକ୍ ତୁନ୍ହାଳୁକେ ଦଃକାଦେଉଁକେ ଦଃର୍ଲାୟ୍, ମଃତର୍ ସେ ଆରେକ୍ ଆଉଲି ଅୟ୍ କୟ୍ଲା, “ଏ ଦାଉଦାର୍ ହୟ୍ସି, ମକ୍ ଦଃୟା କଃର୍ ।”
ସେତାକ୍ ଜିସୁ ତେବ୍ଲା ଆର୍ କୟ୍ଲା, “ତାକ୍ ଇତି କୁଦା ।” ସେମଃନ୍ ସେକାଣାକେ କୁଦି କୟ୍ଲାୟ୍, “ସାସ୍ ଦଃର୍, ଉଟ୍ ଜିସୁ ତକେ କୁଦୁଲା ।”
ସେ ତାର୍ ହୁଙ୍ଗୁର୍ଲା ହଃଚ୍ୟା ଉର୍ଲି ହଃକାୟ୍ ସେଦାହ୍ରେ ଉଟିକଃରି ଜିସୁର୍ ତଃୟ୍ ଆୟ୍ଲା ।
ଜିସୁ କୟ୍ଲା, “ମୁଁୟ୍ ତର୍ ଗିନେ କାୟ୍ରି କଃରିନ୍ଦ୍ ବଃଲି ମଃନ୍ କଃରୁଲିସ୍ ?”
ସେ କାଣା ମାନାୟ୍ ତାକ୍ କୟ୍ଲା, “ଏ ଗୁରୁ, ମୁଁୟ୍ ଜଃନ୍କଃରି ଦଃକୁହାରିନ୍ଦ୍ ।”
ଜିସୁ କୟ୍ଲା, “ଜାଆ, ତର୍ ବିସ୍ୱାସ୍ ତକେ ଉଜ୍ କଃଲି ।”
ତଃତ୍କାଣ୍ ସେ କାଣା ମାନାୟ୍ ଦଃକୁ ହାର୍ଲା ଆର୍ ବାଟେବାଟେ ଜିସୁର୍ ହଃଚେ ଜଃଉଁକେ ଦଃର୍ଲା ।
Source notes (7)
- Cross-reference ମାତି ୫:୩୧.
- Cross-reference ମାତି ୫:୩୨; ୧ କର ୭:୧୦,୧୧.
- Cross-reference ମାତି ୧୮:୩.
- Cross-reference ମାତି ୨୦:୧୬; ଲୁକ ୧୩:୩୦.
- Cross-reference ଲୁକ ୧୨:୫୦.
- Cross-reference ଲୁକ ୨୨:୨୫,୨୬.
- Cross-reference ମାତି ୨୩:୧୧; ମାର୍କ ୯:୩୫; ଲୁକ ୨୨:୨୬.
ସଃର୍ଗାର୍ ବାଟ୍ ନଃଉଁଆ ନିଅମ୍. Copyright © 2020 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.