OL SAM 87

Sing blong presem Jerusalem

(Sing ya, ol laen blong Kora oli wokem.)

(Tok i go long ol man.)

1Taon ya Jerusalem,*

hem i taon blong Hae God.

Hem i wokem long tabu hil* ya Saeon,*

2mo i laekem taon ya moa,

i winim ol narafala taon long Isrel.*

3Yufala long taon ya blong hem,

yufala i lesin long ol gudgudfala tok

we hem i stap talem

blong leftemap taon ya.

4Hem i talem se,

“Taem mi mekem lis blong olgeta

man we oli stap obei long mi,

bambae mi putum nem blong ol man Ijip

wetem ol man Babilonia,

mo ol man Filistia,

mo ol man Taea,

mo ol man Itiopia,

olgeta evriwan oli stap insaed.

Olgeta ya bambae mi kaontem wetem yufala,

olsem we oli man ples blong yufala.”

5Mo bakegen,

hem bambae i talem se,

“Taon ya,

ol man blong olgeta kantri

bambae oli gat raet long hem.”

Hae God, hem i hae we i hae,

mo hem bambae i mekem taon ya i strong.

6Hem bambae i raetemdaon nem blong olgeta

long wan buk,

mo bambae hem i kaontem olgeta evriwan,

se oli man Jerusalem.

7Nao olgeta ya bambae oli stap danis,

mo oli stap singsing se,

“Saeon* ya,

olgeta gudgudfala samting blong yumi

oli stap kamaot long hem oltaem.”