OL SAM 33

Sing blong presem Hae God

(Tok i go long ol man.)

1Yufala we fasin blong yufala i stret,

i gud yufala i singsingaot

blong soemaot we yufala i glad

long ol samting ya

we Hae God i mekem.

Yufala evriwan we i stap obei long hem,

yufala i presem hem.

2Yufala i kilim gita,

yufala i singsing

blong talem tangkiu long Hae God,

yufala i mekem stringban

blong presem hem.

3I gud yufala i wokem wan niufala sing,

yufala i sing long hem.

Yufala i plei gita we yufala i plei gud,

mo yufala i glad,

yufala i singsingaot bigwan.

4Ol tok blong Hae God oli tru,

mo man i save trastem olgeta wok blong hem.

5Hae God i laekem ol fasin we i stret.

Fasin ya blong hem

we oltaem hem i lavem man tumas,

hem i kavremap evri ples long wol ya.

6Olgeta samting long skae,

Hae God i mekem olgeta long tok blong hem nomo.

San mo mun mo ol sta

oli kamaot long tok we hem i talem.

7Hem i putum solwota

i stap long ples blong hem,

hem i putumgud dip solwota

i stap long prapa ples blong hem.

8Yufala evriwan long graon ya,

yufala i bodaon long Hae God,

yufala i wosipim hem.

Yufala evriwan long wol ya,

yufala i ona long hem.

9Taem hem i tok, wol ya i stanap.

Tok blong hem

i mekem evri samting i kamaot.

10Hem i stap spolem ol tingting

blong ol man blong ol narafala kantri.

Hem i stap blokem olgeta

blong oli no wokem ol plan blong olgeta.

11Be ol plan blong hem

oli stap stanap strong oltaem.

Tingting blong hem i stap we i stap,

i no save finis samtaem.

12Ol man blong kantri we Hae God i God blong olgeta,

we hem i jusumaot olgeta blong oli man blong hem,

olgeta ya oli save harem gud.

13Hae God i stap long heven,

i stap lukluk i kamdaon,

i stap luk olgeta man.

14Hem i King,

i stap long ples blong hem,

i lukluk i kamdaon

long olgeta man we oli stap long wol ya.

15Hem i givim tingting long olgeta man,

mo hem i save olgeta samting we oli stap mekem.

16Maet ol soldia blong king oli strong tumas,

be king i no save win long samting ya.

Mo maet i gat wan soldia

we i strong we i strong,

be hem tu i no save win long paoa blong hem.

17Maet king i gat plante bigbigfala hos blong faet,

be oli no save mekem hem i win.

Nating we oli strong we i strong

be oli no save sevem hem.

18Hae God i stap lukaot gud long olgeta

we oli ona long hem,

mo we oli trastem fasin ya blong hem

we oltaem hem i lavem man tumas.

19Long hadtaem we i no gat kakae,

hem i stap lukaot gud long olgeta

blong oli stap laef.

Hem i stap sevem olgeta

blong oli no ded.

20Yumi ya,

yumi putum tingting blong yumi

i stap long Hae God.

Hem i stap lukaot gud long yumi,

mo i stap givhan long yumi.

21Oltaem hem i stap mekem yumi glad,

from we yumi trastem tabu nem blong hem.

(Tok i go long Hae God.)

22Hae God.

Mifala i putum tingting blong mifala

i stap finis long yu.

Prea blong mifala,

we fasin ya blong yu

we oltaem yu lavem man tumas,

bambae i stap wetem mifala oltaem.