OL SAM 115

Ol man oli mas leftemap nem blong Hae God nomo, from we hem nomo i tru God

(Tok i go long Hae God.)

1Hae God.

Oltaem yu yu lavem man tumas,

mo oltaem yu stap holem ol promes blong yu.

From samting ya,

mifala i no save leftemap nem blong mifala,

mifala i mas leftemap nem blong yu nomo.

(Tok i go long ol man.)

2Olgeta.

I no stret blong ol hiten man

oli stap jikim yumi se,

“?Wehem God ya blong yufala?”

3God blong yumi,

hem i stap long heven,

mo hem i save mekem evri samting

we hem i wantem mekem. 41

Be ol god blong ol hiten man ya,

olgeta nomo oli wokem long silva mo long gol.

5Ol god ya oli gat maot,

be oli no save toktok.

Oli gat ae,

be oli no save lukluk.

6Oli gat sora,

be oli no save harem samting.

Oli gat nus,

be oli no save harem smel blong samting.

7Oli gat han

be oli no save holem samting.

Oli gat leg,

be oli no save wokbaot.

Olgeta oli no save talem wan tok nating.

8I gud ol man we oli mekem ol aedol ya,

wetem ol man we oli stap wosipim olgeta,

olgeta evriwan oli kam olsem ol aedol ya nomo.

9Yumi ol laen* blong Isrel,*

yumi mas trastem Hae God.

Oltaem hem i stap givhan long yumi,

i stap lukaot gud long yumi,

10Yufala ol pris* blong hem,

yufala i mas trastem hem.

Oltaem hem i stap givhan long yumi,

i stap lukaot gud long yumi.

11Yumi evriwan we i stap mekem wosip long hem,

yumi mas trastem hem.

Oltaem hem i stap givhan long yumi,

i stap lukaot gud long yumi.

12Oltaem hem i stap tingbaot yumi,

mo bambae hem i blesem yumi.

Yumi wetem ol pris blong hem,

hem bambae i blesem yumi. 132

Hem bambae i blesem yumi evriwan

we yumi stap ona long hem.

Ol haeman wetem ol man we oli no gat nem,

be hem bambae i mekem i sem mak nomo

long yumi evriwan.

14Prea blong mi,

we Hae God bambae i mekem

we yufala i gat plante pikinini,

mo we yufala

wetem olgeta we bambae oli kamaot biaen long yufala,

bambae yufala i kam plante we plante.

15Hem i mekem heven mo wol,

mo prea blong mi,

we hem bambae i blesem yufala.

16Heven i ples blong Hae God nomo,

be wol ya, hem i givim long man.

17Olgeta we oli stap long Hom* blong ol Dedman

oli no save presem hem,

from we oli ded finis.

18Be yumi ya we yumi stap laef,

bambae yumi stap talem tangkiu long hem oltaem,

i stat naoia gogo i no save finis.

!Oltaem yumi mas presem Hae God!