OL SAM 113

Sing blong presem Hae God from gudfala fasin blong hem

(Tok i go long ol man.)

1Olgeta.

!Yumi presem Hae God!

Yumi ol man blong wok blong hem,

yumi mas presem nem blong hem.

2Bambae yumi presem nem blong hem oltaem,

i stat naoia, gogo i no save finis.

3Yumi evriwan,

i stat long is,

i go kasem long wes,

yumi presem nem blong Hae God.1

4Hem nomo i stap rulum olgeta man

long evri ples.

Nem blong hem i hae we i hae,

i bitim skae antap.

5Hae God i God blong yumi,

mo i no gat man we i olsem hem.

Hem i King,

i stap sidaon long bigfala jea blong hem

long ples blong hem antap,

6be hem i glad blong lukluk i kamdaon

long skae mo graon.

7Hem i stap leftemap ol puaman,

i stap tekemaot olgeta

long ol trabol blong olgeta.

8Hem i stap mekem olgeta

oli joen wetem ol pikinini blong king,

we oli haeman blong ol man blong hem.

9Hem i stap mekem ol woman

we oli no save karem pikinini

oli stap long hom blong olgeta,

oli glad.

Hem i stap mekem olgeta

oli karem pikinini,

nao oli glad tumas from.

!Oltaem yumi mas presem Hae God!