OL PROVEB 15

1Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.

2Taem waes man i tok, ol man oli glad long hem, mo oli wantem moa blong oli gat save, be taem man we i no gat hed i tok, hem i jes sakem ol tok olbaot nomo.

3Hae God i stap luk olgeta samting we i stap hapen long evri ples. Nating we yumi stap mekem i gud no i nogud, be oltaem, hem i stap luk yumi.

4Ol gudfala toktok i stap leftemap laef blong man, be ol toktok we i strong tumas i stap mekem man i harem nogud.

5Pikinini we i no lesin long wanem we papa blong hem i stap tijim hem long hem, hem i krangke. Be pikinini we i holem ol toktok we papa blong hem i talem long hem blong stretem hem, hem i waes.

6Ol stret man oli gat plante gudgudfala samting i stap long haos blong olgeta, be taem ol man nogud oli kasem mane, wantaem nomo oli kasem trabol tu.

7Ol man we oli waes oli stap tijim ol narafala man, be ol man we oli no gat hed oli no save mekem olsem.

8Taem ol gudfala man oli prea, Hae God i glad blong harem olgeta, be hem i no glad nating long ol sakrefaes we ol man nogud oli stap mekem long hem.

9Hae God i stap lavem ol man we oli stap wokem ol samting we i stret, be hem i no glad nating long ol fasin blong ol man nogud.

10Sipos man i stap wokem ol samting we i nogud, bambae hem i kasem panis we i meksave hem. Mo sipos hem i no save letem blong ol man oli stretem hem, bambae hem i ded from.

11Ol samting we i stap long Hom* blong ol Dedman, oli no save haed long fes blong Hae God. From samting ya, man i no save haedem ol tingting blong hem nating blong Hae God i no save luk.

12Man blong flas i no wantem man i stretem hem, mo i no save askem samtaem long man we i waes moa long hem, blong i givim advaes long hem.

13Sipos man i harem gud, ol man oli luksave long fes blong hem, be sipos hem i harem nogud, tingting blong hem i foldaon, mo fes blong hem tu i kam nogud.

14Man we i gat gud hed, hem i wantem lan moa, be man we i no gat hed, hem i glad blong stap olsem nomo.

15Ol puaman, oltaem nomo oli mas traehad blong kasem kakae blong olgeta. Be olgeta we oli stap glad oltaem, i olsem we oli lafet olwe.

16Sipos man i pua, be i stap tinghevi long Hae God, mo i stap ona long hem, hemia i moa gud, i winim we man i rij be i stap kasem trabol oltaem nomo.

17Sipos man i stap kakae drae nomo wetem ol man we oli lavem hem, hemia i moa gud, i winim we i stap kakae gudfala mit wetem ol man we oli no laekem hem nating, oli agens long hem.

18Fasin ya we man i stap kros kwik, hem i stap pulum rao i kam, be fasin we man i gat longfala tingting, hem i stap mekem ol man oli kam kwaet.

19Man we i les, oltaem rod blong hem i paspas long grasnil, be man we i stap wok had long fasin we i stret, rod blong hem i klin gud olwe.

20Pikinini we i waes i stap mekem mama mo papa blong hem, tufala i glad, be pikinini we i no gat hed i stap tingting nating long tufala.

21Man we i no gat hed, oltaem hem i stap glad long krangke fasin blong hem, be man we i waes, oltaem hem i stap makem ol fasin we i stret, mo i stap traehad from.

22Man we i stap holem ol gudfala advaes we ol man oli givim long hem, bambae laef blong hem i save gohed gud, be man we i tanem baksaed long ol advaes olsem, ol plan blong hem bambae oli foldaon.

23Sipos man i save givim gudfala tok long stret taem blong hem, bambae hem i save harem gud.

24Rod we ol waes man oli stap folem i no blong godaon long Hom blong ol Dedman, be i blong go antap blong kasem laef.

25Hae God i stap spolem ol haos blong ol man we oli stap flas, be hem i stap lukaot gud long olting blong ol wido.

26Ol rabis tingting blong man, Hae God i no laekem nating, i agens long olgeta, be ol tok blong man we laef blong hem i klin gud, hem i glad tumas long hem.

27Man we i traem blong winim mane long fasin we i no stret, bambae i pulum trabol i kam long famle blong hem. Be man we i tanem baksaed long fasin ya we man i pem narafala man blong i givhan long hem long fasin we i no stret, hem bambae i gat longfala laef.

28Oltaem, gudfala man i tingting gud fastaem, nao biaen i tok, be man nogud i stap sakem tok kwiktaem nomo, mo tok blong hem i blong statem trabol nomo.

29Taem ol gudfala man oli prea, Hae God i stap harem olgeta, be hem i stap tanem baksaed long ol man nogud.

30Man we i smael i kam long yu i save mekem yu yu glad, mo gud nius i save leftemap tingting blong yu.

31Man we i lesin gud long ol man we oli tok blong stretem hem, hem i wan waes man.

32Man we i no wantem lan, hem i stap spolem hem nomo, be man we i stap holem ol tok we ol man oli talem blong stretem hem, hem i stap kam waes moa.

33Sipos man i wantem faenem rod blong kam waes, hem i mas tinghevi long Hae God mo i mas ona gud long hem, mo sipos hem i wantem blong ol man oli ona long hem, hem i mas mekem tingting blong hem i stap daon.