HOSEA

OL TOK BLONG PROFET HOSEA

Sotfala stori blong buk ya

Profet Hosea, hem i wan profet blong Hae God, mo hem i stap long kantri ya Isrel* long not. Long taem ya, ol laen* blong Isrel we oli stap long kantri ya, oli man Isrel, mo ol laen blong Isrel we oli stap long kantri ya Juda* long saot, oli man Juda. Long taem blong profet ya, plante trabol i stap kasem olgeta. Hem i stap prij long ol man blong kantri ya, biaen long taem ya we Profet Amos i ded.

Profet Hosea i wari tumas long fasin ya we ol man Isrel ya oli stap mekem wosip long ol narafala god, nao bilif blong olgeta i no stap strong nating long Hae God. Nao hem i makem fasin blong olgeta long fasin blong woman blong hem. Woman ya, nem blong hem Goma, mo tingting blong hem i no stap strong nating long profet ya, i stap mekem i krangke wetem ol narafala man. Mo long sem fasin, ol man Isrel oli lego fasin ya we oli stap folem Hae God, oli biaen long ol narafala god. Hem i talemaot long olgeta we Hae God bambae i jajem olgeta, be from we Hae God i lavem olgeta tumas, bambae hem i tekem olgeta oli kambak long hem bakegen. Fasin blong hem blong lavem man i bigwan tumas, mo bambae i stap oltaem gogo i no save finis.

Fasin ya we i soemaot we Hae God i lavem olgeta tumas, tok blong hem i stap long Hosea 11.8, we i talem se, “!Ol man Isrel! ?Bambae mi finis long yufala olsem wanem? !Yufala i man blong mi! ?Bambae mi lego yufala olsem wanem? Mi no save kilim yufala evriwan i ded olsem we mi mekem long taon ya Admaha bifo. Mo mi no save mekem i strong long yufala, olsem we mi mekem long ol man Jeboeim bifo. Long tingting blong mi, mi no wantem nating blong mekem yufala olsem. Mi mi lavem yufala tumas, mo mi no save mekem olsem long yufala.”

Biaen long taem blong Profet Hosea, ol man Asiria oli kam winim taon ya Sameria* we i kaptel blong olgeta, nao kantri ya Isrel i finis. Samting ya i kamtru long taem ya we i gat seven handred twanti wan yia* i stap yet blong kam kasem yia ya we Kraes* i bon long hem.

Ol haf blong buk ya

Hosea i mared nao i gat famle blong hem

Hae God i tok agens long ol man Isrel

Hosea i tok strong long olgeta

blong oli tanem tingting blong olgeta