DUTRONOME 32

1Hem i talem se,

“Skae mo graon.

Yutufala i harem tok blong mi, // yutufala i lesin gud long ol samting ya

we bambae mi mi talem, // blong yutufala i witnes blong mi.

2Tok blong mi

bambae i folfoldaon olsem ren, // mo bambae i stap long graon ya, // olsem wota blong naet.

Ol tok ya blong mi

bambae i givhan long ol man, // i olsem smol ren we i folfoldaon // long ol kakae we i jes gru,

mo i olsem gudfala ren,

we i mekem gras i gru gud.

3!Bambae mi mi presem

nem blong Hae God!

!Bambae yumi evriwan i talemaot

we nem blong hem i hae we i hae!

4“!Ol laen blong Isrel!

Naoia bambae mi givim tok // we i blong ol pikinini blong yufala

we bambae oli bon long fiuja!

Hae God i strong we i strong, // mo hem bambae i gudfala ples blong haed blong olgeta.

Fasin blong hem i gud tumas, // mo hem i stret olwe nomo.

Hem bambae i God blong olgeta, // mo hem i tru.

Oltaem, tingting blong hem // bambae i stap strong long olgeta.

Oltaem hem i stap mekem

ol samting we i stret,

mo i stap mekem sem mak nomo // long olgeta man.

5Be olgeta ya, // tingting blong olgeta

bambae i no stap strong long hem.

Olgeta bambae oli no stret blong karem nem ya

se ol man blong Hae God, // from we olgeta bambae oli man blong giaman, // mo oli man blong mekem sin.

6Bambae oli ting // se oli stap mekem gudfala fasin,

be nogat.

!Bambae oli krangke!

!Bambae oli no gat tingting!

Hae God i papa blong olgeta, // mo hem nomo i mekem olgeta.

Hem nao bambae i mekem olgeta oli kam plante, // we olgeta oli gat kantri blong olgeta.

7“!Be olgeta bambae oli no mas fogetem

taem ya blong yumi!

Oltaem bambae oli mas traem go askem // long ol papa blong olgeta

blong oli stori gud long ol samting ya // we oli kamtru long taem blong yumi, // mo oltaem oli mas traem askem

long ol olfala blong olgeta // blong oli talemaot

ol samting ya we i kasem yumi. 81

God i hae we hae, // mo bifo olgeta,

hem i givim ol kantri long ol man // blong oli stap long hem.

Hem i makemaot ol ples

blong ol naranarafala laen ya // blong bambae oli stap long hem, // mo hem i putum ol laen ya

long han blong ol enjel, // blong bambae oli lukaot long olgeta.

9Be yumi evriwan, // wetem ol pikinini blong yumi

we bambae oli bon long fiuja, // yumi kamaot biaen long Jekob* ya bifo, // mo Hae God i jusumaot laen blong yumi // blong yumi kam ol man blong hem,

nao hem nomo i stap lukaot long yumi.

10“Olgeta we bambae oli bon long fiuja // bambae oli mas talemaot // long ol pikinini blong olgeta,

we long taem blong yumi, // hem i luk we yumi stap wokbaot long draeples,

long ples nating we i no gat man, // i ples blong win nomo.

Nao hem i stap blokemgud yumi

blong trabol i no kasem yumi, // mo i stap lukaot gud long yumi, // olsem we i stap lukaot long hem nomo.

11Fasin we hem i mekem long yumi, // i olsem pijin ya igel*

we i stap lanem ol pikinini blong hem // blong oli flae,

nao sipos wan long olgeta i foldaon, // bambae hem i flae aninit long hem,

i leftemap hem bakegen.

12Hae God nomo i stap lidim yumi, // mo i no gat narafala god

i givhan long hem.

13“Oltaem, // ol olfala bambae oli mas talemaot

long ol pikinini blong olgeta // we hem i tekem yufala // ol bubu blong olgeta

yufala i kam stap olbaot

long ples blong hil // long kantri ya Kenan,*

mo yufala i kakae ol gudgudfala kakae

we i stap gru long ples ya.

Long ol hol blong ston, // i gat fulap nes blong sugabag

we yufala i stap kakae hani* blong hem, // mo long ol ples we i gat tumas ston,

ol olif blong yufala oli gru gud, // mo oli karem plante frut.

14Ol buluk mo ol nani mo ol sipsip blong yufala

oli fatfat gud, // mo oli stap givim plante melek // long yufala.

Ol kakae blong kantri ya i nambawan, // mo ol waen we yufala i wokem

i red gud mo i beswan.

15“Oltaem, // ol olfala bambae oli mas talemaot

long ol pikinini blong olgeta // we ol bubu blong olgeta

oli man blong Hae God, // mo oli gat gudfala laef, // be oltaem oli stap agens long hem.

Olgeta oli man blong kakae tumas, // mo oli fatfat gud.

Hem nomo i mekem olgeta, // be olgeta oli girap,

oli gowe long hem.

Hem i gat paoa, // mo i sevem olgeta finis,

be oli girap, // oli tanem baksaed long hem.

16Ol aedol blong olgeta

oli mekem hem i harem nogud, // mo ol rabis fasin blong olgeta // i mekem hem i kros tumas long olgeta. 172

Olgeta oli stap mekem sakrefaes // long ol narafala god

we oli giaman god nomo.

Be ol god ya, // neva ol bubu blong olgeta oli save olgeta,

mo neva oli obei long olgeta samtaem.

18Hae God i God blong olgeta, // mo hem i gudfala ples blong haed // blong olgeta.

Hem i givim laef long olgeta, // mo i sevem olgeta,

be biaen, // olgeta oli no moa tingbaot hem.”

19Nao Moses i talem long ol laen blong Isrel se,

“Nao long taem ya

we Hae God bambae i luk ol samting ya, // bambae hem i kros we i kros.

Olgeta oli olsem

ol pikinini nomo blong hem, // be bambae hem i tanem baksaed // long olgeta.

20Bambae hem i talem long olgeta se, // ‘Naoia,

bambae mi no moa save givhan // long yufala bakegen.

Bambae mi stap lukluk ol samting nomo // we bambae i kasem yufala.

Yufala i stronghed tumas, // tingting blong yufala // i no stap strong long mi nating. 213

Krangke fasin ya blong yufala

we yufala i lego mi,

yufala i go biaen long ol aedol ya, // hem i mekem mi mi harem nogud tumas,

nao mi kros tumas long yufala.

Nao from samting ya, // bambae mi yusum // ol man blong wan kantri

we i no gat paoa

blong mekem yufala i jalus.

Mo bambae mi yusum // ol man blong wan neson

we yufala i luk se oli no gat hed // blong mekem yufala i kros.

22Mi bambae mi kros we mi kros.

Kros blong mi // bambae i laet olsem faea,

mo bambae i bonem // evri samting long wol ya.

Bambae hem i bonem evri samting // long Hom* blong ol Dedman,

mo bambae i bonem olgeta hil

wetem ol stamba blong olgeta daon.

23“ ‘Bambae mi mekem // we oltaem yufala i stap kasem // ol bigbigfala trabol.

Bambae mi yusum olgeta ara blong mi // blong sutum yufala long hem.

24Bambae yufala i ded long hanggri,

mo long fiva, // mo long plante narafala rabis sik.

Bambae mi mekem // ol wael anamol oli kam ronem yufala, // mo ol posen snek

oli kam kakae yufala.

25Bambae ol enemi blong yufala // oli kam mekem faet long yufala,

nao ol man we oli go long faet

bambae oli ded olbaot long big rod, // mo olgeta we oli stap long haos // bambae oli fraet we i bitim mak.

Ol yang boe mo ol yang gel // bambae oli ded,

mo ol bebi mo ol olfala

bambae oli ded evriwan.

26Yufala i man blong mi, // be mi mi rere nomo

blong spolemgud yufala, // we bambae i no moa gat man

i save tingbaot yufala bakegen,

27be mi save // se sipos mi mekem olsem,

ol enemi blong yufala // bambae oli tok flas se oli winim yufala.

Be i no ol enemi blong yufala nating, // mi nomo ya,

mo from samting ya,

mi no save mekem // i strong tumas olsem long yufala.’ ”

28Nao Moses i talem se,

“!Ol laen blong Isrel!

Tok we Hae God bambae i talem long olgeta

we bambae oli bon long fiuja, // hem i olsem.

Bambae hem i talem se,

‘!Yufala i no gat hed!

!Yufala i no waes nating!

29Ol enemi blong yufala

oli stap winim yufala, // be yufala i no save se from wanem,

mo yufala i no save se ol samting ya // bambae i finis olsem wanem.

30Yufala i mas tingbaot kwestin blong mi.

?Olsem wanem we samtaem, // wan enemi nomo, // be hem i save winim // wan taosen man blong yufala?

?Olsem wanem we tu enemi nomo, // be tufala i save winim

ten taosen man blong yufala?

!Yufala i mas luksave!

!Mi mi God blong yufala, // be mi lego yufala finis!

!Mi mi gat paoa, // be mi finis gud long yufala!

31Ol enemi blong yufala oli save // we ol god blong olgeta oli no strong,

oli no olsem mi we mi gat paoa.

32Ol enemi ya blong yufala, // fasin blong olgeta i nogud,

oli olsem ol man // blong Sodom mo Gomora bifo.

Oli olsem rop blong grep,* // we frut blong hem i konkon

mo i posen.

33Olgeta oli olsem waen // we man i wokem

long posen blong snek.’

34“Mo bambae hem i talem long olgeta se,

‘Mi mi stap tingbaot ol samting ya // we ol enemi ya blong yufala // oli mekem.

Mi stap wet nomo // blong stret taem blong hem i kam. 354

Bambae mi givimbak ol fasin ya

we ol enemi ya oli mekem // long yufala.

Bambae mi givim panis // long olgeta.

I no longtaem, // dei blong lus blong olgeta // bambae i kamtru,

mo long dei ya, // bambae olgeta oli foldaon,

oli lus olgeta.’ ” 365

Nao Moses i talem se,

“Olgeta ya we bambae oli kamaot

biaen long yufala // bambae oli man blong Hae God, // mo oli man blong wok blong hem.

Mo long taem ya we hem bambae i luk // we paoa blong olgeta klosap i finis,

mo i no moa gat man // blong givhan long olgeta, // bambae hem i gat sore long olgeta,

nao i sevem olgeta.

37Be long taem ya, // hem bambae i tok long olgeta se,

‘?Wehem ol god ya blong yufala, // we yufala i trastem olgeta // se oli gat paoa?

38Yufala i stap fidimgud olgeta // long gris blong ol mit ya blong sakrefaes,

mo yufala i stap givim waen long olgeta.

Naoia, // i gud ol god ya

oli kam givhan long yufala, // i gud oli resis i kam // blong sevem yufala.

39!Yufala i luk!

!Mi nomo mi God!

!I no gat narafala god bakegen!

Mi mi save mekem // man i ded,

mo mi save mekem

man i laef bakegen.

Mi mi save mekem man i karekil, // mo mi save mekem hem i gud bakegen.

Ol samting we mi mi mekem, // bambae i no gat man i save blokem.

40Mi mi Hae God.

Mi mi laef, mo mi stap we mi stap, // mo mi mekem wan strong promes* long yufala se,

41Bambae mi tekem naef blong faet blong mi // we i saen we i saen,

mi sapenem gogo i sap gud, // nao mi nomo // bambae mi jajem ol man.

Bambae mi givimbak ol fasin ya // we ol enemi blong mi oli mekem,

mo bambae mi givim panis long olgeta // from we oli no laekem mi,

oli agens long mi.

42Ol ara blong mi // bambae oli swim long blad blong olgeta,

mo naef blong faet blong mi

bambae i terem bodi blong olgeta.

Olgeta ya we oli faet agens long mi, // bambae mi kilim olgeta evriwan i ded.

Olgeta we oli karekil finis, // wetem olgeta we mi holem olgeta long faet,

be bambae mi kilim olgeta evriwan i ded.’ ” 436

Nao Moses i talem long ol laen blong Isrel se,

“Long taem ya, // ol man blong ol narafala kantri,

bambae oli mas joen

long ol man blong Hae God, // blong oli glad wetem olgeta.

Hem bambae i givim panis long ol man

we oli kilim ol man blong hem, // mo bambae i givimbak ol rabis fasin // we ol enemi blong hem oli mekem,

be bambae i fogivim ol man blong hem,

i tekemaot ol sin blong olgeta.”

44Olgeta tok blong sing ya, Moses wetem Josua, we papa blong hem Nun, tufala i ridim baehat i go long ol laen blong Isrel blong oli harem.

Las tok blong Moses long ol laen blong Isrel

45Nao taem Moses i talemaot ol tok ya blong Hae God finis long ol man, 46hem i talem se, “Yufala i mas lukaot gud blong obei long olgeta loa ya we mi mi givim long yufala tede. Oltaem yufala i mas tijim ol loa ya long ol pikinini blong yufala, blong tingting blong olgeta i save stap strong blong obei long olgeta tok ya blong Hae God. 47!Yufala i mas save! Ol tok ya oli no toktok nating nomo, laef blong yufala i stap long hem, mo yufala i mas obei long hem, blong bambae yufala i save stap longtaem long kantri ya we i stap narasaed Jodan Reva, we yufala i stap go blong holem.” 487

Nao long em dei ya nomo, Hae God i talem long hem se, 49“Moses. Yu mas go long ples blong hil long Abarim, long kantri ya Moab, we yu save lukluk i go long taon ya Jeriko, mo yu mas klaem long hil ya Neboho, we bambae yu save lukluk olgeta ples long kantri ya Kenan* we bambae mi mi givim long olgeta. 50Bambae yu yu ded long hil ya, stret olsem we brata blong yu Eron i ded long hil ya Horo. 51Bambae yutufala i ded olsem from we yutufala i no bin folem tok blong mi long fes blong ol man bifo. Long taem ya we yufala i stap long wota ya long Meriba, klosap long taon ya Kades, long draeples ya Jin, yutufala i no bin ona long mi long fes blong olgeta. 52Bambae yu yu stap longwe nomo, yu lukluk i go long kantri ya we bambae mi mi givim long olgeta, be yu bambae yu no save purumbut long hem.”