AMOS

OL TOK BLONG PROFET AMOS

Sotfala stori blong buk ya

Profet Amos, hem i fas profet long Baebol we oli raetemdaon plante tok blong hem. Profet ya i wan man Juda,* we ples blong hem Tekoa, long saot, be Hae God i sanem hem i go prij long ol man Isrel* long not. Ol samting ya i kamaot fastaem, nao biaen, samwe long seven handred fifti yia* i pas blong kam kasem yia ya we Kraes* i bon long hem.

Long taem blong profet ya, kantri ya Isrel i rij tumas, mo ol man blong hem oli stap gohed blong folem ol fasin blong mekem wosip, mo oli harem se oli stap gud nomo. Be profet i luk we ol rijman nomo oli gat isi laef, mo oli stap kasem ol mane blong olgeta long ol puaman, long fasin we i no stret. Oli stap ravem olgeta oltaem nomo, mo oli stap mekem i strong tumas long olgeta. Hem i luk we fasin blong wosip blong olgeta i no kamaot nating long tru tingting blong olgeta, mo we kantri blong olgeta i no stap gud nating.

Nao Hae God i sanem hem, blong hem i mas tok strong long olgeta from ol samting ya, we i no fraet nating long olgeta. Hem i talemaot we Hae God bambae i panisim olgeta from ol rabis fasin blong olgeta. Hem i talem strong long olgeta we Hae God i wantem se stret fasin blong jajem man bambae i stap oltaem long olgeta, olsem wan springwota we i stap ron, mo we stret fasin i stap oltaem long laef blong olgeta, olsem wan bigfala reva we i ron oltaem, i no save drae. Mo hem i talem tu long Japta 5.15 se, “Sipos yufala i mekem olsem, maet Hae God bambae i gat sore long haf blong yufala we bambae oli stap laef yet.”

Ol haf blong buk ya

Hae God bambae i panisim ol man blong narafala kantri

we oli stap raonabaot long Isrel

Hae God bambae i panisim ol man Isrel

Ol faef vison we Profet Amos i luk