FAS JON

FAS LETA BLONG JON

Sotfala stori blong buk ya

Faswan i blong leftemap tingting blong ol Kristin man we oli ridim leta ya, blong oltaem oli stap joen gud we oli gat wan tingting nomo, mo blong oli joen gud wetem God, mo Pikinini blong hem Jisas Kraes*.

Mo sekenwan i blong wonem olgeta blong oli no folem ol tija we tijing blong olgeta i no stret, from we ol tija ya oli save spolem jos long ol giaman toktok blong olgeta, nao bambae ol Kristin man oli no moa save joen gud long wan tingting nomo. Ol tija ya oli stap tijim ol man, se ol fasin nogud oli kamtru from we ol man oli stap long wol, mo oli stap yusum ol samting blong wol ya, mo samting ya i soemaot we Jisas*, we i Pikinini blong God, hem i no rili man olsem yumi. Oli stap talem se sipos God i sevem man, man ya bambae i no moa save tingbaot laef long wol ya bakegen, mo i nomata sipos man olsem i mekem sin no i no mekem sin, mo i nomata sipos hem i lavem narafala man no i no lavem hem, be ol samting ya i sem mak nomo.

Man we i raetem leta ya, i soemaot we hem i agensem ol tingting ya se i nogud olgeta, mo i talemaot i klia we Jisas Kraes i rili man olsem yumi. Mo hem i talem strong se olgeta man we oli bilif long Jisas, mo oli lavem God, oli mas lavlavem olgeta tu.

Ol haf blong buk ya

Fastok

Delaet mo tudak

Ol pikinini blong God mo ol pikinini blong Setan

Spirit we i stamba blong Trutok

mo spirit we i stamba blong giaman toktok

Fasin blong man we i lavem man

Fasin blong bilif we i save win oltaem