Ananun 8

Mkarem Firnanem

1Mkomnaf kada! Swarnanemya kyaru,

firnanemya iwawos.1

2Dores ro urek kapis ro nyan andir ma nyan farsamna.

3Dores kako ro ris kerwa veba vesun mundum ve kota,

ro diwa komnaf mkarem vyedi.

4Ne, snonkaku mkoya, yavaryas faro mko;

kawasa vero supswan ine, mkorower wawos ayenane!

5Vefawi mankunba mkoya, mkofarkor insa mkowasen nanem;

snonkaku venawnower mkoya, mkofarkor insa mkosmai swar nanem.

6Mkofaduru pyum wawos nane,

snar wos vekaku nairya ma ne fainda.

7Roi yakofen nanekam nkaku,

snar yamarisen kaku ankarkarnava.

8Wos vebor ayenakam nkaku,

oso vaveri fa pyaparek rova ido syasar.

9Faro snonkaku vefawi nanemsya, wos ayenane nkaku;

faro snonkaku vekara pyumsya, wos ayenane nkuksrow kaku.

10Mkove syowi kaku wos anun nane fa naba syadi ro sarak vekaku,

fawawiya vye fandun syadi ro brawen vekakur.

11Ayaine kada firnanem, vekakur syadi ro keru besnaper;

roi snembri isararan na oso vaveri fa kyakur syadi ro i.

12Ayaine kada firnanem; swarnanem,

swaruser veknon ma fawawi nanem naisya ro aya.

13Araryof faro Manseren Allah isoine vinkwanbur varvor na;

yamarisen faro ararer ma awow nava. Yave mbrov rari

evarvorna ma wos ankar srerwanan na yamarisen nava

14Ayaiso vevuk wos ananun.

Ma vevuk swarnanem faro au ro roi vebor wafrurna.

Aya vena fawawi nanem ma papoikya.

15Waireksya yasarampersi fa simbran pyum vave sasoserya,

mampapoksya yafnovek si fa srawser vavekakakuya fa davyover.

16Aya vefrurfa snopor ma Mampapok sya

sikif vavesasoserya ma simbranpyum napnapesya fa dores avyover.

17Yave syowi kaku mundiri veryav faro aya;

vesewar aya, nari sisrow kuker aya.

18Fasasos nana vebor naisya ro aya,

kako snonsnon vesmai som ma ankamayai.

19Roivebor wasmairo aya nasyadi ro brawen vekakur;

ne maeja syadi ro sarak vekaku.

20Yaso neyan venapes,

yambran ro neyan veyavyover.

21Snonkaku eve syowi ayansya, yafrur fa snana;

yafanfon rum sena ra nafo kuker arasai.

22“Ayaiso Manseren Allah syarmur vepon rak kakuya,

aya vraur Vyedi vepon randak kakuro awar-madero.2

23Ayaiso syarmur ro awar madero,

ro randak, syarmur supswan ine vaim.

24Ayaisyakwar ro vepon soren iraya isyavaim,

war mkamor vebor nakavavyai vaim.

25Ayaisya kwar fafis bon naisya vaim,

ma urekna neveyofer vaim,

26rofyor Manseren Allah syarmur supswan ine ma maper na vaim,

kako dofer saprop mnuk randakya vaim.

27Yamampumbo mandep iyasyafa vye verer, ma farsyos sansorenya ryeri ra mundi syo epen,

28fafis anya Manseren Allah ryir mandifna ro farsyos sansoren,

ma vyas war mkamor vebor vero swanyado fa narvaren ma nadaf,

29fafis anya vyuk sasoser faro masenya

insa fyarso ro vonda isyap syadi yen sare na awer.

Ayaisya kako rodiwa

fafis supswan ine Manseren Allah ryir araref vyedi ro fafisu myarari.

30Ayaisya ro ris Vyedi ve rumkun saneraro Vyedi,

ras nakam ayaiso vefrur fa sneri iryav,

yafnak vesyakwar ro varpon Vyedi.

31Yaryavyamarisen kaku ro sup swan Vyedine,

ma saneri ifo kuker doryav rofandu snonkaku sya.

32Rarirya, romawa inai babo mkomnaf ve aya!

Mkoso akyur fasna ayena, rarirya nari mkosmai aski.

33Mkomnaf pyum wos ananun ma ivye mkona swaruser veknon,

mkomamkyof awer na.

34Aski marisen faro snonkaku vemnaf aya

ma ras nakam vekain waf ro kerwa rum ayedi,

ma vewaren warek ro kerwa aidoran ayedi.

35Mansei vemarisen vesrow kuker aya, ismai kankenem,

ma isyus faro Manseren Allah I.

36Mundiri vesrow kuker ayava, ifrur kandera mankundi;

mundiri eve mbrov aya, irya vye syowi marmarya.”