Ananun 31

Ananun vebor faro wairek

1Nane ido wos ananun faro wairek Lemuel, sna vyedi fyarkor ve i.

2“Romawa saneraro ayedi, romawa yakapar snar kankarem ro nadi ayena. Rwower navye wos ananun ayenane: 3Rwir awer samambrav bena faro vinsya. Wairek sibor semompraf snar vine. 4Waswarepen, Lemuel, Aninem anggur ma farandinem, nasyusva faro wairek. 5Snar wairekya fyarandinem ido, nari vye fnder sasoserya ma snonkaku veryarvasya vye fandunsiva. 6Buk swan vesarmarsya faro snonkaku veduf ra fanam vemar ma snonkaku sne vefafardunsya fa sinem. 7Sinem si fa sefnder sovarar ma vavemarindi sena.

8Besano warek snonkaku eve sano warek mankundiva. Wakadaun snonkaku vebor veryarvasya. 9Wasaran warek si, ma be mankakara veyores avyover. Kwadaun snonkaku vesavarar ma snonkaku sarf apepensya.”

Sanandik faro swa vra vesanyanem

10Vin vra vesanyanem syamswen kaku fa kosrow i;

vye maija syadi ro keru brawen.

11Snon vyukya nari dananjar royova,

snar ikyar kaku faro i.

12Rasofa ifrur roi vevyeva faro swariva;

ras kenem vyeja kasiper ifrur pyum faro i. 13Imyaren iryur ampyampumber ma domba bur

ma imarisen ifararur kuker vramin vyesi.

14Imnis manfarvyansya kapal sena,

vevyawen rovean ker sup vevinkwan,

15Vyir ro arwo prim kaku fa fyasos anan aninem faro kina vyesi,

ra posa irarwas fararur faro mamfamyan vyesi.

16Syewar saprop mnuk oso fa kyoves;

ma ro nana ismai kwar na vyuki frur yaf anggurya.

17Fyasos vinkundi

fa ifararur marvak kaku.

18Ifawi kaku roi vebor ifrur nakam nari ismai kraf ro na;

ifararur isof rovya faduri.

19Ryip mandwam na

ma ryorem nafa ne sansun.

20Dan navye faro veyananjarsya;

ma vyenavye faro snonkaku eve fandun fanfnoveksya.

21Fafisu pnunkya ifyafer ido vye virvarva,

snar sansun vesamna fyasos na kwar faro kina vyesi.

22Syarmur yar anenef faro vinkundi;

sansun vyena kako isipna ro kruven veyafuk worem vemawai ma vedoser kaku.

23Swa vyedi vye sno,

manfarkin kota oso irya kako.

24Ifrur sansun ma riv vevovek

fa vyov faro manfarvyansya.

25Vin vesambrav rirya ma ismai syowi ro snonkaku;

ma ipok vye virvarva snar rosai nari vero ras varponya.

26Wos vyena namyaren kaku;

wawos vyena nafo kuker firnanem.

27Ifararur nasrawen kaku

ma myamepen pyum kaku fararur vero rum rido vyedi.

28Romawa inai vyesi se syowi i,

ma ismai ararer ro swari.

29Swa vyedi ikofen, “Vin vefrur pyumsya sibore,

imbape au vepyum syadadi ro sikaem.”

30Mam mayarna nafrowes ma baken vedoser nari nefromo;

imbape vin vesoyuser faro Manseren Allah I ikada ismai ararer.

31Swurf i raris fararur vyena;

isyusfa ismai syowi ro mov nakam!