Ananun 10

Wos Anun Salomo vyena

1Nane kada wos ananun ro Salomo:

Romawa-inai vena swaruser veknon sifrur doryav kma sedi;

romawa-inai venawnower sifrur sneduf snari.

2Nana kosmai kuker snefawe ne faindava,

imboi kenem venapesya nari fyaspar snonkaku bur marmar.

3Manseren Allah myam monda snonkaku kenem venapessya vo sibiserva;

imbape fandun snonkaku vevarvorsya Kyurpumna.

4Snonkaku vemananonya nari syavarar;

snonkakuyo imyaren ido nari ismai nana nabor kaku.

5Snonkaku swaruser veknonya dan bo ikram ro fafisu aninek,

mboi snonkaku veyenef ker ro fafisu aninekya ifrur mamyai mankundi.

6Snonkaku venapesya nari ismai vok,

imbape wawos snonkaku vevyeva nayofek frur vekarfiva.

7Sane beswar be snonkaku kenem venapesya idaw vok,

mbape snonkaku vevarvorya sefnder fasau i.

8Snonkaku vefawi nanemya imarisen imnaf wos farkarkor;

imboi snonkaku vefawi nanemba vo vewos pusmar nari ivorwaworek.

9Snonkaku rari venapes kenem vyedi iknon;

snonkaku veyankarkarya komambirbosi veri.

10Mundiri vefamyunepen vavekakakuya nari kenem vyedi ifo marindi;

mundiri veyawos kuker sananai, irya syeref aski.

11Wawos snonkaku venapes namnis raris marei vevuk kankenem,

imbape wawos snonkaku vevyeva nayofek frur vekarfiva sena.

12Mbrovya ifnai mbris;

Imbape saswar ma syowiya fyambrum sasar vebor.

13Snonkaku veswar nanem wawos vyena nafo kuker firnanem;

snonkaku vefawi nanemba ivyekada ismai parader.

14Snonkaku vefirnanem iryur fawawi faro i;

snonkaku vefawi nanemba, wawos vyena neninyan mankundi.

15Snokaku venana fyaduru kenem vyedi kuker nana vyena,

sobararya idaw vavemompraf ma marindi.

16Frurpyum snonkaku venapes, vavyak vyedi isoine kenem andei-marasrisen;

frur snonkaku vevarvor nvedar sasar nabor kaku.

17Mundiri vemnaf wos sansonek nari ikenempyum,

mundiri vevaryas sasar vyenava ido nari ismai marindi.

18Snonkaku vekram fasis masasorya irya snonkaku veyankarkar.

Snonkaku vefawar roi vekakuva vekur snonkaku vese irya snonkaku venawnower dirya.

19Wos nabor voken, mun nawara sasar nairi;

snonkaku veyepen ramar vyedi ikada snonkaku swaruser veknon.

20Snonkaku venapes wawos vyena namnisra sarak bekakur;

snonkaku vevarvorya kakara vyena nefaindava.

21Wawos snonkaku rari venapes, nadaw vok faro kawasa vebor;

mboi snonkaku vefawi nanembaya imar snar iswar nanemba.

22Vok ro Manseren Allah I monda evewar snonkakusya sismai nana;

fararur marvakya monda fyamfon arasai nava.

23Snonkaku venawnower imarisen ifrur sasar;

mboi snonkaku vefawi nanem iryav kaku syeref firnanemya.

24Snonkaku venapes nari ismai roi imarisen na;

mbape snonkaku vevarvor nari ismai roi imkak syadi kakuna.

25Fafis wam dover imyow kenem ine ido, snonkaku vevarvorsya nari sirwu simufer;

mbape snonkaku venapesya nari kyain fioro-fioro.

26Famyan awer snonkaku vemyarenba si, sifrur fafayaf monda au,

simnis raris ansfus vefrur mananir rova for pau vefrur praper mkamor.

27Wararyof faro Manseren Allah I rarirya nari wakenem kawan;

mbape snonkaku vevarvorsya nari simar kafadu.

28Sanekayar snonkaku venapesya nari vyuk marasrisen;

sanekayar snonkaku vevarvorya nefromo monda.

29Manseren Allah kyadaun snonkaku rari vepyum,

imbape myun pres snonkaku vefrur sasarsya.

30Snonkaku venapes nari ikenem kuker aski marisen;

snonkaku vevarvorsya nari sikenem ro sup mankun sejava.

31Snonkaku venapesya svari isasyar wos firnanem;

imbape Allah nari Isisen snonkaku vevarvorsya sisvasna.

32Snonkaku kenem venapessya wos sena nafrur sneprei;

snonkaku vevarvorsya wos sena nafrur sneduf.