भजन 72

धरमी राजा के राज

सुलेमान कर गीत

1हे सुलेमान कर भगवान, राजा के अपन नियाव बतावा,

राजटोरवा के अपन नियाइपन सिखा

2ऊ तोर परजा कर नियाव धरम लग,

अउ तोर दीन मनसेन के नियाव निक्खा-निक्खा चुकाही।

3डोंगरा अउ डोंगरन परजा के निता,

धरम के दवारा मनसेन के सान्ति मिले करही।

4ऊ परजा के दीन मनसेन कर नियाव करही,

अउ गरीब मनसेन के बचाही,

अउ सताय बाले के खंडा करही।

5जब तक बेरा अउ जोनाइहा बने रही

तब तक मनसे पीढी-पीढी तोर डर मानत रइहीं।

6ऊ चारा कर खूंटी हे बरसैबाले पानी,

अउ भुंइ सींचै बाले झाडी के जसना होही।

7ओखर राजकाल हे धरमी फूलही-फडही,

अउ जब तक जोनाइहा बने रही, तब तक सान्ति बोहत रही।

8ऊ समुंदर लग समुंदर तक

अउ बडा नदिया लग भुंइ के छोर तक राज करही।

9ओखर आगू पतेरा के रहैबाले घुटना टेकही,

अउ ओखर बैरी माटी चटहीं।

10तरसीस सहर अउ दीप-दीप के राजा दान ले आही,

सेबा देस अउ सेबा देस दुनो के राजा उपहार पहुंचाही।

11सगलू राजा ओखर परनाम करही,

राज-राज के मनसे ओखर अधीन हुइ जही।

12काखे ऊ गोहराय बाले गरीब, दुखी

अउ बेसहारा मनसे के बचाय करही।

13ऊ भिखारी अउ गरीब हे दया खइहे,

अउ गरीबन के परानन के बचाही।

14ऊ उनके परान अंधेर अउ उपदरव लग छंडाय लेही

अउ उनके खून ओखर नजर हे कीमती ठहरही।

15ऊ जिंदा रही, अउ सेबा के सोन

हे उके दय जही।

मनसे ओखर निता लगेतार बिनती करहीं,

अउ दिन भर ओखर धन्य कहत रइहीं।

16देस हे डोंगरन कर चोटिन हे बोहत लग दाना होही,

जेखर बाले लबानोन रूख देवदारन के जसना झूमही,

अउ सहर कर मनसे चारा के जसना लहलहाही।

17ओखर नाम हरमेसा बने रही,

जब तक बेरा बने रही, तब तक ओखर नाम लगेतार नबा होत रही,

अउ मनसे अपन के ओखर कारन धन्य गिनही,

सगलू राज-राज के मनसे ओही धन्य कइहिन।

18धन्य हबै यहोबा भगवान, जउन इस्राएल कर भगवान हबै,

चकित कर काम केबल उहै करथै।

19ओखर महिमा लग भर नाम हरमेसा धन्य रही,

अउ सगलू भुंइ ओखर महिमा लग परिपूरन होही। ओसनेन होय फेर ओसनेन होय।

20इसै कर टोरवा दाऊद के बिनती खतम हुइस।