Bhumiya
भजन 69
समस्या हे मदत कर निता पुकार
परधान बजामै बाले कर निता, सोसनीम राग हे दाऊद कर भजन।
हे भगवान, मोर मुकति कर, मै पानी हे
बुडे जथो।
मै बडे दलदल हे धंसे जथो,
अउ मोर गोड कहुं नेहको रुकथै,
मै गहिरा पानी हे आ गयों
अउ लेहरा हे बुडे जथो।
मै गोहराउत-गोहराउत थक गयों, मोर नटेरी
सुखाय गय हबै,
अपन भगवान कर इंतजार करत-करत,
मोर आंखी धुंधली पड गय हबै।
जउन बेगर कारन मोर बैरी हबै,
ऊ गिनती हे मोर मूंड कर चूंदी लग जादा हबै,
मोर बिनास करैबाले जउन बेकार मोर बैरी हबै,
ऊ सक्ति बाले हबै, इहैनिता जउन मै लूटो नेहको
ऊ मोके दे का पडी।
हे भगवान, तै तो मोर मूरुख के जानथस,
अउ मोर दोस तोर लग लुके नेहको हबै।
हे परभु, हे सेना कर यहोबा,
जउन तोर इंतजार करथै, उनखर आसरा मोर कारन झइ टुटै,
हे इस्राएल कर भगवान, जउन तोके खोजथै,
उनखर मुंह मोर कारन करिया झइ होय।
तोर कारन मोर बुराई होय हबै,
अउ मोर मुंह सरम लग ढंपे हबै।
मै अपन भाइयन कर आगू अनजान हुइस
अउ अपन सगा भाइयन कर नजर हे परदेसी ठहरे हव।
काखे मै तोर भवन के सुर हे जलत-जलत भसम हुइस।
अउ जउन बुराई ऊ तोर करथै, उहै बुराई मोके सहैका पडे हबै।
जब मै रोयके अउ उपास करके दुख उठाथै,
तब ओखर लग मोर नामधराई हुइस।
जब मै टाट फट्टी ओढे रथो,
तब मनसे मोर मजाक उडाउत रहै, तब मोर किस्सा उनखर हे चलत रथै।
फेरका कर लिघ्घो बइठैबाले मोर बारे हे बातचीत करथै,
अउ दारू पिये बाले मोर उप्पर लगत गीत गाथै।
पय हे यहोबा, मोर बिनती तोर खुस के टेम हे होय रहै,
हे भगवान, अपन करुना के कारन बोहत लग
अउ मुकति के अपन सही टीमा कर
जसना मोर सुन ले।
मोके बोदा मसे निकार
कि मै धंस झइ जांव, मै अपन बैरिन लग
अउ गहिड पानी मसे बच जांव।
मै धार हे बुढ झइ जांव,
अउ न मै गहिड पानी हे बुढ मरो
अउ न मै मरघटी हे जांव।
हे यहोबा, मोर सुन ले, काखे तोर करुना निक्खा हबै,
अपन दया के बोहत कर जसना मोर पल्ला धियान दे।
अपन दास लग अपन मुंह झइ मोड,
काखे मै संकट हे हव, हरबी लग मोर सुन ले।
मोर लिघ्घो आयके मोके छंडाय ले,
मोर बैरी लग मोके छुटकारा दे।
मोर बुराई अउ सरम
अउ बेज्जति के तै जानथस,
मोर सगलू दुस्ट तोर आगू हबै।
मोर हिरदय नामधराई के कारन फट गइस
अउ मै बोहत उदास हव।
मै कउनो मेर तरस खायबाले के आसरा तो करा, पय कउनो के नेहको पाइस
अउ सांति देय बाले के खोजत तो रहों, पय कउनो नेहको मिलिस।
मनसेन मोर खाय कर निता जेहर दइस,
अउ मोर पियास बुझामै कर निता सिरका पिलाइस।
उनखर खाना उनखर निता फंदा हुइ जाय
अउ उनखर सुख के टेम जाला बन जाय।
उनखर आंखी हे अंधियार छा जाय, ताकि ऊ देख झइ सकै,
अउ तै उनखर कनिहा के लगेतार कपवाउत रह।
उनखर उप्पर अपन गुस्सा भडकिस
अउ तोर गुस्सा कर आंच उनके लगही।
उनखर छाया उजड जाय,
उनखर डेर हे कउनो झइ रहै।
काखे जेही तै मारे, ऊ ओखर पाछु पडे हबै
अउ जिनही तै अदघइल करे, ऊ उनखर पीरा के चरचा करथै।
उनखर अधरम हे अधरम बढिस
अउ ऊ तोर धरम के प्राप्त झइ करै।
उनखर नाम जीवन कर किताब मसे काटे जाय
अउ धरमी कर संग लिखे झइ जाय।
पय मै तो दुखी अउ पीरा हे हव इहैनिता हे भगवान,
तै मोर मुकति करके मोके ऊंच जिघा हे बइठा।
मै गीत गायके भगवान तोर नाम के महिमा करिहों
अउ धन्यबाद करत तोर बडाई करिहों।
हइ यहोबा के बइला लग जादा, पय सींग अ
उ खुरबाले बइला लग जादा भाही।
नम्र मनसे इके देखके खुस हुइहिन, हे भगवान के खोजइहा,
तुम्हर मन हरियर हुइ जाय।
काखे यहोबा गरीबन के पल्ला कान लगाथै
अउ अपन मनसे के जउन गुलाम हे हबै, बेकार नेहको जानथै।
स्वरग अउ भुंइ ओखर महिमा करा
अउ समुंदर अपन सगलू जीव जंतु सहित ओखर महिमा करा।
काखे भगवान सिय्योन के बचाही
अउ यहूदा के सहरन के फेर बसाही,
अउ मनसे फेर उहां बसके ओखर अधिकारी हुइ जइहिन।
भगवान कर हरवाह के लरका ओही अपन भाग हे पाही
अउ ओखर नाम के परेमी ओहमा रहे करहिन।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.