भजन 58

बैरी के सजा देय के निता भगवान लग बिनती

परधान बजामै बाले के निता अल-तस्हेत राग हे दाऊद कर मिक्ताम

1हे मनसे, का तुम सहिमा नियाय कर बात बोलथा?

हे मनसे, का तुम सिधाई लग नियाव करथा?

2नेहको, तुम मन ही मन हे कुटिल काम करथा,

तुम देस भर हे उपदरव करत जथा।

3दुस्ट मनसे पइदा होउत ही पराय हुइ जथै,

उन लादा लग निकरत झूठ बोलत हर भटक जथै।

4उनखर हे सपुवा के जसना बिस हबै,

उन ऊ अजगर के जसना हबै, जउन सुनै नेहको चाहथै,

5अउ जादूगर केतका चलाकी लग

काखे नेहको मंतर पढै, तउमा ओखर नेहको सुनथै।

6हे भगवान, उनखर मुंह लग दांत के टोर दे, हे यहोबा,

उन जबान बघवा के दाढा के उखाल डार,

7उन बहत पानी के जसना हुइ जाय, जब उन अपन तीर चढामै,

तब तीर माना दुइ खन्डा हुइ जाय।

8उन घोघ किरवा के जसना हुइ जाय जउन घुलके नस्ट हुइ जथै,

अउ डउकी के गिरे हर गरभ के जसना होय जउन बेरा के नेहको देखिस।

9एखर लग आगू के तुम्हर हाडन हे कांटन के आंच लगै,

हरा या जरै, दुनो के ऊ बवंडर लग

उडाय लइ जही।

10नेक असना पलटा देख के मगन होही,

ऊ अपन गोड दुस्ट के खून हे धोही।

11तब मनसे गुठे लगही, निस्चय नेक के निता फल मिलथै,

निस्चय भगवान हबै जउन भुंइ हे नियाव करथै।