Bhumiya
भजन 56
भगवान हे भरोसा कर निता बिनती
परदान बजामै बाले कर निता, योतन-एलेम-रहोकीम कर जसना, दाऊद कर मिकताम, हइ उस टेम के हबै, जब पलिस्तियन उके गत सहर हे पकर लय रथै।
हे भगवान मोर हे अनुगरह कर, काखे
बैरी मोके लीलै चाहथै,
उन दिन भर झगडके मोके सताथै।
मोर बैरी दिन भर मोके लीलै चाहथै,
काखे जउन मनसे घमंड करके मोर लग झगडथै, ऊ बोहत हबै ।
जउन टेम मोके डर लगही,
मै तोर हे यकीन रखहुं।
भगवान के सहयोग लग
मै ओखर बचन के परसंसा करिहों,
भगवान हे मै यकीन रखे हबो,
मै नेहको डरिहों। कउनो बैरी मोर काहिन कर सकथै?
ऊ दिन भर मोर बचन के, उलटा मतलब लगाय के मरोडत रथै,
उनखर सगलू सोच मोर बुराई करै के होथै।
उन सगलू मिलके अकजिघा होथै,
अउ लुक के बइठथै, ऊ मोर गोड के देखत रथै
माना उन मोर परान के घात हे ताक लगाय बइठे होय।
का उन बुराई करके बच जइहिन?
हे भगवान, अपन गुस्सा लग देस-देस के मनसेन के गिराय दे,
तै मोर मारे-मारे फिरै के हिसाब रखथस,
तै मोर आसुन के अपन कुप्पी धर ले,
का उनखर चरचा तोर किताब हे नेहको हबै?
तब जउन टेम मै गोहरइहों, उहै टेम
मोर बैरी लउट जइहिन, हइ मै जानथों कि भगवान मोर पल्ला हबै।
भगवान के मदत लग
मै ओखर बचन कर परसंसा करिहों,
यहोबा कर मदत लग मै ओखर बचन कर परसंसा करिहों।
मै भगवान हे भरोसा रखे हव,
मै नेहको डरिहों, मनसे मोर का कर सकथै?
हे भगवान, तोर इक्छा के बोझ मोर उप्पर बने हबै,
मै तोके धन्यबाद कर बलि चढइहों।
काखे तै मोके मिरतू लग बचाय हबस,
तै मोर गोड के छिटलै लग बचाय हबस,
ताकि मै भगवान कर आगू जिन्दन कर
उजियार हे चलों फिरों?
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.