Bhumiya
भजन 135
स्तुति कर गाना
यहोबा कर स्तुति करा, यहोबा कर नाम के स्तुति करा,
हे यहोबा के सेबकन, तुम स्तुति करा।
तुम जउन यहोबा के भवन हे,
मतलब हमर भगवान कर भवन के अंगनन हे ठाड रथा।
यहोबा कर स्तुति करा काखे यहोबा निक्खा हबै,
ओखर नाम कर भजन गाबा, काखे हइ निक्खा हबै।
यहोबा तउन याकूब कर अपन निता चुने हबै,
मतलब इस्राएल के अपन खास डेरा होय के निता चुन लय हबै।
मै तउन जानथो कि हमर परभु यहोबा
सगलू देउतन लग बडा हबै।
जउन कुछु यहोबा चाहिस उके ऊ आकास
अउ भुंइ अउ समुंदर
अउ सगलू गहिरा जिघन हे करे हबै।
ऊ भुंइ के छोर लग कुहिरा उठथै,
अउ बरसा के निता बिजली बनाथै,
अउ हवा के अपन भंडार मसे निकाडथै।
उके मिस्र हे का मनसे का पसु,
सगलू के पहिला लरका छउना के मार डारे।
हे मिस्र, उके तोर बीच हे फिरोन
अउ ओखर सगलू हरवाहन के बीच चिन्ह अउ चकित करै।
उके बोहत लग देसन के नास करिस,
अउ बल राजन के।
मतलब एमोरियन के राजा सीहोन के,
अउ बासान के राजा ओग के,
अउ कनान के सगलू राजन के खून करिस।
अउ उनखर देस के बांटके,
अपन मनसे इस्राएल के भाग होय के निता दइस।
हे यहोबा, तोर नाम हरमेसा स्थिर हबै,
हे यहोबा, जउन नाम लग तोर सुरता होथै,
ऊ जुग-जुग बने रही।
यहोबा अपन परजा के नियाव चुकाही,
अउ अपन दासन के दुरदसा देखके तरस खाही।
दूसर देसन के मूरती सोना-चांदी हबै,
ऊ मनसेन के बनाय हर हबै।
उनखर मुंह तो रथै, पय ऊ बोल नेहको सकथै,
उनखर आंख तो रथै, पय ऊ देख नेहको सकथै।
उनखर कान तो रथै, पय ऊ सुन नेहको सकथै,
न उनखर कुछु सांस चलथै।
जसना ऊ हबै ओसने उनखर बनाय बाले हबै,
अउ उनखर सगलू भरोसा रखय बाले ओसनेन हुइ जइहिन।1
हे इस्राएल कर घराना, यहोबा के धन्य कहा,
हे हारुन कर घराना यहोबा के धन्य कहा।
हे लेवी कर घराना, यहोबा के धन्य कहा,
हे यहोबा कर डगइल, यहोबा के धन्य कहा।
यहोबा जउन यरुसलेम हे निबास करथै,
उके सिय्योन हे धन्य कहे जाय,
यहोबा कर स्तुति करा।
Source notes (1)
- Cross-reference भजन 115:4-8; परकासितवाक्य 9:20
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.