मरकुस 2

यीसु लोकवा मनसे के निक्खा करथै

(मत्ती 9:1-8; लूका 5:17-26)

1कुछ रोज के बाद ऊ कफरनहूम सहर छो आथै, अउ उहां के पूरे इलाका हे खबर बगर जथै, कि यीसु घर हे हबै सबरोज के जसना रहै करत रथै। 2एतका झन मनसे उहां अकजुट होथै, कि दूरा के लिघ्घो तक जिघा नेहको रथै, अउ यीसु संदेस के परचार करै लागथै। 3ता चारठे मनसे लोकवा बाले मनसे के यीसु के लिघ्घो लानथै। 4बोहत भीड के कारन ओखर लिघ्घो नेहको पहुंचथै, ता उन जछो ऊ रथै, उहै के छानी के खपरा के टरकाय के ऊ लोकवा मनसे के खटिया सहित यीसु कर आगू उतार देथै। 5यीसु चारोठे मनसे के बिस्वास के देखके लोकवा मनसे लग कथै, “हे टोरवा तोर पाप छमा हुइस।”

6उहां बइठे नियाव के गुरू अपन-अपन मन हे खयाल करै लागथै, 7“हइ मनसे असना कसना कथै? ई तो भगवान के बुराई करथै, ओखर बगैर कउनो पाप छमा नेहको कर सकथै।”

8यीसु हरबी अपन आतमा हे जान लेथै, कि नियाव के सिक्छा दे बाले अपन मन हे असना खयाल करथै, इहैनिता ऊ उनखर लग कथै, “तुम अपन मन हे काखे खयाल करथा? 9का ई बोहत लिखडी हबै कि लोकवा बाले मनसे लग कहों, कि तोर पाप छमा हुइस, या ई कहों कि अपन खटिया उठाय के रेंग बाग? 10पय तुम जान लेया कि मनसे कर टोरवा1 के भुंइ हे पाप छमा करै के हक हबै।” ऊ लोकवा नंगहा लग कथै, 11“मै तोर लग कथो, उठ, अउ अपन खटिया के उठाय के अपन घर छो कढ जा।”

12ऊ हरबी उठथै, अउ अपन खटिया के उठाय के अपन घर छो कढ जथै, उहां बइठे मनसे देखके सगलू चकरा जथै, अउ भगवान के महिमा करथै, “हम असना कबहुन नेहको देखे हबन।”

यीसु लेवी के बुलाथै

(मत्ती 9:9-13; लूका 5:27-32)

13यीसु फेरै लग गलील दहार के पाखा हे जथै, अउ सगलू झन ओखर लिघ्घो आ जथै अउ ऊ संदेस गुठेमै लग जथै। 14जइसनैन ऊ पइसा उगाहै बाले के जिघा लग जात रथै, उहै हलफई के टोरवा पइसा उगाहै बाले के जिघा हे बइठे हर देखथै, ता ओखर लग कथै “तै मोर पाछू हुइ जा” अउ लेवी यीसु के पाछू हुइ जथै।

15जब यीसु अउ चेला लेवी के घर हे भात खाय के निता बइठे रथै, ता बोहत मनसे पइसा उगाहै बाले अउ पापिन ओखर संग बइठके भात खाथै। 16कुछ नियाव के गुरू अउ फरीसी ई देखथै, कि यीसु पइसा उगाहै बाले अउ पापिन के संग भात खात रथै, ता ओखर चेला लग कथै, “ऊ पापिन अउ पइसा उगाहै बाले के संग काखे खाथै पीथै।”

17यीसु हइ बातन के सुनथै नियाव के सिक्छा दे बाले2 अउ फरीसी लग कथै, “धरमी मनसे के गुनिया पंडा के जरूरत नेहको होय, पय नंगहन के हबै ओसनेन मोर बुलउवा धरमी मनसे के निता नेहको, पय पापिन के बलामै आय हबो।”

उपास कर सबाल

(मत्ती 9:14-17; लूका 5:33-39)

18यूहन्ना कर चेला बतिस्मा देय बाले अउ फरीसी के चेला उपास करथै, ऊ मनसे यीसु के लिघ्घो आयके कथै, यूहन्ना कर चेला अउ फरीसी कर चेला ता उपास रखथै, पय तोर चेला उपास काखे नेहको रखथै? 19यीसु उनखर लग कथै, जब तक दुलहा बरतिहन के संग रथै, का उन उपास कर सकथै? जब तक दुलहा उनखर संग हबै तब तक बरतिहा उपास नेहको कर सकथै। 20पय असना रोज आही जब दुलहा के बरतिहन लग दुरिहां कर दय जही, ता ऊ टेम हे उपास करही।

21“नबा खुरथा पइजामा के जुनहा पहिरै के खुरथा पइजामा हे कउ नबा नेहको लगाथै, काखे ऊ खुरथा पइजामा ओखर मसे कुछ तिनर जथै मतलब नबा जुनहा कपडा लग लगाही अउ ऊ चिथर जही। 22अंगूर कर रस्सा अउ जुनहा खलरी के थइली हे कउ नेहको धरथै, असना करै लग अंजीर के रस खलरी कर थइली दोनो चिथर जही, इहैनिता नबा अंगूर कर रस्सा अउ खलरी के बेकार कर देही।”

यहूदियन के सुस्ताय के रोज हे सबाल

(मत्ती 12:1-8; लूका 6:1-5)

23यहूदियन के सुस्ताय कर रोज जब यीसु अपन चेला के संग खेत लग गुजरथै, तब चेला गोहूं के बाली के टोरे लागथै। 24फरीसी मनसे उके कथै, देख हइ सुस्ताय कर रोज कामकाज काखे करथै? जउन जरूरी नेहको आय।

25ऊ उनखर लग कथै, “का तोके पता नेहको आय कि जरूरत के टेम जब दाऊद अउ दाऊद के संगी भुखाय रथै, ता दाऊद काहिन करथै? 26बलि के रोटी याजक के सिबाय कउनो के खाये के उचित नेहको रथै, तोके पता नेहको आय कि अबियातार पुजारी के टेम भगवान के बिनती भवन हे जथै, दाऊद अपन साथिन के संग मिलके रोटी खथै।”

27ता यीसु उनखर लग कथै, “सुस्ताय कर रोज मनसे के निता बनाय गय हबै, न कि मनसे सुस्ताय के रोज निता। 28इहैनिता मनसे कर टोरवा सुस्ताय कर रोज के परभु हबै।”