Bhilali Bible
सभोपदेसक 8
अक्कल वाळान तसु कुण छे? ने काहनीक वातेन मतलब कुण जाण सके? माणसेन अक्कलेन वजे सी तेरो मुंहडो चमके, ने तेरा मुंहडान काठाय छेटी हय जाय।
राजान हुकुम मानु
मे बी तुसेक कह्वो की भगवानेन सगुनेन वजे सी राजान हुकुम मानु। राजा अगळ सी उतवाळ करीन पछु घुण आवे, ने नी भुंडा बुल पर धीयान देजी, काहाकी हयु जो चाहे चो करे। काहाकी राजान बुल मां ते ताकत रवे, ने कुण कय सके की तु असो काय करे? जु हुकुम काजे माने, चु परेसानी सी बची जासे, ने अक्कल वाळान मन टेम ने नीयावेन वात काजे जाणे। काहाकी हरेक वातेन टेम ने घड़ी रवे, तेबी माणसेन दुख तेरे वाटे बेसकी भारी रह्वे। हयु नी जाणे की काय हवणे वाळो छे, ने कत्यार हवसे? जो तीनाक कुण बताड़ सके? असु काहनु माणुस नी हय तेरु बस जीव पर रवे की चु तीनाक नीकळनेन टेमे रुकी लेय, ने नी कुय मरनेन दाहड़ा पर हक करे; ने नी तीनाक लड़ाय सी छुट्टी जड़ सके, ने नी भुंडा माणसे आपसा भुंडा कामे सी बची सकसे।
जतरा काम धरती पर हवे तीनु आखा काजे धीयान सी देखणे सी जो आखों काय मे देख्यु, ने असु बी देख्यु की एक माणुस दीसरा माणुस पर हक जमाड़ीन आपसा पर नुकसान लावे।
तत्यार मे भुंडला माणसे काजे मसाण मां गाड़तेला देख्यु; मतलब तींद्रो ते मसाण्यो ते बन्लो छे, बाकुन जे काहनाक वारु काम करला चे चुखला जागा सी नीकळी गुया ने तींद्रो हेर करनु बी सहर मां नी रह्यो; जो बी फालतुत छे।
भुंड्ला काम सी डंडेन हुकुम मामार नी देय; तेरेमां माणसेन मन भुंडा काम करनु मन मां भरलो रवे। चाहे पापी सोव कावा पाप करे ने आपसान दाहड़ा बी बड़ावे, तेबी मेसेक मालम छे की जु भगवान सी बीहे ने तीनाक आपसा अगळ छे करीन जाणीन बीहाणा सी चाले, तींद्रोत भलो हवसे; बाकुन भुंडला माणसेन भलो नी हवसे, ने नी तेरी उमर साहळान तसी लांबी हवसे, काहाकी चु भगवानेन बीहाणा काजे नी माने। एक फालतु वात धरती पर हवे, मतलब असा धरमी छे तींद्री ची हालत हवे जी भुंडला माणसेन हवणु चाहजे, ने असा भुंडला माणसे छे तींद्री ची हालत रह्वे जी धरमीन हवणु चाहजे। मे कह्यु जो बी फालतु छे।
तत्यार मे खुसीन बड़ाय कर्यु, काहाकी दाहड़ान नेचो माणसे वाटे खाणे-पीणेन ने खुसी रवणे छुड़ीन अळी दीसरो काय बी वारु नी हय, काहाकी जोत तेरा जीवन भर जों भगवान तेर वाटे धरती पर आपलु छे, तेरा मेहनत मां तेरे भेळे बणीन रवसे।
जत्यार मे अक्कल हात करने ने आखा काम देखणे वाटे धरती पर हवे आपसान मन लागाड़्यु, की कसु माणुस रात-दाहड़ु जागता रवे; तत्यार मे भगवानेन आखा काम देख्यु जो दाहड़ा तळे करे, तेरु पतु माणुस हेरी नी सके। चाहे माणुस तीनाक हेरने कतरु बी मेहनत करे, तेबी तीनाक जाणी नी सकसे, ने अळी अक्कल वाळु बी कवे की मे तीनाक समजी लीस, तेबी तीनाक पतु नी कर सकसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.