Bhilali Bible
सभोपदेसक 3:1
Verse 1 is marked below, with the whole chapter around it. Read from the start
आखो काय करने वाटे एक टेम ठेहरावलो छे
हरेक वातेन एक खास टेम छे, ने हरेक कामेन एक टेम छे, जों दाहड़ान हेटो छे, एक टेम छे।
पयदा हवणेन टेम, ने मरनेन बी टेम; वेरनेन टेम;
ने वेरला काजे उखाळनेन बी टेम छे;
मारनेन बी टेम, ने वारु करनेन बी टेम;
उदारनेन बी टेम, ने बणावणेन बी टेम;
रन्नेन बी टेम, ने हासणेन बी टेम;
छाती ठुकणेन बी टेम ने नाचणेन बी टेम छे;
दगड़ा उराटणेन बी टेम ने दगड़ा भेळा करनेन बी टेम;
गळे लागाड़नेन बी टेम, ने गळे लागाड़ने सी रुकणेन बी टेम छे;
हेरनेन बी टेम, ने खुवणेन बी टेम; बचाड़ीन राखणेन बी टेम,
ने उराटी देणेन बी टेम छे;
फाड़नेन बी टेम, ने सीवणेन बी टेम,
ने हुगो रवणेन बी टेम, ने बुलनेन बी टेम छे;
परम करनेन बी टेम, ने बुराय करनेन बी टेम;
लड़ाय करनेन बी टेम, ने भेळा रवणे बी टेम छे।
काम करनेवाळा काजे आपसा मेहनत सी काय फायदु हवे? मे तीना दुख सी भरला काम काजे देख्यु जु भगवान माणसे वाटे ठेहरावलु छे, की चे तेरेम लागला रवे। चु आखो काय असो बणायु की आपसा टेम पर चे वारलु रवे; अळी चु माणसेन मन मां पेहलेन ने जलमेन टेमेन अक्कल पयदा कर्यु, तेबी जो काम भगवान करलु छे, चों पेहलुत सी जलम लग माणसेन समज मां नी आय सके। मे जाण लेदु की माणसे वाटे खुसी मनावणेन ने जीवन भर भलाय करनु ने तेर पाखुर अळी काय बी वारु नी हय; ने जो बी भगवानेन दान छे की माणुस खाय ने पीये ने आपसा आखा मेहनत मां सुखी रवे।
मे जाणो की जो काय भगवान करे चो जलमको टेकलो रवसे; नी ते तेरेम काय बड़ाय सके ने नी काय घटाय सके; भगवान असु तेर सी करे की माणसे तेरो बीहाणो माने। जो काय हयो चो हेरेसी पेहेल बी हय चुक्यो; जो काय हवणे वाळो छे, चो बी हय चुक्यो; ने भगवान वीतली वात काजे अळी पछु पुछे।
कळजुग मां नीयाव नी
अळी मे दाहड़ान हेटु काय देख्यु की नीयावेन जागा मां नीयाव नी, ने धरमेन जागा मां धरम नी हय। मे मन मां कह्यु, भगवान धरमी ने नी धरमीन दुयुन नीयाव करसे, “काहाकी तेरेन्चां एक-एकेक वात ने एक-एकेक कामेन टेम छे।” मे मन मां कह्यु, “जो असो करीन हवे की भगवान माणसे काजे पारखे की चे देख सके की चे जनवार्यान तसा छे।” काहाकी जसो माणसेन तसोत जनवार्यान बी दसा रवे; दुयुन दसा रवे, जसु एक मरे तसात दीसरा बी मरे। आखान सांस एक जसी छे, ने माणुस जनवार सी काय अदुस बड़ीन नी; आखों काय फालतुत छे। आखा एक जागाम जाय; आखा धुळा सी बन्ला छे, ने आखा धुळात मां भेसकाय जासे। काय माणसेन जीव उपर ने जनवारेन जीव हेटो जाय्न धुळा मां भेसकाय जाय? चो कुण जाणे? तेरेमा; मे असु देख्यु की हेरे सी अदुस काय वारु नी की माणुस आपसा काम मां खुसी सी रवे काहाकी तेरो भाग जोत छे; कुण तेर पछळ हवणेवाळी वात काजे देखणे करीन तीनाक पछु ली आवसे?
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.