भगवानेन छाचला बुल
रोमी 4
अब्राहमेन दाखलु
तेरेमां हामु अब्राहमेन बारामां काय कहंजे जु डीलेन अनसारे हामरु डाहालु हतलु तीनाक काय जड़्यो? काहाकी कदी अब्राहमेन काम सी धरमी गीणायतु, ती तीनाक मटाय करनेन जागु रवतु, बाकुन भगवान अगळ तीनाक मटाय करनेन गाळु नी हय। चुखलो सास्तुर1 काय कहें? ज्य की, “अब्राहम भगवान पर भुरसु कर्यु, ने जु भुरसु तेरे वाटे वारलु गीणायु।” काम करने वाळान दाहड़की आपणु दान नी, बाकुन हक गीणाये। बाकुन जु काम करनु रवणी दीन तीना भगवान पर भुरसु करे, चु पापी काजे वारलु गीणे, ती तेरु भुरसुत तेरे वाटे वारलु गीणायसे। ईनी भाती दावुद हीना माणुस काजे वारु कह्वे, तीनाक भगवान काम करे पाखुर वारलु बणावे:
“वारु छे चु, तेरु पाप माफ हय गुयु,
ने तेरा पाप ढाकाय गुया।
वारु छे चु माणुस तीनाक भगवान पापी नी कहें!”
ती ज्य वारु बुल, काय फतरी काटाड़न्या नीते फतरी नी काटाड़्या हींद्रे वाटे बी? हामु ज्य कहंजे, “अब्राहम हेरा भुरसान साहरे खरलु धरमी गीणायु2।” ती चु वारलु कसु गीणायु? फतरी काटाड़लु ती, की फतरी नी काटाड़्यु ती वारलु गीणायु; बाकुन चु ते फतरी काटे पाखुर वारलु गीणायलु। ने अळतेन चु भुरसान साहरे धरमी गीणायलु छे ज्य देखणे करीन सहलाणी वाटे फतरी काटाड़्यु, पेहल चु फतरी काटे पाखुर भगवान पर भुरसु करलु हतलु। ने असु करीन चु अब्राहम तीनु आखान बास गीणाये; ने असु करीन चु फतरी नी काटाड़े तींद्रु बास गीणायु, जे अब्राहमेन तसा भगवान पर भुरसु करीन जीवे, तसु अब्राहम बी फतरी काटाड़े पाखुर पेहेल भगवान पर भुरसु करतेलु।
भुरसु ने भगवानेन बुल
काहाकी भगवान अब्राहम ने अब्राहमेन अवल्यात काजे वायदु करलु की चे कळीन हकदार्या बणसे। अब्राहम कायदाक मान्यु करीन भगवान असु वायदु नी कर्यु, बाकुन चु भुरसु कर्यु करीन भगवान हीनाक धरमी गीणायु। काहाकी कदी मुसान कायदा पाळन्यात वायदान जागु हात मां करसे, ती ते भुरसु करने सी काय फायदु नी हय ने भगवानेन वायदु करली वात बी फालतु हय गुय। मुसान कायदु ते भगवानेन रीस काजे उबजाड़े ने चां कायदु नी हय, चां कायदु तुड़नेन वात नी आवे।
भगवानेन वायदु भुरसान फळ छे ने ज असोत जड़े। तीने रीते तेरा बुले अब्राहमेन आखा वाटे ते चेत, ने जे नीयम काजे माने तींद्रे वाटे नी बाकुन तीनु आखा वाटे बी जे अब्राहमेन तसा भुरसु राखजे। चु हामरु आखान भगवान बास छे। तेरेमां ज पाक्को छे जसों की लिखलो छे, “मे तुसे काजे बेसका माणसेन बास ठेरावलु छे।” भगवानेन नींगा मां अब्राहम हामरु बास छे। अब्राहम भगवान पर भुरसु कर्यु, जु भगवान मरला काजे जीवाड़े ने जे हय नी तीनु काजे बी घड़ीन उबजाड़े। अब्राहम नीरासेन दाहड़ाम बी आस राखीन भुरसु कर्यु ने चु बेसकी जातीन माणसेन बास बण गुयु, जसों तीनाक कहंलो हतलो की तारा गीणाये नी अतरा माणसेन बास हवसी। अब्राहम भुरसा मां पाक्कु बणीन रयु ने असु जाणतेलु तेबी की हेरो डील सोव सालेन हय गुयली छे ने सारान पुर्या नी हवतेला। भगवानेन वायदा पर भुरसु बणायन राख्यु अतरुत नी भुरसा काजे काठु करतु जाय्न भगवानेन सेक-सींगार कर्यु। तीनाक पाक्कु भुरसु हतलु की भगवान तीनी वातेन वायदु करलु छे, चु तीनाक पुरु करीन छुड़से। हेरे वजे सी भगवान अब्राहम काजे खरलु धरमी। ने गुयु बुल की भुरसुत तेरे वाटे धरम गीणायु, तेरे वाटे अतरुत नी बाकुन आपणे वाटे बी लिखलो छे। आपणु बी भुरसा सी वारलु गीणायसुन। काहाकी आपणु तीना भगवान पर भुरसु करजे, जु मालीक ईसु काजे मरलाम सी जीवाड़लु छे। हयुत ईसु आपणात पाप गुनान करता मरणे करीन धराय गुयु ने आपणुक वारलु बणावणे करीन मरलाम सी जीवतु हय्न बठु बी हय गुयु।
Source notes (2)
- Footnote चुखलो सास्तुर पवित्रशास्त्र
- Footnote धार्मिकता
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.