भगवानेन छाचला बुल
फीलीपी 3
खरलु धरम
ती मारा भायस ने बहणस्या भगवानेन पुर्या-पारी बण गुया, करीन मालीक ईसु मसी मां खुस रहु। गलत सीकाड़न्यान बारामां जी वात अळी-अळीन लिखणे सी मेसेक दुख नी लागतो काहाकी हेरे मां तुंद्रीत राखवाळी ने भलो छे। कुतरान तसा कुहर्या माणसे सी, ने भुंडो काम करने वाळा सी चेतीन रहु। ने तीनु फतरी काटाड़्ने वाळा माणसे सी चेतीन रहु। काहाकी फतरी-काटण्या ते आपणुत छे। जे भगवानेन चुखली-आत्मान साहरे भगवानेन भक्ती करने करीन, ने ईसु मसी पर अतरीत मटाय करजे, ने आपणा डीलेन उपरनी रीती भाती पर भुरसु नी करजे। मे ते डील पर भुरसु कर सको, कदी काहनाक डील पर भुरसु करनेन वीच्यार हय, ती मे हेरे सी बी जादा डीलो पर भुरसु कर सको। काहाकी आठवे दाहड़े मारा पेरवोटोन अगली फतरी काट्या। मे ईस्रायेली माणसेन अवल्यात छे, ने मारा आड़ा-बुड़ा आखान आखा ईब्रानी जातीन छे। मे बीन्यामीन कुळी मायन छे, ने कायदा पाळनेन हीसाबे मे फरीसी माणसेन टुळीन हतलु, ने असुत कायदा पाळतेलु। हिम्मतेन हीसाबे मे ईसुन मंडळीक वेला पाड़न्यु हतलु, ने कायदा पाळीन जड़न्या धरमेन हीसाब, मे माणसेन नींगा मां नी-गुनाळु हतलु। बाकुन जी-जी वात पेहले मारु फायदु करती तीनी-तीनी वातेक, ईसु मसीन अनसारे नुकसाण देणे समजी लेदु। अतरोत नी बाकुन, ईसु मसी काजे; मारु मालीक छे करीन जाणनो आखाम सी वारुत समजीन, मे आखी दीसरी वातेक हेटी ने नेची समजी लेदु। तेरे सी मे आखी चीजेन नुकसाण झेल्यु। ईसु मसी काजे हात करने करीन, मे तीनी चीजेन नुकसाण झेल्यु, तीनी आखी चीजेक कचरु समजो; ने मे ईसु मसी साते एक हीयु बणीन रहो। ने कायदा पाळने सी जड़ने वाळा धरम भेळ मे नी रहो। बाकुन तीना धरम भेळ, ईसु मसी साते एक हीयु बणीन रहो, जु ईसु मसी पर भुरसु करने सी मेसेक जड़े। जु धरम नीस्तु ईसु पर भुरसु करने सीत भगवान वगे सी जड़े। तेरेसी मे ईसु मसीक ने तेरु पछु जीवतु करनी ताकत काजे जाणीन, ने तेरे साते दुख ने मोत मां एक हय्न मे बी काहींग करीन मरलाम सी पछु जीवतु हवणेन हात कर सको।
ईसुन माणसेन ठीयु
ज नी हय की मे पछु जीवतो हवणु हात कर लेदु, नी ते पुरु-पुरु पाक्कु हय जु, बाकुन पछो जीवतो हवणु हात करने करीन अगु-अगु जाणे बाजी र्यु। ईनात ठीयान साहरे ईसु मसी मेसेक नेवाड़लु हतलु। ए भायस्यो ने बहणस्या, मारु जु वीच्यार नी हय की मे पछु जीवतो हवणु हात कर लेदु, बाकुन जो एक काम करो, की जी वात पछळ रय गुय तीनी वातेक ईसरीन अगु-अगु जाय र्यु पछु जीवतु हवणेन ठीया भीणी दवड़ीन जाणे बाजी रयु, की चो ईनाम हात करो, तीना ईनाम वाटे भगवान, मेसेक ईसु मसी मां उपर सरगे मां पछु बुलावलु छे।
आपणे मां जतरा बी आपसाक पुरा-पुरा पाक्का समजे, तीनुक मारेन तसुत वीच्यार करनु चाहजे ने कदी ईनी वात मां वीरुद हये, ती भगवान ईनी वातेक बी तींद्रे अगळ उजेंती कर देसे। हेरेसी भगवानेन कह्याम चालता जाय्न जां लग आपणु पुग गुयला छे, तेरेत अनसारे वेहवार करीन जीवणु चाहजे।
ए भायस्यो ने बहणस्या, तुहुं आखा जणा मारेन तसा जीवु, ने तीनुक धीयान लागाड़ीन उळखी लेवु, जे ईनेत हीसाबे जीवे जसा तुहुं हामुक जीवतेला देख रया। काहाकी मे तुहुंक पेहले बेसका कावा कय देदलु, ने हय बी रड़तु जाय्न कय र्यु की, तुंद्रे ईचमां थुड़ाक असा बी छे, जे आपसा गलत वेहवार ने जीवाय्न साहरे ईसु मसीन वेरी बण रया, जु तींद्रा पाप धड़े पेहले कुरुस पर मरलु। चे ते आपसी लाजवाय्न वात पर मटाय करे। तींद्रु भगवान ते पेटुत छे, ने ईनी कळीन चीज पर मन लागाड़्या करे; ने चे आकरी मां बरबाद हय जासे। बाकुन आपणो असली घर ते सरगे मां छे। चां सी आपणुक छुड़ावणे वाळु मालीक ईसु मसी आवणे वाळु छे। ने आपणु हेर करीन तेरी वाट देख र्या। चु तेरा चुखली-आत्मान ताकतेन साहरे कळीन आखी चीजेक आपसा कब्जा मां करन्यु छे, ने चु तीनाक चुखली-आत्मान साहरे, आपणा कमजुर डीलेन सीकाक बदलीन, आपणा सेक-सींगार भर्या डीलेन सीका मां बदली देसे।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.