भगवानेन छाचला बुल
मत्ती 8
ईसु कुड़ायला माणसेक वारु करे
(मरकुस 1:40-45; लुका 5:12-16)
जत्यार ईसु तीना बयड़ा सी नेचु उतर्यु, ती एक माणसेन मट्लु टुळु तेरे पछळ आयु। ने देखु, एक कुड़ायलो तेरे धड़े आवीन ईसुक आंध्यु ने कह्यु, “ए मालीक, कदी तु चाहे, ती मेसेक वारु कर दे।”
ईसु तीनाक छीमीन असु कह्यु, “मारी मरजी बी असीत छे, तु चुखु1 हय जां!” ने हयु तत्यारुत कुड़ सी चुखा हय गुयु। ईसु तीना काजे कह्यु, “देख, जी वात कुय काजे घुण कहें, बाकुन जाय्न पुजाराक बताड़जी ने मुसान कायदान अनसारे भेट चड़ावजी, ती आखा माणसे जाण जासे ने गवा बण जासे की तु वारु हय गुयु।”
एक रोमन सुबेदारेन भुरसु
(लुका 7:1-10)
जत्यार ईसु कफरनहुम सहर मां पुग्यु ती एक सुबेदार तेरे धड़े आवीन तेरे सी लीलघाय्न कह्यु, “ए मालीक, मारा पावर्यान लखवु हय गुयु, ने घर मां पड़ीन एला कर रयु।”
ईसु तीना काजे कह्यु, “मे आवीन तीना काजे वारु कर दीस।”
सुबेदार जपाप आप्यु, “ए मालीक मे अतरु वारु नी हय की तु मारा घरेन साहळे आवे, बाकुन तु जात रय्न एक बुल कय दे, ती मारु पावर्यु वारु हय जासे। काहाकी मे बी दीसरान हक मां रवण्यु एक नानुस हकदार्यु छे, ने सीपायड़ा मारे हक मां रहे जत्यार मे एक सी कहं ‘जां!’ ती चु जाय; ने दीसरा सी कह्, ‘आव!’ ती चु आवे; ने जत्यार मारा पावर्यु सी कह्, ‘ज कर!’ तीना काम काजे करे।”
ज सामळीन ईसु चक्कर मां पड़ गुयु, ने जे तेरे पछळ आवतेला तीनुक कह्यु, “मे तुंद्रे सी छाचलीन कहं की मे ईस्रायेली माणसे मां बी मेसेक अतरु पाक्कु भुरसु देखणे नी जड़्यु। मे तुंद्रे सी कहं की उगेवणा ने बुडवणा सी बेसका माणसे आवीन अब्राहम ने इसाक ने याकुप साते सरग वाळा भगवानेन राज मां बठीन खाणो खासे। बाकुन जे भगवानेन सरग राजेन हकदार्या माणसे छे, बाकुन चे भुरसु नी करे, तीनु काजे सरग राजेम सी बाहार आंदारला मां नाख देसे। चां कलपी-कलपीन रड़सु ने दात काजे ककड़ावता रवसु।” तत्यार ईसु तीना सुबेदार काजे असु कह्यु, “जां, जसु तारु भुरसु छे, तसुत तारे वाटे बी हय जाय।”
ने तेरु पावर्यु तत्यारुत वारु हय गुयु।
ईसु भाती-भातीन मांदला माणसे काजे वारु करे
(मरकुस 1:29-34; लुका 4:38-41)
ईसु जत्यार पतरसेन घर मां आयु, ती पतरसेन सासुसेन सेरी आय रवलो देख्यु। ईसु तीनी पर हात मेक्यु ने तेरो सेरी तत्यारुत उतरी ज्य, ने ची उठीन ईसुन चाकरी करने बाजी गुय।
जत्यार सांती वेळाय चे ईसु धड़े बेसका माणसे काजे लाया तींद्रे मां भुतड़ान आत्मा हतली ने ईसु तीनु आत्मा काजे तेरा बुल सी नीकाळ देदु; ने आखा मांदला काजे वारु कर्यु। काहाकी ज बुल यसायाह भगवानेन अघी सी आवणे वाळी वात देखान्यान साहरे कह्लो हतलो च पुरो हवे, “चु आपसु हामरी आखी लुल्गाय काजे झेल लेदु ने हामरी मांदवाड़ काजे छेटु कर देदु।”
ईसुन चेला बणनेन कीमत
(लुका 9:57-62)
जत्यार ईसु तेरे चारे मेर एक मटला टुळा काजे देख्यु, ती डाबरान पली धड़े जाय्न हुकुम आप्यु की, तुहुं मेसेक ढंड्या मां बठाड़ीन दरीयान पली धड़ ली जाती रवु। तत्यार एक यहुदी नीयमेन मास्तर्या ईसु धड़े आवीन कह्या, “ए मास्तर, जांहा बी तु जासी, मे तारे पुठ्ये आवीस।”
ईसु तीनुक कह्यु, “फुंदाळी खुखड़ीन दर रवे ने सरगे चिरलान बसणेन पुत्रु रवे; बाकुन माणसेन पुर्या वाटे ते मुणको ढाकणेन लग जागु नी हय।”
एक दीसरु चेलु ईसु काजे कह्यु, “ए मालीक मे तारे पुठ्ये आवीस बाकुन मेसेक मारा बासेन घर जाणी दे, की जत्यार चु मर जासे ती तीनाक गाड़ दीन मे तारे पुठ्ये आवीस।”
ईसु तीनाक कह्यु, “मरला काजे गाड़ने काम मरलात काजे करने दे; तु ते मारे पुठ्ये चाल।”
आंधी ने दरीयान झलक लग ईसुन हुकुम माने
(मरकुस 4:35-41; लुका 8:22-25)
जत्यार ईसु ढंड्या मां बठ्यु ती तेरा चेला बी तेरे पुठ्ये बठ गुया। ने, तीनी टेम दरीया मां उचकान बेसकी मटी आंधी आवी, ने दरीयान झलक ढंड्ये आपठायन बाकुन ईसु ते, सुवणे बाजी रवलु। तत्यार चेला ईसु धड़े आवीन उठाड़्या ने कह्या, “ए मालीक हामुक!” बचाड़ नी ते “हामु आखा डुबीन मरने बाजी रया!”
ईसु तीनुक कह्यु, “ए! कम भुरसा वाळा, तुहुं काहा बीही रया!” तत्यार चु उठीन आंधी ने पाणी काजे लड़्यु, ने आखो सेळो पड़ गुयो।
ने चे चकराय गुया ने कह्णे लाग्या, “गुयु कसलु माणुस छे की आहळी2 ने पाणी बी हेरी वात काजे माने।”
ईसु भुतड़ान आत्मा भरायला दुय माणुस काजे वारु करे
(मरकुस 5:1-20; लुका 8:26-39)
जत्यार चु पली धड़े गदरेन्यान ईलाका मां पुग्यु, ती दुय माणसे तींद्रे मां भुतड़ान आत्मा हतली ची मसाण मां सी नीकळ्या ने ईसुक भेळा हवणे आया। चे अतरा ताकतवाळा हतला की कुय बी तीनी वाट सी जाय नी सकतेला। चे आयड़ीन असा कह्या, “ए भगवानेन पुर्या, हामरे साते तारो काय काम छे? काय तु हामुक एला पाड़ने आय र्यु?” हींद्रे सी ईतरेक छेटेस बेसकु मटु सुहर्यान टुळु चरने बाजी रवलु। भुतड़ान आत्मा ईसुक असी कवीन लीलघायणे लागी की, “कदी तु हामु काजे अदमी मां सी नीकाळे, ती पला सुहर्यान टुळा मां मकली दे।”
ईसु तीनुक कह्यु, “जावु!” ने चे अदमी मां सी नीकळीन सुहर्यान टुळा मां भराय गुया, ने आखा टुळा आड़खा पर सी झपटीन पाणी मां डुबीन मर गुया।
ने सुहर्या काजे चारन्या गुवाळ्या ढास्या, ने सहर मां जाय्न हयो, च आखो कय देदा ने भुतड़ा लागला माणसेन काय हयो च बी कय देदा। तत्यार आखा सहरेन माणसे ईसु सी मेळने करीन आयु, ने ईसुक देखीन लीलघाय्न कह्णे लाग्या की हामरी मुलकेम सी बाहर जाती रव।
Source notes (2)
- Footnote शुध्द
- Footnote आंधी
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.