मत्‌‌ती 3

युहन्‌ना बपतीस्‌मा आपणे वाळान परचार

(मरकुस 1:1-8; लुका 3:1-18; युहन्‌ना 1:19-28)

1तीनु दाहड़ा मां युहन्‌ना बपतीस्‌मा आपणे वाळु आवीन यहुदीयान बयड़ा मां असु परचार करने बाजी गुयु, 2“पाप भीणी सी मन फीराय्‌न भगवान भीणी वळु, काहाकी सरगेन राज धड़ेत1 आय लागलो छे!” 3जु युहन्‌‌‌नु हयुत छे तेरे बारामां भगवानेन अघी सी आवणे वाळी वात बताड़न्‌या माणुस यसायु माणुस कहलु की,

“बयड़ा मां एक आयड़ने वाळान आवाज सामळाय रय,

की मालीकेन वाट2 काजे तीयार करु,

ने तेर वाटे सयड़क काजे सुदी करु।”

4चु युहन्‌‌‌नु उटड़ान कान्‌‌यान पुथल्‌यो पेहरी रवलु, ने चामड़ान पट्‌टु कमर मां बांदी रवलु। तेरो खाणो टिड्‌डा ने बयड़ा मायन मुहाळ हतलो। 5तत्‌यार यरुसलेम सहर वाळा ने आखा यहुदीया जीला, ने यरदन नदीन आड़े-धड़ेन वाळा बेसका माणसे तेरे धड़े आया। 6चे आपणा-आपणा पाप काजे मानीन भगवान भीणी वळता जाय्‌न यरदन नदी मां युहन्‌ना सी बपतीस्‌मा लेदा।

7जत्‌यार युहन्‌ना बेसका फरीसी माणसे ने सदुकी माणसे काजे बपतीस्‌मा लेणे करीन तेरे धड़े आवतेला देख्‌यु, ती तीनुक कह्‌यु, “ए घड़सान पीला, तुहुंक कुण बताड़ देदो की आवणे वाळी रीस3 सी ढासु? 8ने कदी तुहुं पाप भीणी सी मन फेरवु ती तसा वारु फळ बी लावसु, 9ने आपणा-आपणा मन मां असा वीच्‌यार बी मां करु की हामु हामरा आड़ा-बुड़ान डाहलु बास अब्‌राहमेन अवल्‌यात छे; मे तुंद्‌रे सी कहं की, भगवान हीनु दगड़ा सी बी अब्‌राहम वाटे अवल्‌यात पयदा कराड़ सके। 10ने झाड़कान मुळ्‌या पर कुरहाड़ मेकली छे, काहाकी जो झाड़को वारलु फळ नी लावे, तीना काजे काटीन आकठा मां नाख देसे। 11मे ते पाणी सी तुहुं काजे मन फेरवणेन बपतीस्‌मा देदलु छे, बाकुन जु मारे पछळ आवणे वाळु छे, चु मारे सी बी मटु छे, मे तेरा खासड़ा हाकलने लायक बी नी हय, चु तुहुंक चुखली-आत्‌मा ने आकठा सी बपतीस्‌मा देसे। 12तेरो सुपड़ो तेरा हात मां छे, ने ईसु तेरा खळा मायन कचराळा दाणा काजे वारु वाहळा मां उडाड़ीन चुखाळसे, ने तेरा गहुं काजे ते कणगी मां भेळु करसे, बाकुन चारा काजे जलम नी उल्‌हायें तीना आकठा मां नाख देसे।”

ईसु युहन्‌ना सी पाणी मां बपतीस्‌मा लेय

(मरकुस 1:9-11; लुका 3:21,22)

13तीनी टेमे ईसु गलील जीलाम सी चालीन यरदन नदी मां युहन्‌ना धड़े बपतीस्‌मा लेणे आयु, 14बाकुन युहन्‌‌‌नु असु कय्‌न ईसु काजे रुकणे बाजी गुयु, “मेसेक ते तारा हात सी बपतीस्‌मा लेणेन जरुवत छे, ने तु मारे धड़े काहा आयु र्‌यु।”

15बाकुन ईसु तीना काजे असु जपाप4 आप्‌यु, “हय ते असोत हवणी दे, काहाकी हामु ईनीत रीते आखा वारलु काम माणसे काजे पुरो करनु जी भगवानेन मरजी छे।” तत्‌यार चु तेरी वात काजे मान लेदु।

16ने तत्‌यार ईसु बपतीस्‌मा ली लेदु। ने जसु पाणीम सी बाहर नीकळ्‌यु, तत्‌यार सरग खुल गुयो। ने हयु भगवानेन5 आत्‌मा काजे पेरवान तसु उतरतेलु ने तेरे उपर आवतेलु देख्‌यु। 17ने तत्‌यारुत, उपर सरग सी असी अवाज आवी की, “जु मारु लाटेक्‌लु पुर्‌यु छे। हेरेसी मे बेसकु खुस छे।”