भगवानेन छाचला बुल
मत्ती 27
ईसु काजे पीलातुस अगळ ली जाय
(मरकुस 15:1; लुका 23:1,2; युहन्ना 18:28-32)
जत्यार एगात1 आखा मुख्या पुजारा ने माणसेन डाहा बुड़ा ईसु काजे मार नाखणे करीन मुजगी कर्या। चे ईसुक बांद्या ने ली जाय्न पीलातुस सरकारेन हात मां आप देदा।
यहुदान मरनु
(नेवताळा 1:18-19)
जत्यार तेरु धराड़ने वाळु यहुदा देख्यु की तेरे उपर गुनु लाग गुयु ती हयु पसतायु ने हयु तीस चांदीन सीक्का काजे मुख्या पुजारा ने डाहा बुड़ा नेता भीणी पछु देणे लीन आयु ने कह्यु, “मे नी-गुना वाळा खुन करीन धराड़ीन पाप कर्यु!” चे कह्या,
“हामुक काय करनु? तुत जाण।” तत्यार हयु तीनु सीक्का काजे मंदीर मां नाखीन जाती रयु, ने जाय्न आपसुत टांगायन मर गुयु।
मुख्या पुजारा तीनु सीक्का काजे लीन कह्यु, “तीनुक, दान पेटी मां मेकणु वारु नी हय, काहाकी जे खुनेन कीमत वाळा छे।” तेरेमां चे मुजगी करीन तीनु सीक्का सी पारका देसेन माणसे काजे गाड़ने वाटे कुमाहरेन खेत मुल ली लेदा। ईनी वजे सी च खेत आज लग लुहीन2 खेत कह्वाये।
तत्यार ज बुल यीर्मयाह भगवानेन अघी सी आवणे वाळी वात देखान्यान साहरे कह्वलो हतलो च पुरो हयो: “चे तीनु तीस सीक्का मतलब तीनु ठहरावली कीमत काजे तीनाक ईस्रायेली माणसेन अवल्यात मायन जतरा ठहरावलो हतलो ली लेदा, ने जसों मालीक मेसेक हुकुम देदु तसोत कुमाहरेन खेतेन कीमतेन हीसाब मां दी देदु।”
पीलातुस ईसु सी सवाल पुछे
(मरकुस 15:2-5; लुका 23:3-5; युहन्ना 18:33-38)
जत्यार ईसु रोमी सरकार पीलातुस अगळ उबु हतलु, ती सरकार वाळु, तीना काजे पुछ्या, “तु यहुदीन राजु छे?” ईसु तीना काजे कह्यु, “तु आपसुत कय रयु।” जत्यार मुख्या पुजारा ने आड़ा-बुड़ा नेता तीना उपर गुनु लागाड़ रवला, ती हयु काय बी जपाप नी देदु।
अतरा पर पीलातुस सरकार वाळु तीना काजे कह्यु, “काय तु नी सामळतु, की जे तुसे धराड़ने करीन कतरी गवाय दी रया।”
बाकुन हयु तीना काजे एक वातेन बी जपाप नी देदु, ने जां लग बी की सरकार वाळा बी घाबराय गुया।
ईसुक मारने करीन डंडेन हुकुम
(मरकुस 15:6-15; लुका 23:13-25; युहन्ना 18:39—19:16)
सरकारेन असी रीत हतली की तीना तीहवार मां एक केदी काजे जेल मां सी छुड़तेलु, ने माणसे तीना काजे बी कह्वतेला तीनाक छुड़ दे तीना काजे छुड़ देदलु। तीनी टेमे तींद्रेन्चां एक बरअब्बा नावेन एक अंजाण्यु माणुस जेल मां हतलु। ने जत्यार चे भेळा हया, ती पीलातुस तीनुक पुछ्यु, “तुहुं कुणीन चाहु की मे तुंद्रे वाटे छुड़ दम? बरअब्बा काजे, की ईसुक चु मसी कह्वाये?” काहाकी हयु जाणतेलु की हया तीना काजे कुहराये धराड़ला छे।
जत्यार हयु नीयावेन गादी पर बठी रवलु ती हेरी घरवाळी कय मकली, “तु तीना वारलु माणसेन लफड़ा मां हात घुण नाखे, मे आज सपना मां तेरे वजे सी बेसकी मटी दुख हाकेलु।”
मुख्या पुजारा ने डाहा बुड़ा नेता माणसे काजे समजाड़्या की चे बरअब्बा काजे छुड़नेन मांग करे, ने ईसु काजे खत्तम कराड़ देय। सरकारी पीलातुस तीनुक पुछ्यु, “हीनु दुय मायन कुणीक तुहुं चाहु, की मे तुंद्रे वाटे छुड़ दम?” चे कह्या, “बरअब्बा काजे।”
पीलातुस तीनुक पुछ्यु, “ती मे ईसुक काय करो, जु मसी कह्वाये?” आखा तीना काजे कह्या,
“तीना काजे कुरुस पर चड़ावु।”
सरकार कह्यु, “काहा, हयु काय गलत कर्यु?” बाकुन चे अळी बी आयड़ी-आयड़ीन कह्वणे लाग्या, “तीना काजे कुरुस पर चड़ावु।”
जत्यार पीलातुस देख्यु की जे मारी नी सामळता ने उल्टा हुड़ी रया ने वात अघी बड़े ती हयु पाणी लीन आखा माणसेन टुळु अगळ हात धुयु ने कह्यु, “मे हीना धरमी माणसेन खुन नी करतु ने काय बी खामी नी हय ईनी वात काजे तुहुं जाणु।”
आखा माणसे जपाप देदा, “हेरो खुन हामरे उपर ने हामरी अवल्यात पर हवणी दे!”
हीनी वात पर हयु बरअब्बा काजे हींद्रे वाटे छुड़ देदु, ने ईसु काजे सुटाटीन सीपायड़ान हात मां आप देदु, काहाकी तीना काजे कुरुस पर चड़ावे।
सीपायड़ा ईसुन हासी उडाड़े
(मरकुस 15:16-20; युहन्ना 19:2,3)
तत्यार रोमी सरकारेन पीलातुसेन सीपायड़ा ईसु काजे कीला मां ली जाय्न, चां आखा सीपायड़ान टुळा काजे भेळा कर लेदा, ने तेरा पेहला पुथल्या नीकाळीन तीना काजे रातला रंगेन लांबला पुथल्या पेहराया। ने काटाळ्यु मुकुट गुथीन तेरा मुणका3 उपर मेल्या, ने तेरा जेवड़े हात मां बुरीन सुटी धराय देदा, ने चे तेरे अगळ मांडा टेकीन तीना काजे हासी कर्या, ने कह्या, ए यहुदीयान राजा, वारु छे की? ने तेरे उपर थुप्या, ने तीनीत बुरीन सुटीक हापकीन तेरे मुणके देदा। अळतेन चे हासी-उडाड़ीन चे ईसुन रातलो झगल्यो नीकाळ देदा, ने तेरा पेहला पुथल्या पेहराया, ने कुरुस पर चहड़ावणे ली गुया।
ईसु काजे कुरुस पर चड़ावे
(मरकुस 15:16-20; लुका 23:26-43; युहन्ना 19:17-27)
जत्यार चे सहरेम सी नीकळीन जाणे बाजी रवला, ती तीनुक सीमोनेन नावेन एक कुरेन गांव मां रवण्यु सीमोन नावेन एक अदमी भेळु हयु, ने चे तीना काजे बीहाड़ीन ईसुन कुरुस काजे हाकलाड़्या। चे तीनी जागा पर पुग्या, गुलगुता मतलब, माणसेन टुबरान जागु कह्वाये चां ली गुया, चे ईसुक कड़वो चीज भेसकेलु अंगुरेन रस पीणे आप्या, बाकुन ईसु चाख्यु बाकुन पीदु नी।
तत्यार चे तीना काजे कुरुस पर चड़ाया, ने तेरा पुथल्या कुणी-कुणीक जड़से करीन चिट्ठी नाखीन तेरा पुथल्या वाट लेदा। ने चां बठीन ईसुन देख-भाळ करने लाग्या। ने चे ईसुक मुणका सी उपर कुरुस पर एक लाकड़ान पट्टी खीळा ठुकीन टांग देदा, तीनी पट्टी पर ईसुन जु गुनु लिखलु हतलु, “जु यहुदीयान राजु ईसु छे” तत्यार तेरे भेळा दुय डाकु हतला एक जेवड़्ये आंग्ये ने दीसरु डाखर्ये आंग्ये कुरुस पर चड़ाय देदा।
ने चां आवणे-जाणे वाळा माणसे मुणका डुलावता-डुलावता जाय्न हासी उड़ाया ने तेरी जबरान वाक नीकाळ्या। ने असा कवतेला, “ए मंदीर काजे उदारने वाळा ने तीन दाहड़ा मां पछु बणावणे वाळा, तु आपसाक ते बचाड़! कदी तु भगवानेन बेटु हय ती कुरुस सी उतरी आव।”
हीनीत रीत सी मुख्या पुजारा, यहुदी नीयम सीकाड़न्या मास्तर्या ने डाहा बुड़ा हेरी हासी उड़ाया। हयु दीसरा काजे वाचाड़्यु, ने आपणे आप काजे नी बचाड़ सके। हयु ते ईस्रायेलेन राजु छे कदी हय कुरुस पर सी उतरी आवे ती हामु हीना पर भुरसु करसुन। हयु भगवान पर भुरसु राख्यु; कदी चु चाहतु, ती हींताळ तीना काजे बचाड़ लेय काहाकी हयु कवलु मे भगवानेन पुर्यु छे!
हेरेन तसु डाकु बी जे तेरे साते कुरुस पर चड़ावला हतला चे हेरी नाव-बद्दी करतेला।
ईसुन कुरुस पर मरनु
(मरकुस 15:33-41; लुका 23:44-49; युहन्ना 19:28-30)
मांजणीक टेमे बारे बजे सी तीन बजे लग आखा देस मां आंदारलो छावाय रयो। तीनेक बजे ईसु मटी अवाज मां आयड़ीन कह्यु, “एली, एली, लमा सबक्तानी?” हेरो मतलब “ए मारा भगवान, ए मारा भगवान, तु मेसे काहा छुड़ देदु?” जे चां उबा हतला हींद्रेम सी बेसका माणसे ज सामळीन कह्या, “हयु ते एलीय्याह काजे आयड़ी रयु!” हींद्रे मां सी एक जणु छाटु दवड़्यु ने पुतो लीन अंगुरेन रस मां डुबाड़्यु ने सुटी पर मेळीन ईसुक चुसाड़्यु।
दीसरा कह्या, “रहणी देवु, देखजे एलीय्याह तीना काजे बचाड़ने आवे की नी।”
तत्यार ईसु अळी मटला अवाज मां आयड़ीन जीव छुड़ देदु।
ने देखु, मंदीरेन पड़दु उपर सी नेचु लग फाटीन दुय भाग मां हय ज्य, ने धरती हाल गुय ने चापर्या फाटणे लाग गुयु, ने मसाण्या उघड़ी गुया ने भगवानेन बेसका मरला चुखला माणसेन डील जीवता हय गुया। ने चे मसाण्या मां सी जीवता हय्न नीकळीन चुखला सहर मां गुया ने बेसका माणसे काजे देखाया।
तत्यार सुबेदार ने जे तेरे साते ईसुन राखवाळी करतेला, चे आखो ज काय हय च देखीन बेसका बीही गुया, ने कह्या, “छाचलीन हयु भगवानेन पुर्यु हतलु!”
चां बेसका बायरा गलील जीला मां सी ईसुन चाकरी करती-करती तेरे साते आवली ची ज काय हयो च देखी रवली। हींद्रे मां मरीयम मगदलनी, ने याकुप ने योसेपेन माय मरीयम, ने जब्दीन पुर्यान माय हतली।
ईसु काजे गाड़े
(मरकुस 15:42-47; लुका 23:50-56; युहन्ना 19:38-42)
जत्यार सांती हयो ती युसुफ नावेन अरीमतीया गांवेन एक पयस्या वाळु एक माणुस, ज्य आपसुत ईसुन चेलु बणलु हतलु, चु आयु। हयु पीलातुस धड़े जाय्न ईसुन धड़ मांग्यु। ईनी वात पर पीलातुस तीना काजे हुकुम आप्यु, की डील ली जावु। युसुफ धड़ ली लेदु, ने एक वारला चादरा मां वेलटी लेदु। ने तीना काजे तेरा नवला मसाण मां मेक देदु, ची मसाण हयु चापर्या मां खुदाड़ रवलु, ने मसाणेन बारना पर मट्लु दगड़ु गबड़ायन जाती र्यु। मरीयम मगदलनी ने दीसरी मरीयम चां मसाण अगळ बठी रवली।
ईसुन मसाण पर पेहरु
दीसरे दाहड़े4 ज्य तीहवारेन दाहड़ान पछेन दाहड़ु हतलु, मुख्या पुजारा ने फरीसी माणसे पीलातुस धड़े भेळा हयन कह्या। “ए माहाराज, हामुक हेर छे की हयु धुकु देणेवाळु जत्यार जीवतेलु हतलु, ती कवतेलु की मे तीन दाहड़ाम पछु मर्या-सर्या सी जीवतु हय जायस।” तेरेमां हुकुम दे की तीन दाहड़ा लग मसाणेन राखवाळी करजे, असो नी हय जाय की तेरा चेला आवीन तीना काजे चुरी करीन ली जाती रवे, ने माणसे सी कह्वणे बाजी जाय की, हयु मरलाम सी जीवतु हय गुयु। तत्यार जु पछलु धुकु पेहले सी बी जादा हवसे।
पीलातुस तीनुक कह्यु, “तुंद्रे धड़े राखवाळ्या हय ते। जावु, ने वारु समज सी राखवाळी करु।”
तेरेमां चे राखवाळ्या काजे पुठ्ये लीन गुया, ने दगड़ा पर छाप लागाड़ीन मसाणेन राखवाळी कर्या।
Source notes (4)
- Footnote एगात भोर
- Footnote लहु
- Footnote सीर
- Footnote दिन
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.