भगवानेन छाचला बुल
मत्ती 25
ईसु दस कुवारली पुरेन साहरे सीकाड़े
सरगेन राज तीनु दस कुवारली पुरेन तसों छे जी आपणु-आपणु दिवु लीन लाडा सी मेळने करीन गुय। हींद्रे मां पांच डेड़ अकली ने पांच अक्कल वाळी हतली डेड़ अकली पुरे आपसु दिवा ते लेदी, बाकुन आपणे साते तेल नी लेदी; बाकुन अक्कल वाळी आपणा दिवा साते आपणा कुड़्या मां तेल बी भर लेदी। जत्यार लाडान आवणे मां वार हय गुय ती ची आखी बकास्या लेणे लागी ने सुय गुय।
आधी राते चां कचाटु हय गुयु, देखु, लाडु आय रयु! तेरे सी मेळने चालु। तत्यार ची आखी कुवारली उठीन आपणा-आपणा दिवा काजे वारु करने लागी। ने डेड़ अकली ने अक्कल वाळी सी कह्वी आपणा तेल मां सी थुड़ोक तेल हामुक बी आपु काहाकी हामरा दिवा उलवायणी बाजी रया। बाकुन अक्कल वाळी जपाप आपी, कदी ज्य हामरे ने तुंद्रे वाटे पुरो नी हवे; वारु ते ज्य छे की तुहुं वेचणे वाळा धड़े जाय्न आपणे वाटे मुल ली लेवु। जत्यार ची मुल लेणे जाणे बाजी रवली ती लाडु आय ज्य, ने जी तीयार हतली, ची लाडा साते ईयावेन घर मां जाती रय ने बारनो बुजाय ज्य।
हेरे पछेन ची दीसरी रवली कुवारली बी आवीन कह्वणे लागी, ए मालीक, ए मालीक, हामरे वाटे बारनो उघाड़ दे। चु मालीक जपाप आप्यु, मे तुंद्रे सी छाचलीन1 कह्वो, मे तुहुंक नी उळखो।
तेरेमां जागता रवु, काहाकी तुहुं नीते तीना दाहड़ा काजे उळखु नीते तीनी टेम काजे जाणु।
ईसु कळदार रुप्यान दाखलान साहरे सीकाड़े
(लुका 19:11-27)
काहाकी जी तीना माणसेन तसों छे जु पारका देस मां जाणेन टेमे आपणा पावर्या काजे बुलायन आपणो धन पावर्या काजे आप देदु। चु एक जणा काजे सनान पांच सीक्का आप्यु, दीसरा काजे दुय आप्या, ने तीसरा काजे एक आप्यु; अळतेन एक-एक काजे तींद्री ताकत देखीन आप्यु, ने तत्यार पारका देस मां जाती रयु। तत्यार, तीनाक चांदीन पांच सीका जड़ला, चु तत्यारुत जाय्न हींद्रे सी लेणु-देणु कर्यु ने पांच सीका अळी कमाय लेदु। हीनी रीत सी तीनाक चांदीन दुय सीका जड़ला, चु बी दुय सीका अळी कमाय लेदु। बाकुन तीनाक एक चांदीन सीकु जड़ला चु जाय्न जागा काजे खुदीन ने आपणा मालीकेन रुप्या काजे साताड़ देदु।
“बेसका दाहड़ाम पछे तीनु पावर्यान मालीक आयु ने हींद्रे सी लेखु लेणे लाग्यु। तीनाक चांदीन पांच सीका जड़ला, चु पांच सीका अळी लावीन कह्यु, ‘ए मालीक तु मेसेक पांच सीका आपलु, देख, मे पांच सीका अळी कमाय लेदलु छे।’ तेरु मालीक तीना काजे कह्यु, बेसकु वारु छे ने भुरसा लायक पावर्यु तु थुड़ाक मां ईमानदार रयु मे तुसे बेसका चीजे पर हकदार बणावीस। आपणा मालीकेन खुसी मां साजीदार बण। ने तीनाक चांदीन दुय सीका जड़ला, चु बी आवीन कह्यु, ‘ए मालीक, तु मेसे दुय सीका आपलु, देख, मे दुय सीका अळी कमाय लेदु।’ तेरु मालीक तीनाक कह्यु, ‘तु वारु छे ने भुरसा लायक पावर्यु, तु थुड़ाक मां ईमानदार रयु; मे तुसे बेसका चीजेन हकदार बणावीस। आपणा मालीकेन खुसी मां साजीदार हय जां।’ तत्यार तीनाक चांदीन एक सीकु जड़लु, चु आवीन कह्यु, ए मालीक, मे तुसे जाणतेलु की तु बेसकु डाहवाळु माणुस छे, ‘तु जां काय बी नी वेरे चानती काटे, ने जां नी खवळे चानती भेळा करे। तेरेमां मे बीही गुयलु ने जाय्न तारा एक सीका काजे जागा मां साताड़ देदु। देख, ज्य तारो, छे चो ज्य छे।’ तेरु मालीक तीना काजे जपाप आप्यु, ‘ए वेरी ने उजेगलु पावर्या, जत्यार तु ज्य जाणतेलु की जां मे नी एरो वां सी काटो, ने जां मे नी खवळ्यु चांहान सी भेळु करो? ती तुसेक मारा धन काजे सवकार्या काजे लीन आप देतु, तत्यार मे आवीन आपणा धन काजे ईयाज समोत ली लेतु। तेरेमां चु सीकु हेरसी ली लेवु, ने तेरे धड़े दस हजार रुप्या छे, तीना काजे आप देवु। काहाकी तीना धड़े छे, तीना काजे अळी आप देसे; ने तेरे धड़े बेसका हय जासे; बाकुन तेरे धड़े नी हय, तीना सी ज्य बी तेरे धड़े छे, तेरे धड़े सी हापकी लेसे। ने हीना पापी पावर्या काजे बाहार आंदारला मां नाख देवु, चां रड़नु ने दात ककड़ावणु रवसे।’
नीयावेन दाहड़ु
“जत्यार माणसेन पुर्यु राजु बणीन आवसे ने तेरा आखा सरग वाळा काहवाळ्या पुठ्ये आवसे, तत्यार चु आपसान राजगादी पर बठसे। ने आखा जातीन माणसे तेरे अगळ भेळा करसे; ने जसु गुवाळ्यु गाडरा काजे बुकड़ा सी अलग कर देय, असुत चु तीनुक एक दीसरा सी अलग करसे। चु गाडरा काजे आपणे जेवड़े आंग्ये उबा राख्से ने बुकड़ा काजे आपणे डाखर्ये आंग्ये उबा करसे। तत्यार राजु आपणा जेवड़े आंग्ये वाळा सी कह्वसे, ए मारा बास सी बरकत जड़ला माणसे आवु, तीना राजेन हकदार बण जावु, ज्य कळीन सुरु सी तुंद्रे वाटे तीयार कर मेकलो छे। काहाकी मे भुकलु हतलु, ने तुहुं मेसे खाणे करीन आप्या; मे पीसलु हतलु, ने तुहुं मेसे पाणी पीयाड़्या; मे पारका देसेन हतलु ने तुहुं मेसे तारा घर मां ठेराया; मारे धड़े पेहरनेन पुथल्या नी हतला, ती तुहुं मेसे पुथल्या पेहराया; मे मांदलु हतलु, ने तुहुं मारी खबर लेदला मे जेल मां हतलु ने तुहुं मेसेक भेळा हवणे आया। तत्यार धरमी तीना काजे जपाप आपसे, ए मालीक, हामु कत्यार तुसे काजे भुकलु देख्या ने खावड़्या? नीते पीसलु देख्या ने पाणी पीयाड़्या?” हामु कत्यार तुसे पारका देस वाळु देख्या ने आपणा घर मां बठाड़्या? नीते नांगेरलु देख्या ने पुथल्या पेहराया? हामु कत्यार तुसे मांदलु नीते जेल मां देख्या ने तुसे भेळा हवणे आया? तत्यार राजु तीनुक जपाप आपसे, मे तुंद्रे सी छाचलीन कह्वो की तुहुं जे मारा हीनु नानला सी नानला भायसे मां सी काहनाक बी एक साते कर्या, च मारेत साते कर्या।
तत्यार चु डाखर्या आंगे वाळा सी कवसे, ए सराप वाळा माणसे, मारे अगळ सी तीना जलमेन आकठा मां जाती रयु, ज्य भुतड़ा ने तेरा सरग वाळा काहवाळ्या वाटे तीयार कर मेकलो। काहाकी मे भुकलु हतलु, ने तुहुं मेसे खाणे करीन नी आप्या; मे पीसलु हतलु, ने तुहुं मेसे पाणी नी पीयाड़्या; मे पारका देसेन हतलु, ने तुहुं मेसे आपणा घर मां नी बठाड़्या; मारा डील पर पुथल्यो नी हतलो, ने तुहुं मेसे पुथल्या नी पेहराया; मे मांदलु ने जेल मां हतलु, ने तुहुं मारी खबर नी लेदा। “तत्यार चे जपाप आपसे, ‘ए मालीक, हामु तुसे कत्यार भुकलु, ने पीसलु, ने दीसरा देसेन, ने डील पर पुथल्यो नी, ने मांदलु2, जेल मां देख्या, ने तारी चाकरी नी कर्यु?’ तत्यार चु तीनुक जपाप आपसे, ‘मे तुंद्रे सी छाचलीन कह्वो, की तुहुं जे हीनु नानला मां सी नानला मां काहनाक बी एक जणा साते नी कर्या, च मारे साते बी नी कर्या।’ ने जे जलमेन डंड भुकेतसे बाकुन धरमी जलमेन जीवन मां भराय जासे।”
Source notes (2)
- Footnote सच
- Footnote बीमार
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.