भगवानेन छाचला बुल
मत्ती 20
ईसु अंगुरेन वाड़ीन दाहड़क्यान दाखलु दीन सीकाड़े
सरग वाळा भगवानेन राज तीना किरसाणेन तसों छे, चु तेरी अंगुरेन वाड़ी मां दाहड़क्या लागाड़ने करीन संदारे एगुत घर सी नीकळ्यु। चु दाहड़क्या काजे चांदीन एक रुप्या मां दाहड़की राखलु, ने तीनुक तेरी अंगुरेन वाड़ी मां मकल्यु। अळतेन चु नव बजेन नीकळीन दीसरा माणसे काजे हाटे मां रीकामा उबा हय रवला देखीन। तीनुक कह्यु, तुहुं बी मारी अंगुरेन वाड़ी मां जावु, मे तुहुंक वारु दाहड़की आपीस। ने चे बी वाड़ी मां काम करने करीन जाती रया, अळतेन चु बारे बजे ने तीनेक बजे खयड़े नीकळीन असुत दाहड़क्या हेरने करीन गुयु। अळतेन चु पांचेक बजे अळी खयड़े नीकळ्यु चां दीसराक अळी उबा हय रवला देखीन तीनुक कह्यु, “तुहुं काहा जां दाहड़ु भरीन रीकामा उबा हय रया।” चे तीना काजे कह्या, हामुक काहनु बी दाहड़की नी लागाड़्यु करीन हामु जां उबा हय रया। चु तीनु काजे कह्यु, तुहुं बी मारी अंगुरेन वाड़ी मां काम करने जावु।
सांती वेळाय अंगुरेन वाड़ीन मालीक, आपसा मुनीम सी कह्यु, दाहड़क्या काजे बुलायन लाव पछेन आवणे वाळा सी लागाड़ीन पेहल आवणेवाळा लग, आखाक दाहड़की आप दे। जत्यार चे आया, ती चे पांच बजे कामे लागला, ती चु मुनीम तीनुक काजे चांदीन एकेक रुप्यु आप्यु। जत्यार चे पेहल दाहाड़क्या आवला, चे असा समजी गुया की हामुक अदुस आपसे, बाकुन चु तीनुक बी चांदीन एकेक रुप्युत आप्यु। जत्यार पयस्या लीन चे खेतेन मालीक पर कुर-कुर करने बाजी गुया, चे कह्या जे पछला ते एकतु घंटु काम कर्या, ने तेबी तु तीनुक हामरे बराबर दाहड़की आप्यु, ने चे दाहड़ु भरीन भार हाकल्या ने तप काजे झेल्या? तींद्रे मायन एक असु जपाप आप्यु, ए दुस्त, मे तारे सी काय बी बयमानी नी करो, मे तुसेक दाहड़ान दाहड़की चांदीन एक रुप्यु आपीस करीन तीयार नी हयु? ज्य तारो छे, चो हाकलीन जाती रव; मारी मरजी असी छे, की जतरो तुसे आखो आप्यु ततरोत हीना पछळ आवला काजे बी आपो। काय ज्य सय नी हय काय मे मारा पयस्या सी ज्य चाहो चो करो? तु मारी भलाय देखीन मार पर काहा कुहराय रयु? हीनी रीती सी जे हय अगळ छे, चे पछळ हय जासे; ने जे पछळ छे, “चे अगळ हय जासे।”
तेरे मरनेन बारामां ईसु तीसरी कावा अघी सी आवणे वाळी वात बताड़े
(मरकुस 10:32-34; लुका 18:31-34)
ईसु यरुसलेम सहरेन वाट्ये अगु जाणे बाजी रवलु। ती चु बारे चेला काजे अथु ली जाय्न तीनुक कह्यु, “देखु, हामु यरुसलेम सहर मां जाणे बाजी रया; ने माणसेन पुर्यु मुख्या पुजारान ने यहुदी नीयमेन मास्तर्या हात मां धराय जासे, ने चे तीना काजे मारनेन डंड सामळावसे। ने चे तीना काजे नी-यहुदी माणसेन हात मां आपसे, की चे तीना काजे हासी मां उडाड़से ने सपाटा देसे ने कुरुस पर चड़ावसे, ने चु तीन दाहड़ाम मर्या-सर्याम सी जीवतु हय जासे।”
एक माय लीलघाये
(मरकुस 10:35-45)
तत्यार जब्दीन पुर्यान माय, आपणा पुर्या काजे साते लीन ईसु धड़े आवीन आंधी, ने तेरे सी थुड़ोक मांगणे बाजी गुय।
ईसु तीनीक पुछ्यु, “तुसेक काय चाहजे।”
ची कय, “जे मारा दुय पुर्या छे। तु तारा राज मां ईनु मायन एक तारे जेवड़्या हात भीणी ने एक तारे डाखर्या हात भीणी बसणेन हक आपजी।”
ईसु जपाप आप्यु, “तु नी जाणु की काय मांग रय। जु मे दुखेन पीयालु मे पीणेवाळु छे, तुहुं तीना दुखेन पीयाला काजे पी लेसु काय?” चे तीना काजे कह्या तु कह्यु तसोत हामु करसु।
तत्यार ईसु तीनुक कह्यु, “तुहुं मारु कटवरु ते पीसु, बाकुन मारे जेवड़्ये ने डाखर्ये हात मां काहानाक बी बठाड़नु मारो काम नी हय, बाकुन हींद्रे वाटे मारा बास भीणी सी तीयार करलो छे।”
ज्य सामळीन दस चेला तीनु दुय संगा भायस पर रीसाय पड़्या। ईसु आपसा चेला काजे धड़े बुलायन कह्यु, “तुहुं जाणु की नी-यहुदी राजा हींद्रे पर राज करे; ने जे मटला छे, चे हींद्रे पर हक जमाड़े। बाकुन तुंद्रे मां असला हकेन कायदु नी रहणु चाहजे; बाकुन जु कुय तुंद्रे मां मटा हवणे हींडे चु तुंद्रे मां पावर्यु बणसे। ने चु तुंद्रे मां मुख्यु बणने हींडे, चु तुंद्रु आखान पावर्यु बणसे। काहाकी माणसेन पुर्यु; ईनी कळी मां आपसी चाकरी कराड़ने नी, बाकुन आपसुत चाकरी करने, ने बेसका जणान जीव काजे छुड़ावने करीन आवलु छे।”
ईसु दुय आंदळा काजे वारु करे
(मरकुस 10:46-52; लुका 18:35-43)
जत्यार चे यरीहो सहरेम सी नीकळीन जाणे बाजी रवला, ती माणसेन एक मट्लु टुळु ईसु पछळ चाल पड़्यु। ने चां सयड़क धड़े दुय आंदळा, जे बठला हतला, जत्यार चे जो सामळ्या की ईसु जाणे बाजी रवलु, ती चे आयड़ी-आयड़ीन कह्वणे बाजी गुया “ए मालीक, दावुदेन अवल्यात, हामरे पर दया कर।”
माणसे तीनु आंदळा काजे हुगा हय रवु; करीन तीनुक लड़्या, बाकुन अळी बी आयड़ीन कह्या, “ए मालीक दावुदेन अवल्यात, हामरे पर दया कर।”
ईसु हुबु हयन तीनुक बुलायु ने कह्यु, “तुहुंक काय चाहजे?” मे तुंद्रे वाटे करो। चे कह्या “ए मालीक, हामरा डुळा उघड़ी जाणु चाहजे।”
ईसु काजे तींद्रे पर दया आय तींद्रा डुळा धर्यु ने चे तत्यारुत देखणे बाजी गुया; ने ईसु पछळ1 चाल पड़्या।
Source notes (1)
- Footnote पिछे
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.