भगवानेन छाचला बुल
लुका 7
एक सुबेदारेन भुरसु
(मत्ती 8:5-13)
जत्यार ईसु माणसेक आखी वात सामळाय देदु, ने अळी कफरनहुम सहर मां पछु गुयु। चां एक सुबेदार हतलु, तेरु एक पावर्यु हतलु, तीना पावर्या काजे, चु सुबेदार बेसकु परम करतेलु। चु पावर्यु बेसकु जबर मांदु पड़ रवलु, ने चु मरने वाळु हतलु। चु सुबेदार ईसुन बारामां सामळ्यु, ने अतराम चु यहुदी माणसेन थुड़ाक डाहलास अदमी वाटे ईसु धड़े असी वीन्ती कय मकल्यु, तु आय्न मारा पावर्या काजे वारु करीन बचाड़ ले। चे ईसु धड़े आवीन असी वीन्ती कर्या, जु सुबेदार बेसकु वारु माणुस छे, अतरे तु तेरी मदत कर। काहाकी हयु हामरा माणसे सी परम करे, ने हामरे वाटे भगवानेन भक्तीन घर बणाय मांग्लु छे।
ईसु तींद्रे पुठ्ये चाल पड़्यु, ने ईसु तेरे घर धड़े पुगणे वाळु हतलु। ती सुबेदार आपसा दुस्तीदार्यान साहरे ईसु भीणी असो कय मकल्यु, “ए मालीक!” तु वेला करीन अगु मां आवे काहाकी मे अतरु मटु नी हय की तु मारा घरेन साहळे आवे। मे असु लग नी समजी गुयु ने तुसेक भेळु हवणे लग नी आयु, बाकुन जात रय्न तु एकुत बुल कय दे, ती मारु पावर्यु वारु हय जासे। मे बी दीसरान हक मां रवण्यु एक नानुस हकदार्यु छे। मारा हक मां सीपायड़ा रवे। जत्यार मे एक जणा काजे जां कह्वो, ती चु जाय ने दीसरा काजे आव कह्वो ती चु आवे ने मारा काहनाक पावर्या काजे ज कर कहं; ती चु तीना काम काजे करे।
जी वात सामळीन ईसु चकराय गुयु ने, चु आपसे पछळ आवतेला माणसे भीणी देखीन असु कह्यु, “मे तुहुंक ज कहं की ईस्रायेली माणसे मां बी मेसेक अतरु पाक्कु भुरसु देखणे नी जड़्यु।”
ने तीनु माणसे काजे सुबेदार मकेल्लु, चे माणसे पछा घर जाय्न तीना मांदला पावर्या काजे वारलु देख्या।
ईसु रांडायलीन जुवान पुर्या काजे जीवतु करे
दीसरे दाहड़े, ईसु नाईन नावेन सहर मां गुयु। ईसुन चेला ने माणसेन एक मट्लु टुळु बी ईसु साते हतली। जसा चे सहरेन बारना धड़े पुग्या, तीनुक थुड़ाक माणसे सोवताळ जागा मां आवतेला भेळा हया। चे एक मरला माणसे काजे गाड़ने ली जाणे बाजी रवला। मरलु माणुस एक रांडायली बायरीन एकुत पुर्यु हतलु। माणसेन एक मट्लु टुळु रांडायली साते हतलु। तीनीक देखीन मालीक ईसु काजे बेसकी दया आवी। ने ईसु तीनीक असु कह्यु, “रड़े मां।” तत्यार चु सीवड़ी धड़े गुयु ने सीवड़ी काजे धर्यु। सीवड़ी हाकलने वाळा उबा रय गुया। तत्यार ईसु मरला काजे कह्यु, “ए जुवान उठ!” मरलु तत्यारुत उठीन बसी गुयु, ने वात करने बाजी गुयु! ईसु तीनाक तेरी मायन सुपरुत कर देदु।
आखा माणसे बेसका जबर बीही गुया, चे भगवानेन बड़ाय करता जाय्न असा कह्या, “भगवान आपसे वाटे माणुस काजे हामरे मां सी उबु करलु छे। छाचलीन भगवान आपसुत, आपसा माणसेक बचाड़ने आवलु छे!”
ईसुन ईना वारु कामेन खबर आखा यहुदा जीला मां, ने आड़े-धड़ेन आखा जागा मां जाती रया।
बपतीस्मा आपण्या युहन्नान साहरे भगवानेन खबर
(मत्ती 11:2-19)
युहन्नान चेला युहन्ना काजे ईनी आखी वातेन खबर आप्या। तत्यार युहन्नु आपसा चेला मायन दुय चेला काजे बुलायन मालीक ईसु धड़े ज पुछणे मकल्यु, “आवणे वाळु मसी तुत छे काय, की हामु काहनाक दीसरान वाट देखजे काय?” ने जे दुय चेला ईसु धड़े आय्न कह्या, “बपतीस्मा आपण्यु युहन्नु हामुक तारे धड़े ज पुछणे मकेल्लु छे, की आवणे वाळु मसी तुत छे काय, की हामु काहनाक दीसरान वाट देखजे काय?” तीनी टेमे ईसु बेसका मांदला माणसेक, मांदवाड़ मां सी, ने हीड़ा-पीड़ाम सी, ने भुतड़ान आत्मान कब्जाम सी छुड़ायु; ने बेसका आंदळान डुळा उगाड़ देदु, ने चे देखणे बाजी गुया। ने ईसु युहन्नान चेला काजे कह्यु, “ज काय तुहुं देख्या ने सामळ्या, च युहन्ना काजे जाय्न कय देवु, की आंदळा देखणे बाजी गुया ने, लंगड़ा चालने फीरने बाजी गुया, कुड़ायला वारु हय्न चुखा हय गुया; ने मरला जीवता हय गुया, ने गरीब काजे खुस-खबरेन वात सामळावे।1 ने वारु छे चु, जु मार पर पाक्कु भुरसु करे!”
बपतीस्मा आपण्या युहन्नान साहरे मकेल्ला पछा जात रया, तत्यार ईसु बपतीस्मा आपण्या युहन्नान बारामां कह्णे बाजी गुयु, तुहुं उजाड़्या बयड़ा मां काय देखणे गुयला? वाहळा मां हालतेला सुट्या देखणे गुयला काय? कहुं ते खरा! तुहुं काय देखणे गुयला? चमकण्या पुथल्या पेहरला माणसेक देखणे गुयला काय? देखु, जे चमकण्या पुथल्या पेहरे ने मुजा मस्ती मां रवे, चे माणसे ते मट्ली हवेली मां रहे। असो नी हय ती तुहुं काय देखणे गुयला? काहनाक भगवानेन अघी सी आवणे वाळी वात बताड़ने वाळा काजे देखणे गुयला काय? छाचलीन! मे तुहुंक कहं, जतरा बी माणसे भगवानेन अघी सी आवणे वाळी वात बताड़न्या हतला, तीनु आखा सी युहन्नु मटु माणुस छे, तीनाक तुहुं देखणे गुयला। ने हयुत युहन्नु छे, तेरा बारामां लिखलो छे, की सामळ! मे मारु काहवाळ्यु तारे सी पेहेल मकलीस। चु तारे अगळ तारे वाटे वाट सुदारसे।2 मे तुहुंक कह्वो, माणसे मां बपतीस्मा आपण्या युहन्ना सी मटु कुय नी हय। तेबी, मे कह्वो की भगवानेन राज मां, जु आखाम सी नानु छे, चु बपतीस्मा आपण्या युहन्ना सी बी मटु छे।
ने आखा माणसे ने फाळु लेण्या बी बपतीस्मा आपण्या युहन्नान सामळीन, बपतीस्मा आपण्या युहन्ना धड़े बपतीस्मा लेदा ने भगवानेन मरजी पुरी कर्या ने भगवान काजे छाचु मान लेदा। बाकुन फरीसी माणसे ने कायदु सीकाड़न्या मास्तर्या, बपतीस्मा नी लेदा ने आपसा बारामां भगवानेन मरजी टाळ देदा।
बाकुन मे ईनी पीड़ीन माणसे काजे कसु उळखो? ने कुणीन तसा छे करीन कह्वो? हीया हाटे मां बठी रवण्या पुर्यान तसा छे, जे आंबा-सांबा आयड़ीन कहें; की हामु तुंद्रे वाटे नाचाड़ने करीन पावळी आजाड़्या, ने तुहुं नी नाच्या, हामु तुंद्रे वाटे रड़ने कलपणेन गीत गाया बाकुन तुहुं नी रड़्या। काहाकी बपतीस्मा आपण्यु युहन्नु रुटु बी नी खादु ने अंगुरेन रस बी नी पीदु, ने तुहुं मेसेक कय रया की हेरे भुतड़ु लाग र्यु करीन। अळतेन माणसेन पुर्यु बणीन आयु, ने खातु-पीतु आय र्यु; ने तुहुं कहुं, देख हयु माणुस; हीजेरलु ने पीण्यु छे, ने फाळु लेण्यान ने पापी माणसेन दुस्तीदार छे। बाकुन भगवानेन अकल, भगवानेन आखा पुर्या-पारी वाटे, पुरावा भेळे उजेंती हवणे बाजी रय।
ईसु फरीसी माणसेन घर मां पापी बायरी काजे माफ करे
काहनुस फरीसी माणसे ईसु काजे आपसे घर खाणेन वीन्ती कर्यु; ती ईसु तीना फरीसी माणसेन घर आवीन रुटा खाणे बठ्यु। ने सामळु, तीना सहरेन एक पापी बायर काजे ज मालुम हय गुयो की ईसु फरीसी माणसेन घर मां रुटा खाणे बाजी र्यु। ची चां संगमरमर नावेन दगड़ान ठाहरु मां बेसकी महंग्लो ईत्तर लीन आवी। ने ची पापी बायर रड़ती जाय्न, ईसुन पाय धड़े उभी रय गुय, ने तेरा आसा ईसुन पाये पर चुह्वाड़ीन ईसुन पाय काजे भीग्वणे बाजी गुय, ने ईसुन पाय काजे आपसा कान्या सी नुछी, ने पाये गुळु दीन पाये पर ईत्तर लागाड़ी। ज आखो देखीन, फरीसी माणुस, जु ईसु काजे खाणे करीन वीन्ती करलु, चु आपसा मन मां कह्यु, “कदी जु भगवानेन अघी सी आवणे वाळी वात बताड़ने वाळु माणुस रवतु, ती जु छाचलीन जाणी जातु की, जी बायर हीनाक छीमणे बाजी रय, ची कुण छे, ने कसली छे, हयी ते पापी बायर छे।”
तेरा मनेम वात जाणीन ईसु तीना फरीसी माणसे काजे कह्यु, “सीमोन, मे तुसे काहींग कह्णे हींडो।”
चु सीमोन ईसु काजे जपाप आप्यु, “ए मास्तर, कव।”
ईसु कह्यु की “काहनाक सवकारेन दुय करजा वाळा हतला, एक जणु पांच सोव रुप्यान करजा वाळु हतलु, ने दीसरु पचास रुप्यान करजा वाळु हतलु बाकुन तींद्रे धड़े मालीक काजे करजु देणे काय नी हतलो, अतराम सवकार दुय जणाक माफी आप देदु। हय मे कहं, तीनु मायन कुण तीना सवकारेक परम करसे?” सीमोन कह्यु, “मारी नींगा मां, चु जादात परम करसे जेरु जादा करजु माफ हयु।” ईसु तीनाक कह्यु,
“तु सय वीच्यारीन कह्यु।” ने ईसु तीनी बायरी भीणी देखीन, सीमोन काजे कह्यु, “ईनी बायरीन बारामां वीच्यार ते कर? मे तारे घर आयु, ने तु मेसेक पाय धुवणे, पाणी लग नी आप्यु, बाकुन जी मारा पाय आसा सी धुवी ने कान्या सी नुछी।”3 ने तु मेसेक गुळु नी देदु, बाकुन जत्यार सी मे ईना घर मां आयु, तत्यार सी हय लग, जी मारे पाये गुळा दी रय। ने तु मार मुणका पर जेतुनेन झाड़कान तेल नी चुपड़्यु, बाकुन जी मारा पाये पर ईत्तर चुपड़्ली छे।4 तेरेसी मे तुसेक कहं, “हेरा बेसका जादा पाप हतला, बाकुन ईनीक माफी जड़ गुय। काहाकी जी बेसकी परम करे। बाकुन तीनाक जाराक माफी जड़ी, चु जाराक परम करे।”
ने अळी ज कयदीन ईसु तीनी बायरीक कह्यु, “तारा पापेन माफी तुसेक जड़ गुय।”
ने तीनी टेम मां जे माणसे ईसु पुठ्ये रुटा खाणे बसला, चे आपसा मनेम असा वीच्यार करने बाजी गुया की हयु कुण छे, जु पापेन माफी बी आपे? बाकुन ईसु तीनी बायरी काजे कह्यु, “तारु भुरसु तुसेक बचाड़ लेदलु छे। ने तु सांती सी जाती रव।”
Source notes (4)
- Cross-reference यसाया 35:5,6; 61:1
- Cross-reference मलाकी 3:1; यसाया 40:3
- Cross-reference उबजाणनी किताप 18:4
- Cross-reference भजन सहीता 23:5
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.