भगवानेन छाचला बुल
लुका 11
ईसु चेला काजे दुवा करने सीकाड़े
(मत्ती 6:9-13)
एक कावा ईसु दुवा करने एक जागा पर दुवा करने बाजी रवलु। ने जत्यार चु दुवा कर लेदलु, ती तेरा चेला मायन एक चेलु तीनाक असु कह्यु, “ए मालीक ईसु! जसु बपतीस्मा आपण्यु युहन्नु आपसा चेलाक दुवा करने सीकाड़्यु। तसुत तु बी हामुक दुवा करने सीकाड़।”
ईसु तीनु चेलाक कह्यु, जत्यार तुहुं दुवा करु, ती तीनी टेमे असा दुवा करजु:
ए भगवान बास:
तारो नाव चुखलो मानायणु चाहजे;
आखा माणसेम तारो राज आवणु चाहजे।
दाहड़ीन, हामुक चाहजे ततरोत खाणो हामु काजे आप्या कर।
ने हामरा पाप काजे माफ कर,
काहाकी हामु बी हामरा गुनेगार काजे माफ कर्या।
अळी हामुक पारख मां घुण पाड़े।
दुवान बारामां ईसु सी समज लेणु
(मत्ती 7:7-11)
ईसु तीनुक अगु कह्तु गुयु, “मान लेवु की, कदी तुंद्रे मायन कुयन एक दुस्तीदार साते हय, ने तु तेरे भीणी आधली राते तेरे धड़े जाय्न कह्वे, ए दुस्तीदार, मेसे तीन रुटा उधार लाय्न दे।” काहाकी मारु एक दुस्तीदार बेसके नांबे सी मेजवान्यु आवलु छे, तीनाक ते खावाड़ने वाटे मारे धड़े काय बी रुटा नी हय। ने चु घरमां सी जपाप आप्यु की, मेसे दुख मां देय, हय ते बारनो बंद छे, ने पुर्यु बी मारे भेळु सुवणे बाजी र्यु। तेरेसी मे उठीन तुसे काय बी नी आप सको। मे तुंद्रे सी कहो की, चु तेरु दुस्तीदार हवणे पर बी तीनाक उठीन नी आपे। ती बी सरम छुड़ीन मांगणेन वजे सी तीनाक जतरा रुटान जरुवत छे, ततरा रुटा उठीन आपसे। मे तुहुंक कहो की, मांगसु ती तुहुंक आपसे। ने हेरसु ती तुहुंक जड़ी जासे। ने बारनो ठुकसु ती तुंद्रे वाटे उघड़ी जासे। काहाकी जत्यार जु कुय मागंसे, ती तीनाक आपसे। जे कुय हेरसे ती तीनाक जड़ी जासे। ने जु कुय बारनो ठुकसे, तेरे वाटे खुली जासे। “मान लेवु, तुहुं एक बास छे ने तुंद्रु पुर्यु तुंद्रे धड़े माछा मांगे, ती काय तुहुं तीनाक घड़सु आपसु? कदी चु तुंद्रे धड़े आंडा मांगे, ती काय तुहुं तीनाक ईछु आपसु। कदी तुहुं भुंडा हय्न बी तुंद्रा पुर्याक वारलु चीज आपणे जाणु, ती सरगेन बास आपणा मांगणे वाळाक चुखली-आत्मा काहा नी आपे? चु मांगणे वाळाक आपसे।”
ईसु ने भुतड़ान आत्मा
(मत्ती 12:22-30; मरकुस 3:20-27)
ईसु एक गुंगा करने वाळी भुतड़ान आत्मा काजे नीकाळने बाजी रवलु। भुतड़ान आत्मा नीकळी गुय ती गुंगड़ु बुलने बाजी गुयु। तीनाक देखीन माणसे चकराय गुया। बाकुन तुंद्रे मायन थुड़ाक माणसे कह्या, की जुते भुतड़ान मुख्या बालजबुलेन मदत सी भुतड़ान आत्मा काजे नीकाळे।
थुड़ाक माणसे ईसु काजे पारखणे वाटे तेरे सी सरगेन एक सहलाणी मांग्या। ईसु तींद्रा मनेन वीच्यार जाणीन तीनुक कह्यु, तीना देस मां बेरजु पड़ जाय, ती च देस टीक नी सके ने, उजड़ी जाय, ने तीना घर मां झगड़ु हय जाय, ती च घर खत्तम हय जाय। कदी भुतड़ु आपसान वीरुद करने बाजी जाय ती, भुतड़ान राज कसु चालसे? थुड़ाक सुचु ते खरा, काहाकी तुहुं मार बारामां ज कय र्या की तु भुतड़ान मदत सी भुतड़ान आत्मा काजे नीकाळ र्यु। कदी मे भुतड़ान मदत सी भुतड़ान आत्मा काजे नीकाळो, ती तुंद्रा पुर्या कुणीन मदत सी भुतड़ान आत्मा काजे नीकाळे? हेरेसी चेत तुंद्रु हीसाब लीन तुंद्रु नीयाव करसे। बाकुन कदी मे भगवानेन ताकत सी भुतड़ान आत्मा काजे नीकाळो, ती तुहुं हय ज जाण लेवु की भगवानेन राज तुंद्रे ईचमां आय गुयलो छे।
“जत्यार एक ताकतवाळु माणुस हत्यार हातेम लीन तेरा घरेन राखवाळी करे, ती तेरो माल-धनेक चुट्टा नी ली जाय, ने तेरो आखो माल-धन बच रवे।” बाकुन कदी कुय तेरे सी जादा ताकतवाळु माणुस दवड़ीन तेरे धड़े आवीन तेरे साते लड़ाय करीन तीनाक जीत लेय, ने तीना ताकतवाळा माणुस धड़े सी, च आखो हत्यार हापकी लेय, तीनु हत्यार पर चु भुरसु करतेलु, ने तेरो माल-धन लुटीन दीसरा माणसे वाटी देय।
“जु मारे पुठ्ये नी हय, चु मारु वीरुद मां छे, ने जु मारे साते भेळो नी करे, चु खुय देय।”
भुंड्लु भुतड़ु माणसेम सी नीकळीन पछु आवे
(मत्ती 12:43-45)
जत्यार भुंड्ली भुतड़ान आत्मा काहनाक माणुस मां सी नीकळीन जाय, ती चु आराम करने करीन, सुकला जागाम, जागा हेरती हींडे, ने जत्यार आराम करनेन जागा नी जड़े ती ची कह्वे की मे मारा तीना घर मां पछी जाती रय्स, चां सी नीकळीन आवली छे। ने चु भुतड़ु पछु आवीन देखे ती तीनाक च घर झाटकीन बाहरलो ने सींगारलो देखे। ती ची भुंड्ला भुतड़ान आत्मा पछी जाती रवे ने जाय्न तेरे पुठ्ये सात कुहर्या भुतड़ा काजे भेळा करीन ली आवे। ने तीनु माणसेम आवीन भराय जाय ने चु माणुस पेहले सी बी जादा बीगड़ी जाय,
बरकतवाळु कुण छे?
ईसु जी वात कह्वणे बाजी रवलु, तत्यार गड़दी मां सी काहनीक बायर ईसु धड़े आवीन जुर सी आयड़ीन, कय की तुसे पयदा करीन मटु करने वाळी, “बरकतवाळी छे ने चे धाया जे तु धायु।”
बाकुन ईसु तीनी बायरीक कह्यु, “हव, तु वारलु वात कय; बाकुन चे जादा बरकतवाळा छे, चे भगवानेन वात सामळीन तेरी माने।”
पुरावान मांग
(मत्ती 12:38-42)
जत्यार तेरे चारेमेर बेसका माणसे भेळा हय गुया, तत्यार ईसु कह्णे बाजी गुयु, ईनी पीड़ीन माणसे पापी छे! जे सहलाणी हेर र्या, योनान सहलाणीक छुड़ीन ईनुक काहनी बी सहलाणी नी जड़े। जसु योना नीनवे सहर मां रवण्या माणसे धड़े एक सहलाणी बण गुयलु। तसुत माणसेन पुर्यु बी ईनी पीड़ीन माणसे धड़े एक सहलाणी बण जासे। नीयावेन दाहड़े दखणाव सी राणी ईनी पीड़ीन माणसे भेळी उठसे ने हीनुक गुनेगार ठेहरावसे, काहाकी ची सुलेमानेन अक्कल भरी वात सामळने करीन धरतीन काकड़ेन छेव सी आवली,1 ने सामळु! जां ते सुलेमान सी बी वदु अक्कल वाळु उबु हय रयु। नीयावेन दाहड़े नीनवे सहरेन माणसे ईनी पीड़ीन माणसे भेळा उठसे ने ईनुक गुनेगार ठेहरावसे,2 काहाकी चे योनान मुंहडे जुर सी कह्वली भगवानेन वात सामळीन, पाप भीणी सी मन फेरव्या, ने देखु! जां ते योना सी बी बेसकु मटु भगवानेन वात सामळावण्यु छे।
डीलेन दिवान दाखलु
(मत्ती 5:15; 6:22-23)
कुय बी दिवु धपाड़ीन तळ घरेन सातायली जागा मां नी मेले, ने कांगणी तळे नी मेळे बाकुन दिवा काजे दीवाळ्या पर मेले, हेरेसी की घर मां आवणे जाणे वाळा काजे वीजाळो जड़े ने वारु देखाये। तुंद्रा आखान डीलेन दिवु तुंद्रा डुळा छे, हेरेसी तुंद्रा डुळा वारु देखे ती तुंद्रो आखो डील बी चुखो देखाये बाकुन जत्यार तुंद्रा डुळा वारु नी देखे ती तुंद्रो डील बी आंदारला मां छे। हेरेसी मे तुहुंक कह्वो चेतीन रवु-कांखुर मायन जो वीजाळो तुंद्रेम छे, चां आंदारो ते नी हय जाय। कदी तुंद्रो आखो डील वीजाळाम रवे ने तेरु काहनु बी भाग आंदारला मां नी रवे, ती चो आखो डील वीजाळाम भराय रवसे, “जसु काहनु बी दिवु धपीन आपसा वीजाळा काजे छुड़ीन आखे दुर वीजाळो कर देय।”
ईसु सास्तुर सीकाड़ने वाळा ने फरीसी माणसे पर गुनु लागाड़े
(मत्ती 23:1-36; मरकुस 12:38-40)
जत्यार ईसु वात बताड़्यु ती काहनुक फरीसी माणुस लीलघाय्न कह्यु “मारेन्चां रुटा खाणे चाल” ने ईसु तेरेन्चां जाय्न रुटा खाणे बठ्यु। बाकुन ईसु हात धुयन खाणे नी बठ्यु, करीन चु फरीसी माणसे चकराय गुया ने तीनाक वारु नी लाग्यो। मालीक ईसु तीना फरीसी माणसेन वीच्यार जाणीन तीनाक कह्यु, “तुहुं ते कटवरा ने तळी काजे उपर सी वारु मांजु, बाकुन तुंद्रा हीया-मन मां लुच्चाय ने भुतड़ान आत्मा भरायली छे।” ए डेड़-अकल्या माणसे! जु भगवान बाहर वाळु अंग बणायु, चु माहें वाळो अंग नी बणायु काय? बाकुन ती ज माहें छे च भुकला काजे दान कर देवु, ती तुंद्रे वाट्ये आखो चुखो हय जासे।
बाकुन फरीसी माणसे! तुंद्रे पर गरा आय पड़े! काहाकी तुहुं पुदीनान ने सुदाब नावेन जड़ा बुटीन दसवु हीस्सु, ने भाती-भातीन भाजी-पालान दसवु हीस्सु बी आपे ते खरा,3 बाकुन भगवानेन नीयाव ने परम काजे टाळ देवु; तुहुंक ते जे दुय काम करता रवणु हतलो ने काहनी बी वात नी टाळनु हतलो।
ए फरीसी माणसे! तुंद्रे पर गरा आय पड़नु चाहजे! काहाकी तुहुंक भगवानेन भक्तीन घर मां बसणे करीन खास गादी चाहजे ने हाटेम वारु छे की? करीन पुछण्या चाहजे। तुंद्रे पर गरा आय पड़नो चाहजे! काहाकी तुहुं तीनु मसाणेन तसा छे, जे देखाव नी पड़े, “ने तीनु मसाण पर माणसे हींडे-फीरे बाकुन तीनुक पतु नी चाले की जां मसाण छे।”
ज सामळीन एक यहुदी धरमेन कायदा सीकाड़न्यु, ईसु काजे कह्यु, “ए मास्तर! असी वात कय्न हामरी नाव-बद्दी कर र्यु।”
ईसु कह्यु, ए यहुदी धरमेन कायदान मास्तर्या! तुंद्रे पर गरा आय पड़नु चाहजे! काहाकी तुहुं माणसे पर नेम-कायदा पाळनेन बुज नाख देवु ने तीनुक भारलो हाकलाड़े बाकुन हाकलने करीन आपसान आंगळी ईतरीक बी नी लागाड़ु। तुंद्रे पर गरा आय पड़नु चाहजे! काहाकी तीनु, भगवानेन अघी सी आवणे वाळी वात बताड़ने वाळा माणसे काजे तुंद्रा डाहा-डाहा मार देदला। तुहुं ते तींद्रा मसाण बांदीन गातु बणावु। अतरे तुहुं ईनी वातेन गवाय देवु, ने आपसा डाहा-डाहा असला काम सी राजी छे; काहाकी चे तीनाक मार नाख्या ने तुहुं तींद्रा मसाण बणायन बांदु, ने तींद्रु गातु बणावु। हेरेसी भगवानेन अक्कल बी कह्, मे हींद्रे भीणी भगवानेन अघी सी आवणे वाळी वात बताड़ने वाळा माणसे काजे ने मारा नेवताळा काजे मकलीस; ने चे तीनु मायन बेसका काजे मार देसे, ने बेसका काजे वेला पाड़से। जी धरती बणने सी पेहलुत, सी भगवानेन अघी सी आवणे वाळी वात बताड़ने वाळान लुही उहवाड़्यु। तींद्रे आखा सी लेखु ईनी पीड़ीन माणसे सी लेसे। धरमी हाबील सी लीन जकर्यान लग लुही चुह्वाड़्या,4 तीना जकर्या काजे वेदीन मंदीरेन ईचमां मार देदला, तुहुंक छाचलीन कहो की तींद्रु लेखु ईनी पीड़ीन माणसे सी लेसे।
“यहुदी धरमेन कायदान मास्तर्या! तुंद्रे पर गरा आय जाणु चाहजे! काहाकी तुहुं भगवानेन अकलेन कुची ते ली र्या, बाकुन तुहुं खुद ते नी भराया ने दीसराक बी नी भरायणे देदा।”
जत्यार ईसु तीना घर मां सी नीकळ्यु जे यहुदी-सास्तुर सीकाड़न्या ने फरीसी माणसे कीचवाय्न ईसु पछळ पड़ गुया ने बेसकी वात पुछीन वेला पाड़न्या झुम गुया। काहाकी चे ईसुन मुंहडा सी नीकळने वाळी वात धरीन, फसाड़नेन तीयारी मां हतला।
Source notes (4)
- Cross-reference 1 राजा 10:1-10; 2 ईतीहास 9:1
- Cross-reference योना 3:5-10
- Cross-reference मीका 6:8; लेवयवेवस्था 27:3
- Cross-reference उबजाणनी किताप 4:8; 2 ईतीहास 24:20-21
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.