भगवानेन छाचला बुल
युहन्ना 4
ईसु ने सामरी बायर
फरीसी माणसे ईसुन बारामां ज सामळ्या की, ईसु बपतीस्मा आपण्या युहन्नान चेला सी अदुस चेला बणावे, ने तीनु चेलाक बपतीस्मा आपे अदुस ईसु आपसुत बपतीस्मा नी आपतेलु बाकुन ईसुन खास चेला, दीसरा नवला चेला बणावणे करीन बपतीस्मा आपतेला। ती ईसु यहुदीया जीला काजे छुड़ीन अळी पछु गलील जीला भीणी जाती रयु। हीनी कावा ईसु, आपसा चेला पुठ्ये सामरीया जीला मायन गुयु।
जाते-जाते चे, सामरीया जीलान सुखार नावेन एक सहर धड़े पुग्या। चां एक खेत हतलो, च खेत अगला वाराम याकुप आपसान पुर्या युसुफ काजे आपलु। चां याकुप्यान साहरे खुदाड़लु कुवु बी हतलु, तत्यार ईसुक चु कुवु देखायु, ईसु ते, चाली चालीन हारी पड़लु। अळतेन चु तीना कुवा धड़े चां बठ गुयलु। हय खयार दाहड़ु हय रवलु।
तीनी टेमे तीना कुवा पर एक सामरी बायर पाणी भरने आवी। तत्यार ईसु तीनीक कह्यु, “मेसेक पाणी पीयाड़ दे।” काहाकी तेरा चेला खाणो मुल लेणे करीन सहर मां जाय रवला।
तीनु दाहड़ाम यहुदी माणसे सामरी माणसे साते छीट राखतेला, अळी ची सामरी बायर ईसु काजे कय, “तु यहुदी जातीन हय्न बी मारे धड़े पाणी पीणे करीन काहा मांगे? मे ते एक सामरी जातीन बायर छे।”
ईसु तीनीक जपाप आप्यु, “कदी तु ज नी जाण लेती की, भगवान तुसेक काहनु वाटु आपणे हींडे, ने जु तारे धड़े पीणे करीन पाणी मांग र्यु, चु कुण छे। कदी तु जाण लेती ती मारे धड़े पाणी मांगती, ने मे तुसेक अमर जीवेन पाणी आपतु।”
सामरी बायर ईसुक कय, “ए मालीक तारे धड़े ते कुवाम सी पाणी लाटणे करीन ठाहरु बी नी हय, ने कुवु उंडु छे; ती च अमर जीवन आपण्यो पाणी तु कां सी लावसी? तु हामरा बास याकुप सी बी मटु छे काय? जु हामु काजे गुयु कुवु आपलु; चु बी हीना कुवाम सीत पाणी पीदलु, ने तेरा पुर्या ने तेरा पाळ्ळा जनवार्या लग हीना कुवाम सी पाणी पीदा।”
ईसु सामरी बायर काजे कह्यु, “ज कुय पाणी पीये तीनाक अळी पीस लागसे, बाकुन मे आपीस च पाणी, जु बी पीसे तीनाक कदी पीस नी लागे। अतरोत नी बाकुन च पाणी तेरी जीवाय मां पाणीन झीर बण जासे। ने तेरी अमर जीवाय वाटे खळो-खळो उंहतो रवसे।”
तत्यार सामरी बायर ईसुक कय, “ए मालीक मेसेक च पाणी आप ती मेसेक अळी-अळी पीस नी लागे, ने मेसेक चां पछो पाणी भरने आवणु नी पड़े।”
ईसु तीनीक कह्यु, “जाय्न तारा घरवाळा काजे बुलाय लाव।”
ची बायर1 जपाप आपी, “मारु घरवाळु नी हय।”
ईसु तीनीक कह्यु, “तु संय कय की मारु घरवाळु नी हाय।” हव तु पांच लाडा कर लेदली, ने हय तु तेरे भेळे रय चु बी तारु घरवाळु नी हय, तु जी वात छाचलीन कय रय।
जी वात सामळीन बायर ईसुक कही, ए मालीक असो लागे की, तु भगवानेन अघली वात बताड़न्यु माणुस छे। हामरा डाहा-डाहा हीना बयड़ा पर पुजा-पाट कर्या, ने तुहुं यहुदी माणसे कह्वु की पुजा-पाट करनेन जागु यरुसलेम सहर मां छे।
ईसु तीनीक कह्यु, “ओ बायर, मारी ईनी वात पर भुरसु कर, काहाकी असी टेम आवणे बाजी रय, की तीने टेमे तुहुं नी ते हीना बयड़ा पर ने नीते यरुसलेम मां भगवानेन पुजा-पाट करसु। तीनाक तुहुं नी जाणु तेरी पुजा-पाट करु ने हामु तीनाक जाणजे तेरी पुजा-पाट करजे, काहाकी छुटकारु यहुदी जातीवाळा मसी मां सीत जड़से। बाकुन हय ची टेम आवणे बाजी रय, ने हींताळ आय गुय, तीने टेमे छाचलीन भगवानेन पुजा-पाट करन्या, तेरा चुखली-आत्मा मां बणीन तेरी छाचली वातेन अनसारे भगवान बासेन भक्ती करसे। काहाकी भगवान बास आपसा वाटे असली भक्ती करन्यात काजे हेर र्यु। भगवान जीव-आत्मा छे, ने तेरे मां छाचलीन भगवानेन भक्ती करन्या काजे तेरा जीव-आत्मा मां रय्न ने छाचे मन तेरी भक्ती करनु चाहजे।”
सामरी बायर ईसुक कय, “मेसेक मालुम छे, की छुड़ावन्यु मसी जु खीरीस्त कह्वाये, चु आवणे वाळु छे; जत्यार2 चु आवसे, तत्यार हामु काजे आखी वात कय देसे।”
ईसु तीनीक कह्यु, “मेत मसी छे, जु तारे साते वात करने बाजी र्यु।”
तीनी टेमे ईसुन चेला आय गुया, ने ईसु काजे एक बायर साते वात करतेलु देखीन वीच्यार मां पड़ गुया; तेबी कुय बी ज नी कह्यो की तु हेरे धड़े सी काय मांग रयु? “नीते तु हीनी साते काहा वात कर रयु?” तत्यार ची बायर आपसीत वटळु चांहान रहणीदीन तेरा सहर मां जाय्न माणसेक ज कहंणे बाजी गुय। “चालु, एक माणुस काजे देख लेवु! चु माणुस, मे ज करली च आखो कय देदु; कांखुर मायन हयुत मसी हसे?” तीनी बायरीन वात सामळीन तीना सहर वाळा माणसे सहरेम सी नीकळीन ईसु काजे भेळा हवणे हुड़ु-हुड़ु आवतेला।
तीने टेमे ईसुन चेला ईसु सी लीलघाय्न कह्या, “ए मास्तर थुड़ोक खाय ले।”
बाकुन ईसु तीनुक कह्यु, “मारे धड़े खाणे वाटे असो खाणो छे, तीना खाणान बारामां तुहुंक मालुम नी हय।”
अतरात मां ईसुन चेला आपसा-आपसात कह्या, “कुय हेरे वाटे खाणो लायु हसे काय? करीन चु असु कय र्यु।”
जी वात समजीन ईसु तीनुक कह्यु, “मारो खाणो ज छे, की मारा मकलने वाळान मरजीन अनसारे चालो ने तेरो काम पुरो करो। तुहुं ते असा कवता आय रया, मेर पाकणेन हय चार महना बच रया। बाकुन मे तुहुंक दाखलान साहरे कह्वो, आपसा पापण्या उपर करीन ईनु खेत भीणी देखु, ईनु खेतेन मेर पाकीन धवळी फक हय गुय काटणे वाटे तीयार हय गुय। काटणे वाळाक दाहड़की जड़े ने अमर जीवाय वाटे फळ भेळा करे, काहाकी एरने वाळु ने काटणे वाळु दुयु खुस हवे। काहाकी जु दाखलु संय छे, ‘एरने वाळु काहनुक दीसरु छे, ने काटणे वाळु काहनु दीसरु छे।’ मे तुहुंक पलो खेत काटणे वाटे मकल्यु जाहां तुहुं मेहनत नी कर्या, ने दीसरा मेहनत कर्या ने तुहुं तींद्रा मेहनतेन फळ मां भेसकाय गुया।”
सामरी माणसेन भुरसु
चां सामरी बायर ईसुन बारामां असी गवा देदली की, “चु माणुस, मे ज करली च आखो कय देदु। अळतेन तीना सामरीया जीलान बेसका माणसे सामरी बायरीन मुंहडे ईसुन बारामां जी गवा सामळीन ईसु पर भुरसु करने बाजी गुया।” तेरेमां तत्यार ची सामरी बायर ईसु धड़े आय ती ईसु सी लीलघाय्न कह्णे बाजी गुय की हामरेन्चां रव। अळतेन ईसु चां दुय तीन दाहड़ा लग रयु।
ने ईसुन वात सामळी बेसका दीसरा माणसे बी ईसु पर भुरसु कर्या। ने अळी तीनी सामरी बायर काजे कह्या, “हय हामु तारी सामळीन ईसु पर भुरसु करने बाजी गुया; काहाकी हामु ईसुन वात सामळी लेदा, की छाचलीन हयु की हयु ईनी कळीन3 माणसेक पाप सी छुड़ावणे वाळु छे, करीन तेरे पर भुरसु कर रया।”
गलील जीला मां ईसु काजे वार काम करन्यु माने, बाकुन बचाड़न्यु करीन भुरसु नी करे
अळतेन दुय दाहड़ा वीती गुया, ने ईसु आपसा चेला भेळु सामरीया जीलाम सी नीकळीन गलील जीलाम जात रयु। ईसु ते आपसुत असी गवा देदलु की, “भगवानेन अघी सी आवणे वाळी वात देखाड़न्यु, तीना काजे आपसान देस मां ईज्जत नी जड़े।” जत्यार ईसु गलील जीलाम पुग्यु, ती गलील वाळा माणसे ईसु तेरेत अनसारे ईसु साते वेहवार कर्या। चे बी तीहवारेन टेमे यरुसलेम सहर गुयला, ने तीहवारेन दाहड़ाम ईसु यरुसलेम मां जतरा बी वारलु काम करलु, चे आखा काम देखला हतला करीन ईसुन आव-भाव कर्या।
ईसु काजे गलील वाळा मटो काम करन्यु करीन माने
तत्यार ईसु एक कावा अळी गलील जीलान काना सहर मां आयु, चां चु पाणी काजे अंगुरेन रस बणाय देदलु। ने हीना काना सहर साते वाळा कफरनहुम सहर राजान एक खास पावर हतलु, तेरु पुर्यु मांदलु हतलु। चु ज सामळ्यु की यहुदीया सी ईसु आपसान गांव मां सी गलील जीलाम आय गुयलु छे, ती चु काना सहर मां ईसु धड़े गुयु, ने ईसु सी लीलघाय्न कह्यु की चाल मारा पुर्या काजे वारु कर दे। काहाकी तेरु पुर्यु मरने वाळु हतलु। ईसु गलील वाळा माणसेन कम भुरसु देखीन कह्यु, “जत्यार लग तुहुं मटा कामेन सहलाणी नी देखु, तत्यार लग तुहुं मार पर भुरसु नी करसु।”
चु राजान खास पावर्यु ईसुक कह्यु, “ए मालीक मामार चाल नेते मारु पुर्यु मर जासे।”
ईसु तीना राजान खास पावर्याक कह्यु, “जां तारु पुर्यु4 नी मरे, चु जीवतेलु रवसे।”
चु राजान पावर्यु ईसुन ईनी वात पर भुरसु करीन जाती रयु। चु राजान खास पावर्यु वाटेत हतलु, ती तीना पावर्यान, पावर्या आय्न तीनाक भेळा हया ने कह्या, “तारु पुर्यु वारु हय गुयु ने जीवतु छे।”
चु तीनुक पुछ्यु, “काहने टेमे मारु पुर्यु वारु हवणे बाजी गुयलु, चे कह्या काल दीसु एक बजे तेरो सेरी उतरी गुयलो।” तत्यार तीना मांदला पुर्यान बासेक जी वात हेर आवी की ईसु हीनीत टेमे ज कहंलु, “जां तारु पुर्यु जीवतु छे।” ने असु करीन चु राजान पावर्यु ने तेरा घरना आखा माणसे ईसु पर भुरसु कर्या।
ज पेहला मायन दीसरा मटा कामेन सहलाणी हतली, जु ईसु यहुदीया सी गलील जीलाम पछु आय्न देखाड़्यु।
Source notes (4)
- Footnote स्त्री
- Footnote जब
- Footnote जगत
- Footnote पुत्र
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.